Read Quechua Cuzco Bible 1988 JOB 16 Bible Online

JOB 16 - Quechua Cuzco Bible 1988 bible

JOB 16

¹Chaymantataq Jobqa kutichirqan:

²—Askhatañan kikintakama rimasqaykichista uyarini, kusichiwanaykichistaqa ñak'arichiwankichismi.

³¿Mana tukukuqchu kanqa chay yanqa rimayri? ¿Imataq chay hinatari rimachisunkichis?

⁴Qankuna ñoqa hina rikukuwaqchis chayqa, ñoqapas chhaynallatataqmi rimayman, asipayakuq hina umaywan chhaphchipayaykichisman, k'arak simikunawantaq qhansaykuykichisman.

⁵Ñoqaqa kallpachariykichismanmi sumaqta rimaspa, kusirichispan qhaliyarichiykichisman.

⁶Rimaqtiypas manan nanayniyqa thaninchu, ch'inlla kaypas manallataqmi qhaliyachiwanchu.

⁷Diosníy, qanmi kallpayta tukurqospa sayk'uchiwanki, llapan wawaykunatapas lliwta ch'usaqyachipurqanki.

⁸Qanmi kay hina ch'akisqa qawi uyaman tukuchiwanki, chaymi runakuna yuyanku huchaymanta muchusqayta, tulluyayniymi contraypi rimarin.

⁹Diosmi qatiykachashawan, phiñakuspataq llik'irqariwan, león hinan contraypi kiruntaraq k'utupakushan, awqaypas kanman hinan qhawapayashawan.

¹⁰Runakunan contraypi huk hinamanraq tukunku, pisichawaspankun uyaypikama ch'aqlaykuwanku, askha runan contraypi huñuykakamun.

¹¹Diosmi qaraykuwan yana alma runaq makinman, Diosmi wikch'uykuwan awqa sonqo runaq makinman.

¹²Allillanpuni kashawaqtinmi, Diosqa much'uymanta hap'irqowan, q'apirqowaspan ñut'urqapuwan, ñoqamankaman wach'iykushawan.

¹³Tukuy ladoymantan wach'ipayawan, mana khuyapayaykuspan wiksayta sat'irqariwan, hayaqeytaraqmi t'oqyachiwan.

¹⁴K'iriykunatan aswantaraq k'iripaykuwan, maqanakuypi tupaq hinaraqmi phawaykuwan.

¹⁵Llakikuymantan qhasqa p'achawan ukhuyman churaykukuni, kallpa chiriyasqan hallp'api tiyapushani.

¹⁶Waqashaqtiy hinan uyaypas p'aspayan, ñawiypas t'oqoyarqapun.

¹⁷Manan pitapas ima mana chanintapas ruwarqanichu, mañakuyniypas ch'uya yuyaywanmi.

¹⁸Pacha mama, yanqanmanta muchusqayta ama pakaykuychu. ¡Waqyakusqayqa uyarisqapuni kachun!

¹⁹Hanaq pachapiqa kanpunin ñoqamanta rimariq, haqaypiqa kanpunin ñoqamanta sayarikuq.

²⁰Diospa ñawpaqenpi waqashaqtiymi amigoyqa ñoqamanta mañapuwan.

²¹Paymi Diospa ñawpaqenpi hukkunapaq valepakun imaynan huk runa amigonpaq valepakun hinata.

²²Pisi watakunalla kaqpas tukurqakapushanña kunallanmi ripusaq mana kutirqamuqllaña.