Read Quechua Cuzco Bible 1988 ÉXODO 14 Bible Online

ÉXODO 14 - Quechua Cuzco Bible 1988 bible

ÉXODO 14

¹Señor Diosmi Moisesta nirqan:

²—Israel runakunata kamachimuy kutirispa Pi-hahirot chimpapi karpakunankupaq, chaymi kashan Baal-zefón chimpa Migdolwan Puka Qochawan tupaypi. Chayneq chimpa qocha patapi karpakuchunku.

³Rey Faraonmi Israel runakunamanta ninqa: Campopin payichikushanku, ch'inneqmi paykunata hark'ashan, nispa.

⁴Ñoqataq rey Faraonpa sonqonta rumiyaykachisaq, hinan qatipamusunkichis, rey Faraonta llapa ejercitontapas atipasqaywantaq hatunchasqa kasaq, hinan Egipto runakunaqa ñoqa Señor Diosqa kasqayta yachanqaku, nispan. Israel runakunataq chay hinata ruwarqanku.

⁵Egipto suyu reymanmi Israel runakunaq ripushasqanta willarqanku, hinan paypas oficialninkunapas huk-hinata yuyaykuspa nirqanku: —¿Imatataq kaytari ruwashanchis Israel runakunata ripunankupaq kacharispa? Manañan kamachinchista ruwaqqa pipas kapunchu, nispa.

⁶Chaymi rey Faraonqa carretanta wakichispa soldadonkunata pusarikurqan.

⁷Hinallataq soqta pachak allinnin carretakunatapas, Egipto suyu wakin carretakunatapas aparikurqan, sapanka carretapitaq capitán karqan.

⁸Señor Diostaq Egipto rey Faraonpa sonqonta rumiyaykachirqan, chaymi Israel runakuna allin qhari hina lloqsishaqtinkupas payqa qhepankuta rirqan.

⁹Rey Faraonmi carretapi soldadonkunantin, caballopi soldadonkunantin, chakipi soldadonkunantin, paykunata qatiparqan, hinaspan tariparqan Pi-hahirot qaylla Baal-zefón chimpa Puka Qocha patapi karpakuspa kashaqtinku.

¹⁰Rey Faraonqa Egipto runakunantin qayllaykuqtintaq, Israel runakunaqa qhawarispa rikurqanku Egipto runakunaq qhepankuta hamushasqanta, chaymi sinchita mancharikuspanku Señor Diosman waqyakurqanku.

¹¹Moisestataq nirqanku: —¿Manachu Egipto suyupi aya p'ampanakuna karqan? ¿Imapaqmi kay ch'inneqpi wañuqta pusamuwankiku? ¿Imatan kay hinata ruwaykuwankiku? ¿Imapaqtaq Egipto suyumanta horqomuwankiku?

¹²Egipto suyupiqa nirqaykikutáq: Hinalla Egipto runakunata servichiwayku, nispayku. Aswan allinmi kanman karqan Egipto runakunata serviyniyku kay ch'inneqpi wañunaykumantaqa, nispa.

¹³Moisestaq paykunata nirqan: —Ama mancharikuychischu, hinalla kaychis, kunanmi Señor Diospa qespichinasuykichispaq ruwasqanta rikunkichis, hinan chay Egipto runakunataqa manaña hayk'aqpas rikunkichisñachu.

¹⁴Qankunaqa chayllapi kaychis, Señor Diosmi qankunarayku maqanakunqa, nispa.

¹⁵Chaymantataq Señor Diosqa Moisesta nirqan: —¿Imanaqtintaq waqyakamuwanki? Israel runakunata kamachiy purishanallankupaq.

¹⁶Qantaq tawnaykita hoqarispa qochaman haywariy, hinaspa qochata t'aqarpariy Israel runakuna qocha ukhunta ch'aki hallp'ata hina chimpanankupaq.

¹⁷Ñoqan Egipto runakunaq sonqonta rumiyaykachisaq qhepaykichista haykumunankupaq. Rey Faraonta chakipi soldadonta, carretapi soldadonta, caballopi soldadontapas atipasqaywanmi ñoqaqa hatunchasqa kasaq.

¹⁸Chaymi chay hina kaqtin Egipto runakunaqa ñoqa Señor Dios kasqayta yachanqaku, nispa.

¹⁹Israel runakunaq ñawpaqenta puriq Diospa angelnintaq chay rato kutirimuspa qhepankuta rirqan, hinallataq chay ñawpaqenkuta puriq sayaq phuyupas kutirimuspa qhepankuman sayaykurqan.

²⁰Chay hinapin Egipto runakunawan Israel runakunawan tupaypi qhepakurqan, Egipto runakunapaqtaq phuyutaq tutayaqtaq karqan, Israel runakunatataq ichaqa k'ancharqan. Chay tutan Egipto runakunaqa paykunaman mana qayllaykurqankuchu.

²¹Moisestaq qochaman haywarirqan, hinan Señor Diosqa chay tutantin inti lloqsimuy lado sinchi wayrawan qochata khallarparirqan. Chaymi unuqa iskayman rakikurqan, qochaq pachanpas ch'aki hallp'a kapurqan.

²²Israel runakunataq Puka Qochata ch'akinta chimparqanku, unutaq perqa hina karqan pañankupipas lloq'enkupipas.

²³Rey Faraonpa llapa caballopi soldadonkunataq carretapi soldadonkunapiwan paykunata qatispa kuskan Puka Qochakama haykurqanku.

²⁴Pacha illarimuy qayllatataq Señor Diosqa sayaq ninamanta phuyumantawan Egipto runakunata qhawarirqan, hinaspan paykunata llaksaspa

²⁵carretankuq ruedankunata waqllirqarichirqan, hinan chaykunaqa ñak'ayta muyurqan. Chaymi Egipto runakunaqa ninakurqanku: —Israel runakunamanta ayqesun, Señor Diosmi paykunarayku ñoqanchiswan maqanakun, nispa.

²⁶Señor Diostaq ichaqa Moisesta nirqan: —Makiykita qochaman haywariy, Egipto runakunata, carretankunatapas, caballopi soldadonkunatapas, unu millp'unanpaq, nispa.

²⁷Chaymi Moisesqa makinta qochaman haywarirqan, pacha illarimuytataq qochaqa kaqta kutiykapurqan, Egipto runakuna ayqekushaqtintaq Señor Diosqa qochawan millp'uchirqan.

²⁸Unutaq kutiykapuspa carretakunata, caballopi soldadokunata, Israel runakunaq qhepanta qochaman haykuq rey Faraonpa llapa ejercitontawan millp'uykurqan, manan hukllapas kawsarqanchu.

²⁹Israel runakunataq ichaqa Puka Qocha ukhu ch'akinta chimparqanku, unutaq perqa hina karqan pañankupipas lloq'enkupipas.

³⁰Chay hinatan Señor Diosqa chay p'unchay Israel runakunata Egipto runakunaq makinmanta qespichirqan. Israel runakunataq Puka Qocha patapi Egipto runakunaq ayanta rikurqan.

³¹Paykunan Egipto runakunata ancha atiywan Señor Diospa atipasqanta rikuspa, Señor Diosta manchakurqanku, iñirqankutaq Señor Diospipas kamachin Moisespipas.