Read Quechua Cuzco Bible 1988 ÉXODO 24 Bible Online

ÉXODO 24 - Quechua Cuzco Bible 1988 bible

ÉXODO 24

¹Señor Diosmi Moisesta nirqan: —Maypichus kashasqayman wichamuy, qanpas, Aaronpas, Nadabpas, Abiupas, Israel qanchis chunka kurak runakunapiwan, karumantataq qonqorikamuwanqaku.

²Qanllan asuykamuwanki, hukkunaqa aman asuykamuwanqakuchu, llaqtapas aman qanwanqa wichamunqachu, nispa.

³Chaymantataq Moisesqa rirqan hinaspan Señor Diospa llapa kamachikuy siminkunatapas chaninchayninkunatapas llaqtaman willarqan. Chaymi llaqtallantin huk-nisqalla rimarirqan: —¡Señor Diospa llapa kamachikusqantan hunt'asaqku! nispa.

⁴Hinan Moisesqa Señor Diospa llapa kamachikusqanta qelqarqan. Tutamanta sayarispataq altarta orqo k'uchupi perqarqan, hinallataq chunka iskayniyoq rumikunatapas sayachirqan, Israelpa chunka iskayniyoq ayllunman hina.

⁵Hinaspan waynakunata kacharqan, paykunan Señor Diosman haywarqanku ruphachina sacrificiokunata, sumaq kawsaypaq sacrificio haywana torokunatapas.

⁶Moisesmi kuskan yawarta hoqarispa puruñakunaman hich'aykurqan, huk kuskan yawartataq altarman hich'aykurqan.

⁷Chaymantataq Rimanakuy Qelqata hap'ispa llaqta uyarishaqtin leerqan, hinan llaqtaqa nirqan: —Señor Diospa tukuy imaymana kamachikusqantan hunt'asaqku kasusaqku, nispa.

⁸Chaymi Moisesqa runakunata yawarwan ch'aqchuspa nirqan: —Tukuy chay simikunaman hinan Señor Diosqa qankunawan rimanakun, kay yawarmi rimanakuyta cheqaqchan, rimanakuy yawar kaspa, nispa.

⁹Moisestaq orqoman wicharqan Aaronwan, Nadabwan, Abiuwan, Israel qanchis chunka kurak runakunapiwan.

¹⁰Chaypin Israelpa Diosninta rikurqanku, chaki sarunanpin karqan q'oyu umiña mast'asqa hina, hanaq pacha hina “ch'ak” nisqa,

¹¹ichaqa manan kay akllasqa Israel runakunata Diosqa imanarqanpaschu. Paykunan Diosta rikurqanku, hinaspan mikhurqanku ukyarqanku.

¹²Señor Diosmi Moisesta nirqan: —Orqoman wichamuy, chaypi suyamuway, p'alta rumikunatan qomusqayki, chaykunapin qelqani kamachikuy simikunatapas yachachikuykunatapas Israel runakunata yachachinapaq, nispa.

¹³Hinan Moisesqa yanapaqnin Josuewan sayarispa Diospa orqonman wicharqan.

¹⁴Kurak runakunatataq Moisesqa nirqan: —Kutimunaykama kaypi suyashawankiku. Kaypin qankunawan qhepashan Aaronwan Hurwan, piqpapas ima sasachaypas kaqtinqa, paykunaman qayllaykuchun, nispa.

¹⁵Hinaspan Moisesqa orqoman wicharqan, phuyutaq orqota pakaykurqan.

¹⁶Señor Diospa lliphlli-kaynintaq Sinaí orqo pataman tiyaykamurqan, soqta p'unchaynintintaq orqota phuyuykurqan. Qanchiskaq p'unchaytataq Señor Diosqa phuyu ukhumanta Moisesta waqyamurqan.

¹⁷Señor Diospa lliphlli-kaynintaq rawrashaq nina hina Israel runakunaman orqo patapi rikhurirqan.

¹⁸Moisesmi phuyu ukhuman haykurqan, hinaspan orqo pataman wicharqan, chaypin payqa tawa chunka p'unchayta tawa chunka tutatawan qhepakurqan.