Read Quechua Cuzco Bible 1988 ÉXODO 3 Bible Online

ÉXODO 3 - Quechua Cuzco Bible 1988 bible

ÉXODO 3

¹Madián suyupi sacerdote suegron Jetroq ovejankunata michishaspataq, Moisesqa ovejata ch'inneq chimpaman qatiykurqan, hinaspa chayarqan Diospa orqon Horebkama.

²Señor Diospa angelninmi Moisesman rikhurirqan t'ankar sonqo nina rawraypi. Paytaq qhawarispa rikurqan t'ankarpa rawrashaspa mana ruphasqanta.

³Hinaqtinmi Moisesqa nirqan: ¡Musphanamá kayqa! Risaq, qhawamusaq imanaqtinchus haqay t'ankarta mana ruphasqanta yachanaypaq, nispa.

⁴Qhawananpaq pay qayllaykusqanta Señor Diosqa rikuspataq, t'ankar ukhumanta waqyamurqan: —¡Moisés! ¡Moisés! nispa. Paytaq kutichirqan: —Uyarishaykin, nispa.

⁵Hinan Señor Diosqa nirqan: —Sayashasqayki cheqasqa ch'uyan, chayrayku ama asuykamuychu, aswanpas usut'aykita ch'utikuy.

⁶Ñoqan kani taytaykiq Diosnin, hinallataq Abrahampa, Isaacpa, Jacobpa Diosnin kani, nispa. Chaymi Moisesqa Diosta qhawariyta manchakuspa uyanta qataykukurqan.

⁷Señor Diosqa nillarqantaq: —Rikunipunin llaqtaypa Egipto suyupi muchushasqanta, uyarinin mit'ani oficialninku hawa waqyakamusqankuta, yachanipunin ñak'arishasqankutapas.

⁸Egipto runakunamanta kacharichiqmi uraykamuni. Paykunatan chay suyumanta horqospa allinkaq hatunkaq hallp'aman pusasaq, imaymanaq hunt'asqa wiñanan hallp'aman. Chaypin tiyan Canaán runakuna, Het runakuna, Amor runakuna, Fares runakuna, Hiv runakuna, Jebus runakunapas.

⁹Kayqa Israel runakunaq waqyakamusqantan uyarini, rikullanitaqmi Egipto runakunaq sinchi muchuchisqantapas.

¹⁰Chayrayku rey Faraonman riy, paymanmi kachasqayki Egipto suyumanta Israel llaqtayta horqomunaykipaq, nispa.

¹¹Moisestaq ichaqa Diosta nirqan: —¿Pitaq ñoqari kani rey Faraonman rispa Israel runakunata Egipto suyumanta horqomunaypaq? nispa.

¹²Chaymi Diosqa nirqan: —Qanwanmi ñoqa kasaq. Egipto suyumanta llaqtayta horqoqtiykin, kay orqopi yupaychawankichis, chaywanmi ñoqaq kachasqayta yachanki, nispa.

¹³Moisestaq Diosta nirqan: —Israel runakunaq kasqanman rispay: Machulaykichiskunaq Diosninmi qankunaman kachamuwan, niqtiyqa: ¿Imataq sutinri? niwanqakun. Hinari, ¿ima nisaqtaq paykunata? nispan.

¹⁴Diostaq Moisesman kutichirqan: —Ñoqan kani ñoqaqa. Israel runakunata ninki: “Ñoqan kani” nisqa sutiyoqmi qankunaman kachamuwan, nispayki, nispa.

¹⁵Diosqa Moisesta nillarqantaq: —Kay hinatan Israel runakunata ninki: Señor Diosmi machulaykichiskunaq Diosnin, Abrahampa, Isaacpa, Jacobpa Diosninmi qankunaman kachamuwan, nispayki. Kay sutiymi wiñaypaq, kay sutiywanmi wiñay-wiñaypaq reqsiwanqaku.

¹⁶Rispayki Israel kurak runakunata huñumuy, hinaspa paykunata niy: Señor Diosmi, machulaykichiskunaq Diosnin, Abrahampa, Isaacpa, Jacobpa Diosninmi rikhurimuwarqan. Paymi nisunkichis: Cheqaqtapunin qhawamurqaykichis, rikurqanitaq Egiptopi imanasqasuykichistapas.

¹⁷Ñoqan Egipto suyupi ñak'arisqaykichismanta horqonaypaq prometekuykichis, hinaspaymi imaymanaq hunt'asqa wiñanan hallp'aman pusasqaykichis. Chaypin tiyan Canaán runakuna, Het runakuna, Amor runakuna, Fares runakuna, Hiv runakuna, Jebus runakunapas, nispan, nispayki.

¹⁸Simiykitaqa uyarinqakun, hinan Israel kurak runakunawan Egipto suyu reypata rispayki ninki: Hebreo runakunaq Diosnin Señormi rikhurimuwarqanku. Chaymi kunan valekuykiku ch'inneqta kinsa p'unchay puriyta rinaykupaq, Apu Señor Diosniykuman sacrificiokunata haywamunaykupaq, nispayki.

¹⁹Ichaqa Egipto suyu reyqa manan rinaykichista munanqachu mana sinchi mat'isqaqa. Chaytaqa yachanin,

²⁰chaymi atiyniywan imaymana musphanakunata chaypi ruwaspa Egipto runakunata hasut'isaq, chayraqmi ripunaykichispaq kacharipusunkichis.

²¹Ñoqataq Egipto runakunawan sumaqta qhawarichisqaykichis, lloqsishaspaykichisqa imallantinpas ripunaykichispaq.

²²Sapanka warmin mañakunqa wasi-masinmantapas qorpanmantapas qolqe alhajakunata, qori alhajakunata, p'achakunatapas, chaykunawanmi p'achaykuchinkichis churiykichistapas ususiykichistapas, ahinatan Egipto runakunata llat'anankichis, nispa.