Read Quechua Cuzco Bible 1988 ÉXODO 31 Bible Online

ÉXODO 31 - Quechua Cuzco Bible 1988 bible

ÉXODO 31

¹Señor Diosmi Moisesta nirqan:

²—Ñoqan Judá ayllumanta Hurpa churin Uriq churin Bezaleelta akllani,

³hinaspan Espirituywan hunt'aykuni, yachaywan, yuyaywan, reqsiywan, tukuy ruway atiywan,

⁴qoripi, qolqepi, broncepi llank'ananpaq seq'ekunata kamarinanpaq,

⁵umiña rumikunata thupaspa ch'olqochinanpaq, kurkuta llaqllananpaq, tukuy imaymanata llank'ananpaq.

⁶Ñoqan Dan ayllumanta yanapaqninta churani Ahisamakpa churin Aholiabta. Llapan artesanokunatataq yachachini tukuy imaymanata qanman kamachisqayta ruwanankupaq:

⁷Dioswan Tupana Karpata, kamachikuy simiyoq cajata, caja kirpanata, karpapi tukuy imaymanatawan,

⁸mesata imaymanantinta, ch'uya qorimanta candelerota tukuy imaymanantinta, incienso ruphachina altarta,

⁹sacrificio ruphachina altarta tukuy imaymanantinta, tiyanayoq puruñata,

¹⁰sacerdote Aaronpa pallayniyoq ch'uya p'achankunata, sacerdote kanankupaq churinkunaq p'achankunata,

¹¹hawina aceiteta, Ch'uya Cheqaspaq q'apaq inciensotawan. Tukuy imatapas qanman kamachisqayta hinan ruwanqaku, nispa.

¹²Señor Diosmi Moisesta nirqan:

¹³—Qanmi Israel runakunata nimunki: Señor Diosmi nin: Qankunaqa samana p'unchayniykunata waqaychankichispunin, chayqa wiñay-wiñaypaq ñoqawan qankunawan señalmi, ñoqa Señor Dios qankunata akllakusqayta yachanaykichispaq.

¹⁴Samana p'unchaytan waqaychankichis, chaytan ñoqapaq t'aqasqata qhawankichis. Chay p'unchayta sarunchaqqa wañuchisqapunin kanqa, pipas chay p'unchaypi imatapas llank'aqqa wañuchisqapunin kanqa.

¹⁵Soqta p'unchaymi llank'akunqa, qanchiskaq p'unchaytaqmi ñoqa Señor Diospaq t'aqasqa hatun samana p'unchay kanqa. Pipas chay p'unchaypi llank'aqqa wañuchisqapunin kanqa.

¹⁶Israel runakunan samana p'unchayta waqaychanqaku, mana qonqaspan waqaychashallanqakupuni wiñaypaq rimanakuyta hina.

¹⁷Chayqa ñoqawan Israel runakunawan wiñaypaq señalmi. Soqta p'unchaymi ñoqa Señor Diosqa hanaq pachatapas kay pachatapas ruwarqani, qanchiskaq p'unchaytaqmi mana llank'arqanichu aswanpas samakurqanin, nispa, nispayki.

¹⁸Sinaí orqopi Moiseswan rimayta tukuspataq, Señor Diosqa dedonwan qelqasqa kamachikuy simiyoq iskay p'alta rumita Moisesman qorqan.