Read Quechua Cuzco Bible 1988 ESTER 9 Bible Online

ESTER 9 - Quechua Cuzco Bible 1988 bible

ESTER 9

¹Chunka iskayniyoqkaq Adar killaq chunka kinsayoq p'unchayninpi reypa kamachikusqan hunt'akunan karqan. Chay p'unchaypin Judío runakunata awqanku munaychakuyta yuyarqanku, ichaqa manan hinachu karqan, Judío runakunan paykunata munaychakurqanku.

²Rey Asueroq suyun llapan llaqtakunapi tiyaq Judío runakunan huñukurqanku, paykunata wañuchiy munaq awqanku contra phawaykunankupaq. Manataq awqankuqa tupakuyta atirqanchu, llapan runakuna Judío runakunata manchakusqanrayku.

³Llapan apunkunapas, hatun hap'iy kamachikuqkunapas, llaqta kamachikuqkunapas, oficialkunapas Mardokeota manchakuspanku Judío runakunata yanaparqanku.

⁴Mardokeoqa reypa wasinpi ancha atiyniyoqmi karqan, llapan suyupitaq mentasqa kasqanta yacharqanku, sapa p'unchaytaq aswan-aswan atiyniyoq kapurqan.

⁵Chaymi Judío runakunaqa llapan awqankuta espadawan wañuchispa ch'usaqyachirqanku, ima munasqankutan ruwarqanku.

⁶Suyuq hatun Susa llaqtallanpiraqmi wañuchirqanku phisqa pachak qharikunata,

⁷hinallataq wañuchirqanku Parsandatata, Dalfonta, Aspatata,

⁸Poratata, Adaliata, Aridatata,

⁹Parmastata, Arisaita, Aridaita, Vaizatatawan.

¹⁰Chaykunan karqan Judío runakunaq awqan Hamedataq churin Hamanpa chunkantin churinkuna, Judío runakunan ichaqa paykunaq kaqninkuta mana hap'ikapurqankuchu.

¹¹Chay kikin p'unchaymi rey Asueroman willarqanku Susa llaqtapi hayk'achus wañusqanta.

¹²Hinan reyqa Esterta nirqan: —Kay Susa llaqtallapiraq phisqa pachak qharikunata Hamanpa churinkunatawan wañuchinku chayqa, ¿wakin hap'iykunapiqa hayk'ataraqchá wañuchinku? ¿Astawanraqchu munanki imatapas? Mañakullaway, qosqaykipunin, nispa.

¹³Estertaq kutichirqan: —Allin rikch'akusunki chayqa, valekuykin paqarintawan Susa llaqtapi Judío runakuna kaqlla kamachisqaykiman hina wañuchinanpaq, Hamanpa chunkantin churinkunaq ayanpas seq'onaman warkusqa kananpaq, nispa.

¹⁴Reyqa mañakusqanman hinan hunt'akunanpaq kamachirqan, hinan chay kamachikuyqa Susapi willasqa karqan. Hamanpa chunkantin churinpa ayankunataq warkusqa karqan.

¹⁵Hinan Susa llaqtapi kashaq Judío runakunaqa Adar killaq chunka tawayoq p'unchayninpi huñukuspanku, kinsa pachak qharikunata wañuchirqanku, ichaqa manan kaqninkuta hap'ikapurqankuchu.

¹⁶Suyuq hatun hap'iyninkunapi tiyaq wakin Judío runakunapas Adar killaq chunka kinsayoq p'unchayninpi huñukullarqankutaq kawsayninkumanta tupakunankupaq. Hinaspan awqankuta vengakuspa qanchis chunka phisqayoq waranqa runata wañuchirqanku, ichaqa manan kaqninkutaqa hap'ikapurqankuchu.

¹⁷Qhepantin p'unchaytaq samarqanku, hinaspan kusisqa hatun mikhuywan q'ochukurqanku.

¹⁸Susapi kaq Judío runakunaqa iskay p'unchaymi maqanakurqanku, chaymi paykunaqa chunka phisqayoq p'unchaypi samaspanku kusisqa hatun mikhuywan q'ochukurqanku.

¹⁹Chayraykun campopi ayllukunapi tiyaq Judío runakunaqa Adar killaq chunka tawayoq p'unchayninpi kusikuspa fiestata ruwallankupuni, mikhunatapas apachinakuspanku.

²⁰Mardokeoqa lliwtan chay ruwasqakunataqa qelqarqan, hinaspa suyuq hap'iyninkunapi tiyaq llapan Judío runakunaman qelqakunata apachirqan, karupiña qayllapiña karqanku chaypas.

²¹Paykunatan kamachirqan sapa wata Adar killaq chunka tawayoq p'unchayninpi chunka phisqayoq p'unchayninpiwan fiestata ruwanankupaq.

²²Chay p'unchaykunapin Judío runakunaqa awqankuta vengakuqtinku, llakikuyninku, waqayninku, anchiyninkupas kusikuyman q'ochukuyman tukupurqan. Chaymi chay p'unchaykunapiqa kusisqa hatun mikhuywan fiestata ruwananku karqan, mikhunata apachinakuspanku wakchakunamanpas regalokunata qospanku ima.

²³Hinan Judío runakunaqa chay fiestata watan-watan ruwanankupaq yuyaykurqanku, Mardokeoq qelqasqantapas: Allinmi, nillarqankutaq.

²⁴Llapan Judío runakunaq awqan Agag runa Hamedataq churin Hamanqa paykunata wañuchiyta yuyaspanmi Purta [2] sorteasqa wañuchinanta ch'usaqyachinanta yachananpaq.

²⁵Reyman Ester willaqtintaq ichaqa, reyqa kamachikuywan unanchasqa Judío runakuna contra chay mana chanin yuyaykusqanmanta kikin Hamán wañuchisqa kananpaq. Ahinapin Hamantapas churinkunatapas seq'onapi wañuchisqaku.

²⁶Chaymi chay p'unchaykunata Purim nispa suticharqanku, Pur simimanta kasqanrayku. Hinan Judío runakunaqa Mardokeoq qelqanman hina, paykunaq rikusqanman kawsayninkupi yachasqankuman hina,

²⁷yuyaykurqanku watan-watan fiestata ruwanankupaq paykunapas mirayninkupas, hinallataq Judío runaman tukuqkunapas. Sapa wata hina fiestata ruwanankupaq yuyakurqanku chay iskay p'unchaypi, kamachisqa kasqankuman hina.

²⁸Ahinapin paykunaqa chay p'unchaykunata yuyarispanku waqaychananku karqan sapanka mirayninkupi, ayllukunapi, llaqtakunapi, hap'iykunapiwan, Judío runakunapas mirayninkupas fiestata ruwashanallankupaq.

²⁹Abihailpa ususin reina Estertaq Mardokeopiwan atiyninkuman hina Purim fiestamanta iskaykaq qelqata qelqarqanku ñawpaqkaq qelqata cheqaqchananpaq.

³⁰Chaytan sumaq simikunawan munakuywan apachirqanku suyupi pachak iskay chunka qanchisniyoq hatun hap'iykunapi kashaq llapan Judío runakunaman.

³¹Chay qelqapin ñawpaqkaq kamachisqanku p'unchayman hina Purim fiestata ruwanankupaq paykunata kamachirqanku, hinallataq kamachirqan chay fiestapi ayunanankupaq llakikunankupaqwan.

³²Chay hinatan reina Esterqa cheqaqcharqan Purim fiestapaq kamachikuyta. Tukuy chay ruwaykunaqa qelqasqan karqan.