Read Quechua Cuzco Bible 1988 ÉXODO 38 Bible Online

ÉXODO 38 - Quechua Cuzco Bible 1988 bible

ÉXODO 38

¹Ruwallarqantaqmi acacia kurkumanta ruphachina sacrificiopaq altartapas. Tawantin lado iskay metro iskay chunka phisqayoq centímetro karqan, tawa esquinayoq, sayaynintaq huk metro iskay chunka phisqayoq centímetro karqan.

²Tawantin esquinanpin huk waqratakama ruwarqan, tawantinmi altarwan kuskalla karqan. Altartataq bronce llaphllawan mast'arqan.

³Hinallataqmi tukuy imaymanatapas broncemanta altarpaq ruwarqan: uspha mankakunatapas, palakunatapas, puruñakunatapas, trinchekunatapas, sansa apanakunatapas.

⁴Ruwallarqantaqmi altarpaqqa huk bronce rejillatapas, hinaspan chayta altar ukhupi chakarqan, chay hinapin rejillaqa altar chawpipi chakarayarqan.

⁵Bronce rejillaq tawantin esquinanpaqtaq tawa argollata ruwarqan, wantuna k'aspikunata suskhuchinapaq.

⁶Hinallataqmi suskhuq k'aspikunataqa acacia kurkumanta ruwarqan, hinaspan chaykunata bronce llaphllakunawan k'uyurqan.

⁷Chay k'aspikunataqa suskhuchirqan altarpa iskaynin qhatanpi kashaq argollakunantan, altarta wantunapaq. Altartaqa tablamantan ch'usaq ukhuyoqta ruwarqan.

⁸Ruwallarqantaqmi bronce puruñatapas kaq broncellamantataq tiyanayoqta. Dioswan Tupana Karpa punkupi serviq warmikunaq espejonmantan chayta ruwarqan.

⁹Ruwallarqantaqmi kanchatapas. Kanchaq uray kinrayninqa ñañuy-ñañu lino tawa chunka phisqayoq metro cortinakunayoqmi karqan.

¹⁰Iskay chunkan k'aspikunaqa karqan qolqewan chumpisqakama iskay chunka bronce sayanayoqkama, chay k'aspikunapaq ganchokunapas qolqemantan karqan.

¹¹Kanchaq wichay kinrayninpas tawa chunka phisqayoq metro cortinakunayoqmi karqan, iskay chunka sayaq k'aspikunaqa qolqewan chumpisqakaman karqan iskay chunka bronce sayanayoqkama. Chay k'aspikunapaq ganchokunapas qolqemantan karqan.

¹²Kanchaq inti haykuy kinrayninqa iskay chunka kinsayoq metro cortinakunayoqmi karqan, chunka sayaq k'aspiyoq chunka sayanayoq. Sayaq k'aspikunapaq ganchokunapas chumpikunapas qolqemantan karqan.

¹³Kanchaq inti lloqsimuy kinrayninpas iskay chunka kinsayoq metro cortinakunayoqmi kallarqantaq.

¹⁴Punkuq huknin ladopin qanchis metro cortinakuna karqan, kinsa sayaq k'aspikunayoq kinsa sayanayoq.

¹⁵Hukkaqnin ladopipas qanchis metro cortinakuna karqan, kinsa sayaq k'aspikunayoq kinsa sayanayoq. Iskaynin ladon kaqkama karqan.

¹⁶Llapa cortinan kancha muyuriqpi ñañuy-ñañu linomanta karqan.

¹⁷Kancha llapa sayaq k'aspikunaqa qolqewan chumpisqakaman karqan, sayanankunaqa broncemantan karqan, ganchonkunapas qolqemantan karqan.

¹⁸Kancha punku cortinaqa llawlli-puka, sani-puka, rawraq-puka q'aytumanta, ñañuy-ñañu linomantawan munay pallayniyoq awasqamantan karqan. Wask'anmi isqon metro karqan, anchontaq kancha cortinakuna hina iskay metro iskay chunka phisqayoq centímetro karqan.

¹⁹Tawa sayaq k'aspinmi karqan tawa bronce sayanantin, ganchonkunapas chumpinkunapas qolqemantan karqan. Chay k'aspikunaq umanqa qolqewan ch'ulluchisqan karqan.

²⁰Karpaq takarpunkunapas muyuriq kanchaq takarpunkunapas broncemantan karqan.

²¹Moisesmi kamachikurqan Diospa tiyanan karpata imakunawanchus ruwasqankuta qelqanapaq. Chay karpapin kamachikuy simiyoq iskay p'alta rumi kasharqan. Chaymi Leví runakunaqa sacerdote Aaronpa churin Itamarpa kamachisqan yuparqanku. Kaymi chay qelqasqaqa:

²²Judá ayllumanta Hurpa churin Uriq churin Bezaleelmi tukuy imaymanata ruwarqan, Señor Diospa Moisesman kamachisqanta hina.

²³Paytataq yanaparqan Dan ayllumanta Ahisamakpa churin Aholiab, paymi metalkunapi k'iñaq, seq'ekunata kamariq karqan, llawlli-puka, sani-puka, rawraq-puka q'aytumanta, ñañuy-ñañu linomantawan pallayniyoq awaqpas karqan.

²⁴Karpata ruwanapaq tukuy imaymanata ruwanapaq llapa ofrendasqa qoriqa karqan isqon pachak soqta chunka phisqayoq kilon, yupaychana karpapi tupunapi tupusqaman hina.

²⁵Yupasqa kaq Israel runakunamanta hoqarisqa qolqeqa kinsa waranqa kinsa pachak iskay chunkayoq kilon karqan yupaychana karpapi tupunapi tupusqaman hina.

²⁶Llapa yupasqakunaqa iskay chunka watayoqmanta wichaymanmi karqan soqta pachak kinsayoq waranqa phisqa pachak phisqa chunkayoq runa, sapankan yupaychana karpapi tupunapi kuskan tupusqata qorqan.

²⁷Ofrenda hoqarisqa qolqemanta kinsa waranqa kinsa pachak kilo karqan karpapaqpas cortinapaqpas sayanakunata unuyachinapaq. Chay qolqemantan pachak sayana ruwakurqan, sapanka sayana kinsa chunka kinsayoq kilo qolqemanta karqan.

²⁸Iskay chunka kilo qolqemantan ruwakurqan sayaq k'aspikunaq ganchonkunata chumpinkunatapas, hinallataq k'aspikunaq umantapas chay qolqewan ch'ulluchirqan.

²⁹Ofrendasqa bronceqa iskay waranqa kinsa pachak tawa chunka kilon karqan.

³⁰Chay broncemantan ruwarqan Dioswan Tupana Karpa punkupaq sayanakunata, hinallataq bronce altartapas, bronce rejillantapas, altarpa tukuy imaymanantapas,

³¹kancha muyuriq sayanakunatapas, kancha punku sayanakunatapas, karpapaq llapa takarpukunatapas, kancha muyuriq llapa takarpukunatapas.