Read Quechua Cuzco Bible 1988 JOB 12 Bible Online

JOB 12 - Quechua Cuzco Bible 1988 bible

JOB 12

¹Jobñataq kutichirqan:

²—¡Arí, qankunaqa llaqta taytakunapunin kankichis riki, wañuqtiykichisqa manan ima yachaykunapas kanqachu!

³Ichaqa ñoqapas yuyaynillayoqtaqmi kani, imapipas manan sullk'achu qankunamantaqa kani. ¿Pitaq mana yachanchu lliw chaykunatari?

⁴Diosta waqyakuqtiyqa uyariwarqanmi, chaywanpas amigoykunaqa pukllakuwanmi. Ñoqaqa mana huchachana chaninmi kani, chaywanpas runakunaqa asipayawanmi.

⁵Qhali kashaqkunaqa onqosqataqa pisichanmi, urmaq hina kaqtapas tanqarparinmi.

⁶Suwakunaqa thakmi wasinkupi tiyakushan, Diosta phiñachiqkunapas llakhillan kawsakushan, paykunaqa kallpankumanpunin hap'ipakunku.

⁷Tapukuy uywakunata, paykunan yachachisunki, tapukuy urpikunata, paykunan willasunki.

⁸Tapukuy hallp'a pachata, paymi yachachisunki, tapukuy mama qochapi challwakunata, paykunan willasunki.

⁹Icha, ¿mayqenninkupas kanmanraqchu llapanta Diospa ruwasqanta mana yachaq?

¹⁰Diospa makinpin animalkunaq kawsayninqa kashan, paypa munayninpin runakunaq kawsayninqa kashan.

¹¹Ninriwan uyarispan allinta mana allinta reparan, mikhunata malliykuspan sumaq mana sumaq kasqanta yachan.

¹²¿Kurak taytakunari yachayniyoqchu? Runari, ¿askha watayoq kaspachu yachayniyoq kanman?

¹³Diosllan yachayniyoqpas atiyniyoqpas, paymi yuyaychan, lliwtataq entienden.

¹⁴Diospa thunisqantaqa manan pipas wakmanta perqanmanchu, Diospa wisq'asqantaqa manan pipas kicharinmanchu.

¹⁵Diosmi mana parachinchu, chaymi lliw hallp'a ch'akirqapun, Diosmi parata kacharimun, chaymi lliw hallp'ata llimp'aripun.

¹⁶Diosmi kallpayoqqa paytaqmi imapipas atipaqqa, Diospa munayninpin kashan q'otusqakunapas yukaqkunapas.

¹⁷Diosmi yuyaychaqkunaq umanta muyurichin, chaninchaqkunatapas waq'ayachin.

¹⁸Paymi reykunaq watasqan runatapas kacharichin, reykunatataq kamachiman tukuchin.

¹⁹Sacerdotekunatan mana p'achayoqta aparichin, allin takyasqa atiyniyoqkunatapas kasqanmantan qarqon.

²⁰Lliwpa hap'ipakunan allin kunaykukuqtapas manan rimarichinchu. Allin yuyayniyoq kurak taytakunatapas musphachinmi.

²¹Allin wiraqochakunatapas mana imapaqmi qhawarin, allin kallpayoqkunatapas kallpantan chiriyachin.

²²Mana piqpa rikusqan pakasqakunatapas sut'imanmi horqomun, ch'ampiq laqhakunatapas sut'imanmi tukuchin.

²³Hatun suyukunatapas Diosmi hatunchanpas thuninpas, hatunyachinpas chinkachinpas.

²⁴Kay pachapi uma runakunaq yuyaynitapas qechunmi, ch'inneq ch'usaqpi purishaqtapas tumaqayachinmi.

²⁵Laqha tutayaqpi purishaspan llamipakunku, machasqata hinan thampiykachachin.