Read Quechua Cuzco Bible 1988 JOB 2 Bible Online

JOB 2 - Quechua Cuzco Bible 1988 bible

JOB 2

¹Señor Diosmanmi angelninkuna huk kutitawan qayllaykurqanku, Satanaspas paykunawan kuska qayllaykullarqantaq.

²Chaymi Señor Diosqa payta nirqan: —¿Maymantan hamushanki? nispa. Satanastaq nirqan: —Kay pachaq k'uchun-k'uchunta purimusqaymantan, nispa.

³Hinan Señor Diosqa tapuykullarqantaq: —¿Kamachiy Jobta qhawarirqankichu? Pay hina chanin runaqa manan kay pachantinpi kanchu. Payqa tukuy sonqonwanmi serviwan, mana allin ruwaymantapas t'aqakunpunin. Hinaña mana ima huchanmanta muchuchinaypaq tanqariwarqanki chaypas, payqa qharipunin iñiyninpi sayan, nispa.

⁴Hinan Satanasqa Señor Diosman kutichirqan: —Manataq cuerponta llamiykullankipaschu, chayllayá allin kashan. Qhali kashaspaqa, tukuy imantapas runaqa chinkachishanqachá, kawsayninta qespichinanraykuqa.

⁵Pay kikinta llamiykuwaq, chayñayá yachawaq imaynataraqchus uyaykipi ñakasunkiman chayta, nispa.

⁶Señor Diostaq kutichirqan: —Chay hinaqa, ima munasqaykita paywan ruway, ichaqa aman wañuchinkichu, nispa.

⁷Satanastaq Señor Diospa qayllanmanta ripurqan, hinaspan Jobpa aycha qaranta sarnaman rikch'akuq millay onqoywan tukurqachirqan uma mukukunmanta chaki puntankama.

⁸Hinan Jobqa ripurqan uspha qontupi tiyakuq, manka p'akisqa k'arpawantaq qhetukurqan.

⁹Warminpas nillarqanraqtaq: —Kay hinataña ñak'arishaspapas, ¿qhariraqtaqchu iñiyniykipi sayashanki? ¡Diosta ñakay, hinaspa wañuy! nispa.

¹⁰Qosan Jobtaq kutichirqan: —¡Yaw warmi, imatan waq'a hina rimanki! Diospa lliw allinkuna qowasqanchista chaskiykunchis, chayri, ¿imaynataq mana chaskillasunmantaqchu mana allinkunatapas? nispa. Chay hinatan Jobqa manapuni imatapas Dios contra rimarqanchu.

¹¹Jobpan karqan kinsa amigonkuna, Temán llaqtayoq Elifaz, Shúa suyumanta Bildad, Naama suyumanta Zofarpiwan. Paykunan Jobta imaymana llakiq qatisqanta yachaspanku wasinkumanta puririrqanku, hinaspan watuykukuq riyta yuyaykurqanku, payta tiyapayaspa nanayninkunamanta kusirichinankupaq.

¹²Jobta qhawarimuspankutaq mana reqsiyta atirqankuchu, chaymi qaparispa waqaykurqanku, llakikuymantataq p'achankutaraq llik'ikurqanku, hallp'atapas hanaqman hach'ispan umankuta hallp'acharqanku.

¹³Chaymantataq onqoqwan kuskapacha pampapi tiyaykurqanku qanchis p'unchay qanchis tutatawan, mana huk simillatapas rimapayaspa, sinchi mana amiy nanayniyoqta reparaspanku.