Read Quechua Cuzco Bible 1988 ESTER 8 Bible Online

ESTER 8 - Quechua Cuzco Bible 1988 bible

ESTER 8

¹Chay kikin p'unchaymi rey Asueroqa Judío runakunaq awqan Hamanpa tukuy kaqninkunata reina Esterman qopurqan. Estertaq reyman willarqan Mardokeoqa ayllun kasqanta, chaymi Mardokeoqa reyman qayllaykurqan.

²Hinan reyqa Hamanmanta qechuspa churakusqan selloyoq sortijanta horqokuspa Mardokeoman qorqan, Estertaq Hamanpa tukuy kaqninkunaman Mardokeota mayordomo kananpaq churarqan.

³Chaymantataq Esterqa wakmanta reyta rimapayarqan, ñawpaqenman k'umuykukuspataq waqakuspa valekurqan mana chanin Hamanpa Judío runakunata wañuchinanpaq kamachikusqan qelqa pampata phawananpaq, ahinapi Judío runakuna contra yuyaykusqan mana hunt'akunanpaq.

⁴Qori varanta rey haywariqtintaq, Esterqa sayarispa reyta nirqan:

⁵—Reyníy, sumaqta qhawariwanki, munakuwanki, chanintaq rikch'akusunkipas chayqa, valekuykin huk unanchayta qelqanaykita Hamanpa kamachikusqan qelqa pampata phawananpaq, payqa suyupi llapan hatun hap'iykunamanmi qelqata apachirqan llapan Judío runakuna ch'usaqyachisqa kananpaq.

⁶¿Imaynataq llakhi kashayman llaqta-masiyman kay ñak'ariy aypaykushaqtinri? ¿Imaynataq aylluyta wañuchishaqta hinallata qhawashayman? nispa.

⁷Hinan reyqa reina Esterman Judío runa Mardokeomanwan kutichirqan: —Hamanpa tukuy kaqninkunataqa reina Estermanñan qopuni, Hamantapas seq'onapi wañuchiniña, Judío runakunata ch'usaqyachiyta munasqanmanta.

⁸Chhaynaqa, sutiypi qelqaychis imachus Judío runakunarayku allin rikch'akusunkichis chayta, sortijaywantaq ñit'iychis, reypa sutinpi qelqasqa sortijanwan ñit'isqa kamachikuyqa manan p'akisqa kanmanchu, nispa.

⁹Hinan kinsakaq Siván killaq iskay chunka kinsayoq p'unchayninpi reypa qelqaqninkuna waqyasqa Karqanku. Paykunan Mardokeoq tukuy kamachisqanta qelqarqanku Judío runakunaman, hatun hap'iy kamachikuqkunaman, llaqta kamachikuqkunaman, hinallataq Indiamanta Etiopiakama pachak iskay chunka qanchisniyoq hatun hap'iykunapi llapan oficialkunamanpas. Sapanka hatun hap'iykunaman qelqayninku qelqapi rimayninku rimaypi qelqarqanku, hinallataq Judío runakunaman qelqayninku qelqapi rimayninku rimaypi.

¹⁰Chay qelqakunatan rey Asueroq sutinpi qelqarqanku, hinaspan selloyoq sortijanwan ñit'irqanku, chaskikunataq reypa phawaq caballonkunapi sillaykusqa aparqanku.

¹¹Chay qelqapin reyqa Judío runakunata kamachirqan tiyasqanku llaqtakunapi huñukuspanku kawsayninkumanta tupakunankupaq, may llaqtapas may hap'iypas armayoq paykunaman phawaykuqtinqa. Ahinaqa, Judío runakunaqa atirqanmi paykunata muchuchiyta, wañuchiyta, ch'usaqyachiyta, tukuy kaqninkunatapas munaychakuyta, warminkutapas wawankutapas mana khuyapayaspa.

¹²Chayta ruwanankupaqqa huk p'unchaymi yuyaykusqa karqan, chunka iskayniyoq Adar killaq chunka kinsayoq p'unchayninpi.

¹³Chay unanchay qelqaqa sapanka llaqtakunapin hatun hap'iykunapin kamachikuy hina willasqa kanan karqan, chay p'unchaypi Judío runakuna awqankuta vengakunankupaq wakichisqa kashanankupaq.

¹⁴Chaymi chaskikunaqa reypa kamachisqanta kasukuspa, paypa phawaq caballonpi sillaykusqa usqhaylla phawarqanku. Chay kamachikuyqa hatun Susa llaqtapipas willasqallataqmi karqan.

¹⁵Chaymantataq reypa wasinmanta Mardokeoqa lloqsirqan azulniyoq yuraqniyoq rey p'achawan p'achasqa, hatun qori pilluyoq, linomanta sani-puka llaqollayoq.

¹⁶Chay p'unchaykunaqa Judío runakunapaqqa ancha allinmi karqan, chaymi q'ochukurqanku kusikurqanku.

¹⁷Tukuy llaqtakunaman, hatun hap'iykunaman, cheqaskunaman reypa kamachikuynin qelqa chayaqtinmi, Judío runakunaqa anchata kusikurqanku q'ochukurqanku, hinaspa hatun mikhuyta wakichispa fiestata ruwarqanku. Askha runakunataq suyupi llaqta-llaqtamanta Judío runaman tukupurqanku, paykunata manchakuspanku.