Read Quechua Cuzco Bible 1988 ÉXODO 16 Bible Online

ÉXODO 16 - Quechua Cuzco Bible 1988 bible

ÉXODO 16

¹Elimmantataq llapan Israel llaqta puririrqan, hinaspan Elimwan Sinaiwan tupay Sin ch'inneqman chayarqanku. Paykunaqa Egipto suyumanta lloqsimpusqanku qhepatan iskaykaq killaq chunka phisqayoq p'unchayninpi chayarqanku.

²Chay ch'inneqpin llaqtallantin Moisés contra Aarón contra chhuchupakuspanku

³nirqanku: —Allinchá kanman karqan Egipto suyupi Señor Diosqa wañuchiwasunman karqan chayqa, chaypin aychatapas mikhunatapas saksanaykukama mikhurqayku, qankunataq ichaqa kay ch'inneqman pusamuwankiku llapallaykuta yarqaypi wañuchiwanaykikupaq, nispa.

⁴Hinan Señor Diosqa Moisesta nirqan: —Hanaq pachamantan mikhunata parachimusqaykichis. Runakunan sapa p'unchay lloqsinqa, hinaspanmi chay p'unchayllapaq pallanqaku, chaywan yachachikuyniykunaman kasukunkuchus icha manachus chayta yachanaypaq.

⁵Soqtakaq p'unchaypiqa sapa p'unchay pallasqankumantaqa huk chay chhikatawan pallaspanku wayk'ukuchunku, nispa.

⁶Chaymi Moiseswan Aaronwanqa llapa Israel runakunata nirqanku: —Ch'isiyaykuytan yachankichis Señor Diospa Egipto suyumanta pusamusqasuykichista.

⁷Paymi uyarirqan pay contra chhuchupakusqaykichista, chaymi tutamanta rikunkichis Señor Diospa lliphlli-kayninta. Ñoqaykuri, ¿pitaq kayku contraykupi chhuchupakunaykichispaq? nispa.

⁸Moisesqa nillarqantaqmi: —Señor Diosmi uyarirqan pay contra chhuchupakusqaykichista, chaymi mikhunaykichispaq ch'isinman aychata qosunkichis, tutamantataq askha mikhunata qosunkichis. Ñoqaykuri, ¿pitaq kayku? Manan contraykutachu chhuchupakurqankichis, aswanpas Señor Dios contran, nispa.

⁹Chaymantataq Moisesqa Aaronta nirqan: —Llapa Israel llaqtata niy: Señor Diosman qayllaykamuychis, paymi uyarirqan chhuchupakusqaykichista, nispayki, nispa.

¹⁰Llapa Israel llaqtaman Aarón rimaykushaqtintaq llapallanku ch'inneq ladoman qhawarirqanku, hinan Señor Diospa lliphlli-kaynin phuyupi qonqaylla rikhurirqan.

¹¹Señor Diostaq Moisesta nirqan:

¹²—Ñoqan Israel runakunaq chhuchupakusqanta uyarini, paykunata nimuy: Ch'isiyaykuyta aychata mikhunkichis, tutamantataq mikhunata saksanaykichiskama mikhunkichis, ahinapin yachankichis ñoqa Apu Señor Diosniykichis kasqayta, nispayki, nispa.

¹³Chay ch'isinpachataq yuthukuna hamuspa karpa-karpaman wakwaykamurqan, tutamantapaqtaq karpa-karpa muyuriqman sullamusqa.

¹⁴Sulla waksipuqtintaq ch'inneq pampantinpi rikhurirqan qhopaman rikch'akuq p'altachakuna.

¹⁵Chayta rikuspataq Israel runakunaqa imachus kasqanta mana yachaspa, ninakurqanku: —¿Imataq kayri?[6] nispa. Chaymi Moisesqa paykunata nirqan: —Kayqa mikhunaykichispaq Señor Diospa qosqasuykichis t'antan.

¹⁶Kaymi Señor Diospa kamachikusqan: Chayta sapanka pallaychis may chhikatachus mikhunaykichisman hina, hayk'a runachus karpaykichispi kasqanman hina, sapankapaq iskay litro tumpan yaparisqata pallankichis, nispa.

¹⁷Chaymi Israel runakunaqa chay hinata ruwarqanku, wakinmi pallarqanku askhata, wakintaq pisillata.

¹⁸Pallasqankuta tupunapi tupuqtinkutaq mana puchurqanchu askhata pallaqpaqpas, manallataq pisirqanchu pisilla pallaqpaqpas. Sapanka pallakurqan mikhunanpaq hina.

¹⁹Hinamantataq Moisesqa paykunata nirqan: —Manan pipas pallasqanmantaqa paqarisninpaq puchunqachu, nispa.

²⁰Chaypas wakinninkuqa manan Moisesta kasurqankuchu, aswanmi qhepantin p'unchaypaq wakinta puchuchirqanku, ichaqa kururqapuspan asnaripurqan, Moisestaq paykunata phiñarikurqan.

²¹Sapa paqarmi sapanka pallarqan mikhuy atinanta hina, inti q'oñiriqtintaq chullurqapurqan.

²²Soqtakaq p'unchaypitaq tawa litro tumpan yaparisqata sapankapaq pallarqanku, chaymi llapan ayllu uma runakunaqa Moisesman chayta willaq rirqanku,

²³hinan Moisesqa paykunata nirqan: —Kaymi Señor Diospa kamachikusqan: Paqarinqa samana p'unchaymi, Señor Diospaq t'aqasqa samana. Imatapas wayk'unaykichistaqa kunan wayk'uychis, imatapas t'impuchinaykichistaqa kunan t'impuchiychis. Imapas puchuqniykichistataq paqarinpaq waqaychaychis, nispa.

²⁴Chaymi paykunaqa Moisespa kamachikusqanman hina paqarisninpaq waqaycharqanku, manan kururqanpaschu asnarirqanpaschu.

²⁵Hinaqtinmi Moisesqa nirqan: —Kunanqa Señor Diospaq t'aqasqa samana p'unchaymi, chayrayku kunan mikhuychis, manan kunanqa campopi tarinkichischu.

²⁶Soqtantin p'unchaymi pallankichis, qanchiskaq p'unchaytaq ichaqa samana p'unchay, chay p'unchayqa manan imapas kanqachu, nispa.

²⁷Wakinninkutaq qanchiskaq p'unchaypi pallakuq lloqsirqan, manataq imatapas tarirqankuchu.

²⁸Chaymi Señor Diosqa Moisesta nirqan: —¿Hayk'aqkamataq kamachikuyniykunatapas yachachikuyniykunatapas manaqa hunt'ayta munankichischu?

²⁹Uyariychis, ñoqa Señor Diosmi samana p'unchayta churapuykichis, chayraykun soqtakaq p'unchaypiqa iskay p'unchaypaq mikhunata qoykichis. Chhaynaqa, sapanka qanchiskaq p'unchaypi karpanpi kachun, amataq pipas chaymanta lloqsichunchu, nispa.

³⁰Hinan llaqtaqa qanchiskaq p'unchaypi samakurqan.

³¹Israel runakunataq pallasqankuta manná nispa suticharqanku, culantro muhu hinan karqan, yuraqtaq, mielniyoq llaphllallaña t'anta hinataq.

³²Chaymantataq Moisesqa nirqan: —Kaymi Señor Diospa kamachikusqan: Iskay litro tupunaman manná nisqa mikhunata hunt'achiychis, hinaspa mirayniykichispaq waqaychaychis, Egipto suyumanta pusamuspay ch'inneqpi qankunaman mikhuchisqay mikhunata rikunankupaq, nispa.

³³Moisestaq Aaronta nirqan: —Mankachata hap'iy, hinaspa chayman iskay litro tumpan yaparisqa manná nisqa mikhunata churaykuy. Chaytataq Señor Diospa qayllanman churaykunki, mirayniykichispaqtaq waqaychakuchun, nispa.

³⁴Hinan Aaronqa Señor Diospa Moisesta kamachisqanman hina mankachata waqaychanapaq kamachikuy simi waqaychana cajaq ñawpaqenman churaykurqan.

³⁵Chhaynatan Israel runakunaqa manná nisqa mikhunata tawa chunka watantin mikhurqanku, runayoq hallp'aman chayanankukama, Canaán suyu qorpaman chayanankukama.

³⁶(Tupuqkuqa iskay chunka litro haykuq efa nisqa tupunapin).