Read Quechua Cuzco Bible 1988 ÉXODO 13 Bible Online

ÉXODO 13 - Quechua Cuzco Bible 1988 bible

ÉXODO 13

¹Señor Diosmi Moisesta nirqan:

²—Llapa phiwikunata t'aqapuway. Israel runakuna ukhupi ñawpaqkaq naceqqa, runakunapas animalkunapas ñoqaqmi, nispa.

³Hinan Moisesqa runakunata nirqan: —Kamachi kashaspa Egipto suyumanta lloqsimusqanchis p'unchayta yuyarinkichis, chay p'unchaypin Señor Diosqa ancha atiyninwan horqomurqasunkichis. Aman qonchuyoq t'antata mikhunkichischu.

⁴Qankunaqa Abib killapin lloqsishankichis.

⁵Señor Diosmi machulaykichisman jurarqan Canaán runakunaq, Het runakunaq, Amor runakunaq, Hiv runakunaq, Jebus runakunaq hallp'ankuta qonanpaq, chay hallp'an imaymanaq hunt'asqa wiñanan kashan. Chayman Señor Dios pusaykusuqtiykichismi kay killapi chay fiestata ruwankichis.

⁶Qanchisnintin p'unchaytan mana qonchuyoq t'antata mikhunkichis, qanchiskaq p'unchaypitaq Señor Diosta yupaychana fiesta kanqa.

⁷Chay p'unchaykunapin mana qonchuyoq t'antata mikhunkichis, suyuntinpin qonchuyoq t'antataqa ama hap'inkichischu, aman qonchullapas kanqachu.

⁸Chay p'unchaypin churiykichisman willankichis: Kaytaqa ruwashanchis Egipto suyumata Señor Diospa horqomuwasqanchista yuyarispan, nispa.

⁹Chay fiestaqa Señor Diospa kamachikuy siminta rimarinapaqmi yuyarichisunkichis, imaynan makiykichispi khipusqapas mat'iykichispi watasqapas yuyarichisunkichis hina, Señor Diosmi ancha atiyninwan Egipto suyumanta horqomurqasunkichis.

¹⁰Chaymi chay fiestata sapa wata Abib killallapipuni ruwankichis.

¹¹Señor Diosmi Canaán runakunaq hallp'anman pusaykusunkichis qankunamanpas machulaykichiskunamanpas prometesqanman hina, chayta qosuqtiykichismi

¹²llapa phiwi churita payman qopunkichis, hinallataq animalkunamantapas llapa ñawpaqkaq orqo wachasqata. Chaykunaqa Señor Diosmanmi tupan.

¹³Llapa ñawpaqkaq wachay asnotataq kutichikapunkichis huk borregota Señor Diosman haywaspa, manataq kutichikapunkichischu chayqa wañuchipunkichismi. Phiwi churiykichiskunatapas kutichikapullankichistaqmi.

¹⁴Qhepamantaq churiykichis tapusunkichis: ¿Imatataq ruwashankichis? nispa chayqa, paykunata ninkichis: Kamachi kashaqtinchismi, Señor Diosqa ancha atiyninwan Egipto suyumanta horqomuwarqanchis.

¹⁵Sonqonta rumiyaykachikuspa rey Faraón ripunanchista hark'awaqtinchistaq, Señor Diosqa Egipto suyupi llapan phiwita wañuchirqan, runa phiwimanta uywaq ñawpaqkaq wachasqankama. Chaymi ñoqanchisqa llapa ñawpaqkaq wachay orqo animalta Señor Diosman haywanchis, phiwi churinchiskunatataq kutichikapunchis, nispaykichis.

¹⁶Chay fiestan makiykipi khipusqa hina kanqa, mat'iykichispipas watasqa hinallataq, Egipto suyumanta Señor Diospa ancha atiyninwan horqomuwasqanchista yuyarinanchispaq, nispa.

¹⁷Rey Faraón Israel runakunata kachariqtintaq, Diosqa mana paykunata Filistea runakunaq llaqtanman riq ñannintachu pusarqan, hinaña chay ñan sispalla kashaqtinpas. Diosmi nirqan: Paqtan hatun maqanakuyta rikuspa llaqta ñakapakunman, hinaspa Egipto suyuman kutirikapunkuman, nispa.

¹⁸Chaymi Diosqa Puka Qochaman riq ch'inneq ñanninta muyuchirqan. Israel runakunaqa Egipto suyumanta armantinkaman lloqsirqanku.

¹⁹Moisesqa Josepa tullunkunatan apapurqan Israel runakunata Josepa jurachisqanman hina. Josemi paykunata nisqa: Diosqa yanapasunkichispunin, chaypachan tulluykunata kaymanta apapunkichis, nispan.

²⁰Sukotmantan puririrqanku, hinaspanmi ch'inneqwan tupay Etampi karpakurqanku.

²¹Señor Diostaq ñanninta pusananpaq ñawpaqenkuta sayaq phuyupi p'unchay rirqan, tutataq paykunata k'anchaspa sayaq ninapi rirqan, chhaynapin tutantin p'unchaynintin purirqanku.

²²P'unchaymi sayaq phuyuqa ñawpaqenkuta rishallaqpuni, tutapas sayaq nina rishallaqpuni.