Read Quechua Cuzco Bible 1988 ÉXODO 12 Bible Online

ÉXODO 12 - Quechua Cuzco Bible 1988 bible

ÉXODO 12

¹Moisestawan Aarontawanmi Señor Diosqa Egipto suyupi nirqan:

²—Kay killaqa qankunapaq kanqa wata qallariy killan.

³Llapan Israel huñusqata nimuychis: Kay killaq chunkakaq p'unchayninpi sapankaykichis familiaykichispaq huk borregotapas orqo cabratapas hap'iychis.

⁴Familiataqchus pisilla kanqa animalta mikhuspa mana tukuq hina chayqa, wasiyoqpas wasi-masinpiwan chay animalta rakinakunqaku hayk'a runachus kasqankuman hina, sapankaq may chhikatachus mikhunanman hina.

⁵Ovejamantapas cabramantapas watayoq orqo animalta akllankichis, chay animalqa mana imanasqan kanqa.

⁶Hinaspan waqaychankichis kay killa chunka tawayoq p'unchaykama, hinaspataq llapa Israel llaqta chayta nak'ankichis rasphiyaykuyta.

⁷Yawartan chaskinkichis, hinaspa chaywan ch'aqchunkichis mayqen wasipichus mikhunkichis chay wasi punkuq iskaynin sayaq k'aspinta chakantawan.

⁸Chay tutapachan ninapi kankasqa aychata mikhunkichis, mana qonchuyoq t'antatawan haya qorakunatawan.

⁹Aman chay aychamantaqa imallantapas hankutapas t'impusqatapas mikhunkichischu, aswanpas umantin chakintin wiksantin ninapi kankasqallatan.

¹⁰Aman chay animalmantaqa imallantapas puchuchinkichischu paqarisninkamaqa, puchuqtaqa ninapi ruphachipunkichis.

¹¹Hinallataq puririnaykichispaq p'achaykusqa usut'aykusqa, tawna hap'intin mikhunkichis. Usqhayllatan chayta mikhunkichis, chay animal hawa ñoqa Señor Diosqa alqaspa pasarparisaq.

¹²Ñoqan chay tuta llapa Egipto suyunta pasasaq, hinaspan Egipto suyupi llapa phiwita wañuchisaq, runa phiwitapas uywaq ñawpaq wachasqantapas. Egipto llapa dioskunatapas huchachaspataqmi taripasaq. Ñoqan Señor Diosqa kani.

¹³Yawarmi señalniykichis kanqa tiyashasqaykichis wasikunapi, yawarta rikuspaymi alqaspa pasarparillasqaykichis, chaymi Egipto runakunata wañuchiqtiy mana mayqenniykichispas wañunkichischu.

¹⁴Chay p'unchaytan yuyarinkichis, sapanka mirayniykichispi ñoqapaq hatun fiestata ruwankichis. Ñoqan kamachiykichis kayta ruwashanallaykichispaq.

¹⁵Qanchisnintin p'unchaymi mana qonchuyoq t'antata mikhunkichis. Ñawpaqkaq p'unchaymantañan wasiykichispi qonchutaqa wikch'upunkichis, pipas qonchuyoqta mikhunqa ñawpaqkaq p'unchaymanta qanchiskaq p'unchaykama chayqa, Israel llaqtaymantan wikch'usqa kanqa.

¹⁶Ñawpaqkaq p'unchaypipas qanchiskaq p'unchaypipas yupaychawanaykichispaqmi huñukunkichis. Aman chay p'unchaykunapiqa imatapas llank'ankichischu, sapankapas mikhunallaykichistan wayk'ukunkichis.

¹⁷Kay p'unchaymi Egipto suyumanta llapaykichista horqosqaykichis, chayrayku kunan p'unchay Mana Qonchuyoq T'anta Fiestata ruwankichis, sapanka mirayniykichispipas kay fiestata ruwashallankichispuni.

¹⁸Ñawpaqkaq killaq chunka tawayoq p'unchaynin ch'isimanta iskay chunka hukniyoq p'unchaynin ch'isikama mana qonchuyoq t'antata mikhunkichis.

¹⁹Qanchisnintin p'unchaymi wasiykichispi qonchu mana kanqachu. Pipas qonchuyoqta mikhuqqa, wak llaqtayoqpas Israel llaqtayoqpas kachun Israel llaqtaymantan wikch'usqa kanqa.

²⁰Aman imatapas qonchuyoqtaqa mikhunkichischu, llapa wasiykichispin mana qonchuyoq t'antata mikhunkichis, nispaykichis, nispa.

²¹Moisestaq huñuykurqan llapa Israel kurak runakunata, hinaspan paykunata nirqan: —Riychis familiaykichispaq borregotapas cabratapas akllamuychis, hinaspa Diospa alqaspa pasarparinanpaq chayta nak'ankichis.

²²Huk mayt'u muña[4] k'allmata hap'ispa puruñapi yawarman challpuychis, hinaspa chay yawarwan ch'aqchuychis punku chakata iskaynin sayaq k'aspitawan. Amataq mayqenniykichispas wasi punkuykichismanta illarimunankama lloqsinkichischu.

²³Señor Diosmi Egipto runakunata wañuchispan pasanqa. Punkuq chakanpi iskaynin sayaq k'aspipiwan yawarta rikuspantaq, Señor Diosqa chay punkuta alqaspa pasarparinqa, manataqmi wañuchinanpaq wasiykichisman sipiqta kachaykunqachu.

²⁴Kay ruwanataqa qankunapas wawaykichiskunapas ruwashallankichispunin.

²⁵Señor Diospa qonasuykichispaq prometesqasuykichis hallp'aman haykuspaykichistaq, chay ruwanata ruwankichis.

²⁶Wawaykichischus tapusunkichis: ¿Imataq kay ruwayniykichisri? nispa, chayqa,

²⁷ninkichis: Kayqa Señor Diospa alqaspa pasarparinanpaq uywa nak'asqan. Paymi Egipto suyupi Israel runakunaq wasinta alqaspa pasarparirqan. Egipto runakunata muchuchishaspanmi wasiykuta mana imanarqanpaschu, nispaykichis, nispa. Chaymi Israel runakunaqa k'umuykukuspa Diosta yupaycharqanku.

²⁸Hinaspan rispanku Señor Diospa Moisesta Aarontawan kamachisqanman hina ruwarqanku.

²⁹Kuska tutataq Señor Diosqa Egipto suyupi llapa phiwita wañuchirqan, kamachikuy tiyananpi tiyaq rey Faraonpa phiwinmanta carcelpi tiyaqpa phiwinkama, hinallataq uywakunaq llapa ñawpaq wachasqantapas.

³⁰Hinan chay tuta rey Faraonpas llapa oficialninkunapas, llapa Egipto runakunapas sayarirqan, sonqo nanay waqaytaq Egipto suyuntinpi karqan. Tukuy wasipin wañuqqa karqan.

³¹Chaymi chay tutapacha rey Faraonqa Moisestawan Aarontawan waqyachimuspa nirqan: —Runaykuna ukhumanta lloqsiychis, qankunapas Israel runakunapas, hinaspa ripuychis, Señor Diosta yupaychamuychis nisqaykichista hina.

³²Ovejaykichistapas wakaykichistapas nisqaykichista hina apaychis, hinaspa ripuychis. Ñoqapaqpas Diosmanta mañampullawaychistaq saminchawananpaq, nispa.

³³Egipto runakunapas Israel runakunata tanqarqan suyunkumanta usqhaylla ripunankupaq. Nirqankutaq: —Llapallaykun wañurasaqku, nispa.

³⁴Israel runakunan mana qonchuyoq masa chapusqankuta aparqanku, hinaspan chapunankutapas llapallanta p'achapi khipuykuspa rikrarikurqanku.

³⁵Paykunataq Moisespa kamachisqanta hina Egipto runakunamanta mañakusqaku qolqe alhajakunata, qori alhajakunata, p'achakunatawan ima.

³⁶Señor Diostaq Israel runakunata Egipto runakunawan sumaqta rikuchisqa, chaymi paykunaman qosqaku hayk'an mañakusqankuta. Chay hinatan Egipto runakunata llat'anarqanku.

³⁷Israel runakunan puririrqanku Ramsesmanta Sukotman, soqta pachak waranqa qharikuna chakipikama, warmikunapas wawakunapas mana yupasqan karqan.

³⁸Paykunawanqa lloqsillarqantaqmi imaymana niraq askhallaña runa, hinallataq ancha askha ovejakunapas wakakunapas.

³⁹Paykunata Egipto runakuna qarqoshaqtinqa, manan tiemponku karqanñachu mikhunata wayk'ukunallankupaqpas, chaymi Egipto suyumanta apamusqanku masamanta mana qonchuyoq t'antata ruwarqanku.

⁴⁰Israel runakunan Egipto suyupi tiyasqaku tawa pachak kinsa chunkayoq watata.

⁴¹Tawa pachak kinsa chunkayoq wata hunt'akuqtintaq, chay kikin p'unchaypi Señor Diospa llaqtanqa Egipto suyumanta t'aqa-t'aqa lloqsimpurqanku.

⁴²Chay tutan Señor Diosqa qhawasharqan Egipto suyumanta paykunata horqomunanpaq. Chaymi chay tutataqa llapa Israel runakuna sapanka mirayninkupi Señor Diosta yupaychanankupaq qhawashallanqakupuni.

⁴³Señor Diostaq Moisestawan Aarontawan nirqan: —Kaymi Alqaspa Pasarpariy Fiestapaq kamachikuy: Manan pipas wak llaqtayoqqa chay nak'asqa animaltaqa mikhunqachu.

⁴⁴Aswanpas qolqewan rantisqa kamachi runallan chaytaqa mikhunqa, qhari-kayninpi señalasqa kasqanmantaña.

⁴⁵Purikuq wak llaqtayoqwan, wak llaqtayoq llank'apakuqwanmi ichaqa chayta mana mikhunqachu.

⁴⁶Ch'ulla wasillapin mikhunkichis, aman chay aychataqa chaymanta horqonkichischu, amataq tulluntapas p'akinkichischu.

⁴⁷Lliw Israel llaqtan chayta ruwanqa.

⁴⁸Qanwan tiyaq pipas wak llaqtayoqqa Alqaspa Pasarpariy Fiestata Señor Diospaq ruwayta munanqa chayqa, familianpi llapa qhari señalasqa kachun, hinaspaña fiestata ruwanqa, Israel suyupi suyumasiykichis hinataq kapunqa, ichaqa manan pi mana señalasqapas chayta mikhunqachu.

⁴⁹Kasqan kamachikuyllan kanqa llaqtayoqpaqpas, qankuna ukhupi tiyaq wak llaqtayoqpaqpas, nispa.

⁵⁰Llapa Israel runakunan Moisestawan Aarontawan Señor Diospa kamachisqanman hina ruwarqanku.

⁵¹Chay kikin p'unchaymi Señor Diosqa Israel runakunata Egipto suyumanta t'aqa-t'aqata horqomurqan.