Read Quechua Cuzco Bible 1988 JOB 18 Bible Online

JOB 18 - Quechua Cuzco Bible 1988 bible

JOB 18

¹Bildadñataq kutichirqan:

²—¿Hayk'aqkamataq manari upallankichu? Chaninchasqata rimaqtiykiqa rimaysiykikumanmi.

³¿Imanaqtintaq uywata hinari qhawariwankiku? ¿Waq'amantaraqtaq qhawaykuwankikupas?

⁴¿Yuyankichu renegasqa pilapakuqtiyki kay pacha qanpaq ch'usaqyananta, qaqakunapas tiyasqanmanta anchhurinanta?

⁵Millay runaqqa k'anchayninpas phukusqan kanqa, q'onchanpi ninapas manan rawranqachu.

⁶Karpanpi k'anchaqpas tutayapunqan, ladonpi lamparanpas wañupunqan.

⁷Allintan sarurqan, kunantaq yanqallaña, pay kikinpa yuyaykusqanwanmi urmaykapun.

⁸Pay kikinpa chakinmi llukuman aysaykun, chay llukupitaqmi mayt'usqa rikukun.

⁹Chaki talonninmanta huk toqlla hap'irqon, chaytaqmi allintapuni kanirqon.

¹⁰Ñan purinanpin kashan sipita pakasqa, ñan purinanpin kashan huk toqlla churasqa.

¹¹Llapa ladonmantan llaksakuy muyuykun, manchakuymi sapa thaskisqanpi qatiykachan.

¹²Hatun llakin payta suyashan oqorqonanpaq, kumpakuqtinqa hukpaqkamallaña ñit'irqonanpaq.

¹³Onqoyqa pisi-pisimantan aychata mikhun, onqoyqa wañuypa kachapurinmi, chakintan makintan oqon.

¹⁴Wasinpi thak-nisqa tiyasqanmantapas wikch'usqan, manchakuy rey nisqa wañuypa qayllanman aysasqan.

¹⁵Karpantapas ninan ruphaykapun, tiyasqankunapas azufrewan hach'iykusqan.

¹⁶Ch'akisqa saphiyoq mallki hinan, t'awisqa k'allmayoq sach'a hinan.

¹⁷Paymantaqa kay pachapi manan yuyarinkuñachu, manañataqmi sutinpas hoqarisqañachu,

¹⁸k'anchaymantan tutayaqman wisq'aykapunqaku, kay pachamantan qarqopunqaku.

¹⁹Runa ukhupi mirayninpas manan kanqachu, pininpas wasinpiqa manan kawsanqañachu.

²⁰Inti haykuy suyu runakunan chayta yachaspa llaksakunqa, inti lloqsiy suyu runakunan chayta uyarispa q'aqchakunqa.

²¹Chaypin millay runaq kawsayninqa tukukun, chay hinatan Diosta mana reqsiq runaqa tukukun, nispa.