Read Quechua Cuzco Bible 1988 JOB 19 Bible Online

JOB 19 - Quechua Cuzco Bible 1988 bible

JOB 19

¹Jobñataq kutichirqan:

²—¿Hayk'aqkaman ñak'arichiwankichis? ¿Hayk'aqkaman simiykichiswan k'iriwankichis?

³Kuti-kutirisparaq k'amiwankichis, mana p'enqakuspan siminchawankichis.

⁴Ñoqaña huchayoq kayman chaypas, ñoqamanmi huchayqa chayawanqa.

⁵Qankunaqa yuyankichis ñoqamanta aswan allin kasqaykichistan, ñak'arisqayta rikuspan: Huchanmantan muchun, niwankichis.

⁶Allinta yachanaykichispaqpas ñoqataqa Diosmi kumpawan, paypunin llikanwan wisq'aykuwan.

⁷Ñoqaqa qaparini: ¡Mana chanintan ruwashawan! nispaymi, manataq pipas uyariwanchu, mañakuni yanapayta, manataq pipas chaninchawanchu.

⁸Diosmi purinayta wisq'arqowan mana chimpanaypaq, ñanniytapas tutayarqachinmi.

⁹Qhapaq-kayniytapas qechurqapuwanmi, allin qhawarisqa kayniytapas chinkarqachipunmi.

¹⁰Kay hina raqay-raqaypin rikuchiwan, suyakuyniytapas mallkita hinan t'irarqapun.

¹¹Contraypin k'arakta phiñakun, awqanta hinan qhawaykuwan.

¹²Llapan soldadonmi aswan-aswanta qayllaykuwan, karpa qhepaykunapin muyuykuwan, phawaykuwananpaqmi wakiykachikunku.

¹³Diosmi wawqeykunata karunchachiwan, reqsinakuq-masiykunapas karupiñan ñoqamanta kashan.

¹⁴Aylluypas lliwmi ñoqamanta t'aqarikapun, amigoykunapas lliwmi qonqapuwan.

¹⁵Qorpachasqaykunapas wak llaqtayoqta hinan qhawariwan, uywasqay sipaskunapas hawa runata hinan qhawariwan.

¹⁶Uywasqay runata waqyarikuqtiypas manan uyariwanchu, imaymana sumaqta valeykukuqtiypas manan uyariwanchu.

¹⁷Warmiypas simiypa asnasqantan millakun, wawqeykunapaqpas millaytan asnapuni.

¹⁸Erqekunapiwanpas pisicharpariwanmi, hatarishallaqtiyraqmi k'amimushawankuña.

¹⁹Sinchi munasqay reqsisqaykunapas cheqnikapuwanmi, munakusqay kaqkunapas contraypin sayaripunku.

²⁰Aychaypas qaray ukhupin ismupushan, tulluypas kiruy hinañan q'alarqakapushan.

²¹Reqsinakuq-masiykuna, khuyapayaykuwaychisyari, Diosmi makinwan muchuchishawan.

²²¿Imanaqtinmi qankunapas Dios hina qatiykachawankichis? ¿Manachu saksankichis kay hinata khaskarawaspaykichis?

²³¡May allinchá kanman pillapas rimasqayta qelqanman chayqa, huk qelqa k'uyupi seq'enman chayqa!

²⁴¡May kusachá kanman pillapas fierro cincelwan k'awaspa rumipipas titipipas wiñaypaq qelqasqata saqenman chayqa!

²⁵Allintan yachakuni Hark'aykuwaqniy kawsashasqanta, paypunin qhepallataña sayarimunqa ñoqamanta rimariq.

²⁶Hinaña aychay urmaqashaqtin wañupusaq chaypas, ñoqaqa kikiypunin Diosta qhawarisaq.

²⁷Ñoqaqa ñawiywanpunin rikusaq, ñoqapunin, manan hukraqchu. ¡Maytapunin chayta munashani!

²⁸Qankunataqchus ninkichis: ¡Imaynatataq qatiykachasunmanri, pay kikinpin mana allin-kayqa kashan riki! nispa chayqa,

²⁹manchakuychis Diospa ñak'arichinasuykichista, Diosmi phiñakuspa qankuna hina rimaqtaqa muchuchispa wañuchin, chaypin yachankichis chanin juez kasqanta, nispa.