Read Quechua Cuzco Bible 1988 ÉXODO 30 Bible Online

ÉXODO 30 - Quechua Cuzco Bible 1988 bible

ÉXODO 30

¹Ruwallankitaqmi acacia kurkumanta altarpaqpas, inciensota ruphachinapaq.

²Wask'anpas anchonpas kuskan metrokaman kanqa, sayaynintaq huk metro. Esquina waqrankunaqa kikillanmantan kanqa.

³Hinamantataq patantapas, muyuriq qhatantapas, waqrankunatapas ch'uya qoriwan qatanki, muyuriq patantataq qoriwan ribetenki.

⁴Iskay qori argollatapas churallankitaqmi ribeteq uranpi, sapanka ladoman iskaytakama, chaykunatan wantunapaq k'aspikunaqa suskhunqa.

⁵Suskhuq k'aspikunataqa acacia kurkumantan ruwanki, hinaspan qoriwan k'uyunki.

⁶Kamachikuy simiyoq caja pata hucha pampachana cheqaspin qanwan tupasaq, chaypa ñawpaqen chimpa cortinaq huk ladonpi chay altarta churanki.

⁷Aaronmi sapa paqar lamparakunata allichaspa, chay altar patapi q'apaq inciensota ruphachinqa.

⁸Rasphiyaykuyta lamparakunata Aarón hap'ichiqtinmi inciensoqa ruphachikullanqataq. Kayqa ñawpaqeypi ruwakullanqapunin.

⁹Aman chay altarpiqa wak inciensotapas, ruphachina sacrificiotapas, ruru ofrendatapas, vino hich'ana ofrendatapas haywankichu.

¹⁰Kay altarqa ñoqa Señor Diospaqpunin ch'uyay-ch'uya kanqa. Huchakunata pampachakunanpaq sacrificasqaq yawarnintan Aaronqa watapi huk kutillata waqrakunaman llusiykuspa, altarta ch'uyanchanqa. Chay hinatan sapa watallapuni ruwakunqa, nispa.

¹¹Señor Diosmi Moisesta nirqan:

¹²—Israel runakunata yupaqtiykiqa, sapanka yupasqan pay kikin mana wañunanpaq qolqeta pagawanqa, chay hinapin runa yupakushaqtin mana paykuna ukhupi wañuray kanqachu.

¹³Llapa yupasqan ñoqaman qowanqa phisqa gramo qolqeta, chay phisqa gramo qolqeqa yupaychana wasipi tupunaman hina tupukunqa.

¹⁴Pipas iskay chunka watayoqmanta wichayman yupasqan, ñoqaman chay ofrendata qowanqa.

¹⁵Qankuna kikiykichis mana wañunaykichispaq ñoqaman qowashaspaqa, manan qhapaqpas phisqa gramomanqa yapaykunqachu, manan wakchapas phisqa gramomantaqa pisiyachinqachu.

¹⁶Israel runakunamantan kikinku mana wañunankupaq qosqanku qolqeta chaskinki, hinaspa chayta Dioswan Tupana Karpapi yupaychaypaq qonki. Chaywanmi ñoqaqa Israel runakunata yuyarisaq, hinallataq kikinku mana wañunankupaq qolqe qowasqankutapas, nispa.

¹⁷Señor Diosmi Moisesta nirqan:

¹⁸—Ruwallankitaqmi maqchikunapaq bronce puruñatapas kaq broncellamantataq tiyanayoqta. Hinaspan chayta unuyoqta churanki Dioswan Tupana Karpawan kanchapi kaq altarwan tupaypi.

¹⁹Chay unuwanmi Aaronpas churinkunapas makinkuta chakinkutawan maqchikunqaku.

²⁰Chay unullawantaqmi maqchikunqaku Karpaman haykuspankupas, haywanapaq altarman asuykuspankupas, ñoqapaq ruphachina ofrendata kananankupaqpas. Chay hinapin mana wañunqakuchu.

²¹Mana wañunankupaqmi makinkuta chakinkuta maqchikunqaku. Kay kamachikuy simitan Aaronpas churinkunapas hunt'ashallanqakupuni, nispa.

²²Señor Diosmi Moisesta nirqan:

²³—Sumaq q'apaqkunata akllay: Yupaychana wasipi tupunaman hina tupusqata soqta kilo allinnin mirrata, kinsa kilo q'apaq canelata, kinsa kilo q'apaq cañata, soqta kilo casiatapas, tawa litro olivo aceitetawan.

²⁵Chaykunamantan ch'uya hawina aceiteta ruwanki, hawinakunata ruwaqpa ruwasqanta hina. Chay aceiten ch'uya hawina aceiteqa kanqa.

²⁶Chay aceitetan Dioswan Tupana Karpaman hich'aykunki, kamachikuy simiyoq cajamanpas,

²⁷mesamanpas tukuy imaymananmanwan, candeleromanpas tukuy imaymananmanwan, incienso ruphachina altarmanpas,

²⁸sacrificio ruphachina altarmanpas tukuy imaymananmanwan, tiyanayoq puruñamanpas.

²⁹Chay hinatan chaykunata ch'uyanchanki, hinan ch'uyallaña kanqa. Imallapas chaykunaman tupaykuqqa Diospaq t'aqasqan kapunqa.

³⁰Aarontapas churinkunatapas chay aceitewan hawiykuspan sacerdotey kanankupaq t'aqapuwanki.

³¹Israel runakunatan ninki: Kay aceite hina ch'uya hawina aceiteyqa kashallanqapunin.

³²Aman wak runataqa hawinkichischu, aman chay ruwasqata hinapas wak aceiteta ruwankichischu. Chayqa ch'uyan, ch'uyallatataqmi chayta qhawankichis.

³³Pipas chay aceiteta hina ruwaqqa, otaq pi wak runatapas chaywan hawiykuqqa, llaqtanmantan wikch'usqa kanqa, nispayki, nispa.

³⁴Señor Diosmi Moisesta nirqan: —Sumaq q'apaqkunata chay chhikatakama huñuy: Estacteta, ch'uruchata, galbanota, ch'uya inciensotawan.

³⁵Hinaspan chaykunamanta kachichasqata allin chhaqrusqata Diospaq ch'uya inciensota ruwanki, hawinakunata ruwaqpa ruwasqanta hina.

³⁶Wakintan allin ñut'uta kutanki, hinaspan chayta churanki Dioswan Tupana Karpapi kaq kamachikuy simiyoq cajaq ñawpaqenpi, maypichus qanwan tupasaq chaypi. Chay inciensotaqa ch'uyallatañan qhawankichis.

³⁷Chay ruwasqayki inciensota hinaqa aman waktaqa chay kikillanta ruwakunkichischu. Chayqa ñoqaqmi, qanpaqtaq ch'uya kanqa.

³⁸Pipas q'apachikunanpaq chay hinata ruwanqa chayqa, llaqtanmantan wikch'usqa kanqa, nispa.