Read Quechua Cuzco Bible 1988 ÉXODO 19 Bible Online

ÉXODO 19 - Quechua Cuzco Bible 1988 bible

ÉXODO 19

¹Egipto suyumanta Israel runakunaq lloqsipusqan kinsakaq killa qallariy p'unchaypin Sinaí ch'inneqman chayarqanku.

²Refidimmanta puririmuspan Sinaí ch'inneqman chayarqanku, chaypin Israel runakunaqa orqo chimpapi karpakurqanku.

³Moisestaq Diosman orqota wicharqan, hinan Señor Diosqa orqomanta waqyamuspa nirqan: —Jacobpa mirayninmanmi nimunki, Israel runakunamanmi willamunki:

⁴Qankunan rikurqankichis imatachus Egipto runakunata ruwasqayta, imaynatachus ankaqa chiwchinkunata raphranpi q'epin chay hinata qankunata hoqarikampuspa apakampusqayta.

⁵Kunanqa, kasuwaspaykichis rimanakusqaytapas hunt'ankichis chayqa, qankunan llapa llaqtakunamanta aswan chaniyoq llaqtay kankichis, ñoqaqmi lliw kay pachantinqa.

⁶Qankunan kamachinay sacerdotekuna kankichis, ñoqapaq t'aqasqa llaqta, nispayki. Chay simikunatan Israel runakunaman nimunki, nispa.

⁷Hinan Moisesqa rispa llaqta kurak runakunata waqyamurqan, hinaspan payman Señor Diospa tukuy kay kamachimusqankunata paykunaman willarqan.

⁸Hinaqtinmi llapallanku huk-nisqalla kutichispa nirqanku: —Señor Diospa tukuy kamachikusqantan ruwasaqku, nispa. Moisestaq Señor Diosman willamurqan runakunaq rimarisqanta.

⁹Señor Diostaq Moisesta nirqan: —Ñoqan ati-phuyupi hamusqayki, qanwan rimashaqta runakuna uyarinanpaq, ahinapi tukuy tiempo creenasuykikupaq, nispa. Moisestaq runakunaq rimarisqanta Señor Diosman willamurqan.

¹⁰Chaymi Señor Diosqa payta nirqan: —Rispa kunantawan paqarintawan paykunata ch'uyanchachimuy, p'achankutapas t'aqsakuchunku,

¹¹hinaspa minchhapaq wakichikuchunku, chay p'unchaytan ñoqa Señor Diosqa lliw runakuna rikushaqtin Sinaí orqo pataman uraykamusaq.

¹²Orqo muyuriqmantaq qorpata churanki ama runa pasamunanpaq, hinaspa nimunki: Paqtataq orqota wichawaqchis, orqo k'uchutapas tupaykuwaqchis, pipas tupaykuqqa wañunqapunin.

¹³Ichaqa aman pipas chay tupaykuq runataqa llamiykunqachu, aswanpas ch'aqesqa otaq wach'isqa wañunqa, animalpas kachun runapas kachun, manan kawsanqachu, nispayki. Aysarisqata pututu waqaqtinmi orqota wicharimunqaku, nispa.

¹⁴Moisesmi orqomanta runakunaq kasqanman uraykamuspa paykunata ch'uyanchachirqan. Runakunan p'achankuta t'aqsakurqanku.

¹⁵Hinan Moisesqa paykunata nirqan: —Minchha p'unchaypaq wakichikuychis, warmiykichismanta chikikuychis, nispa.

¹⁶Kinsakaq p'unchay illarimuqtintaq lliphllikimurqan, q'aqyaqemurqan, orqo patamanpas manchay yana phuyu tiyaykamurqan, pututuq aysarispa waqasqantaq karpakunapi kaq llapa runata khatatatachirqan.

¹⁷Moisestaq runakunata karpa-karpa hawaman pusarqan Dioswan tinkunankupaq, hinaspan orqo k'uchupi sayaykurqanku,

¹⁸Sinaí orqontinmi q'osñirirqan Señor Dios chay orqoman ninapi uraykamusqanrayku, q'osñitaq horno q'osñi hina wicharirqan, orqopas llapallanmi manchanata chhaphchikurqan.

¹⁹Pututu aswan-aswanta waqashaqtinmi, Moisesqa rimasharqan, Diostaq kutichimusharqan.

²⁰Señor Diosmi Sinaí orqo pataman uraykamurqan, hinaspan chay orqo pataman wichananpaq Moisesta waqyamurqan, chaymi Moisesqa wicharqan.

²¹Señor Diostaq payta nirqan: —Uraykuy, runakunata kamachimuy, paqtan rikuwayta munaspanku qorpata pasamunkuman, hinaspa askha wañunkuman.

²²Qayllaykamuwaqniy sacerdotekunapas ch'uyanchakullachunkutaq, ama paykunata wañuchinaypaq, nispa.

²³Moisestaq Señor Diosta nirqan: —Llaqtaqa manan wichamunqachu kay Sinaí orqoman, qanmi kamachiwarqankiku: Orqopi qorpata churaychis, hinaspa ñoqapaq ch'uyatapuni qhawaychis, nispayki, nispa.

²⁴Señor Diostaq payta nirqan: —Uraykuy, hinaspa Aaronpiwan wichamunki. Sacerdotekunawan llaqtawantaq ichaqa ama wichamuwanankupaq qorpata pasamuchunkuchu, paqtan paykunata wañurqarichiyman, nispa.

²⁵Hinan Moisesqa uraykuspa chayta Israel runakunaman willarqan.