Read Quechua Cuzco Bible 1988 JOB 20 Bible Online

JOB 20 - Quechua Cuzco Bible 1988 bible

JOB 20

¹Zofarñataq kutichirqan:

²—Umaytan wasapawanki, manan sonqoy tiyanchu, chayraykun kutichisqayki.

³Millayta nispan anyawanki, ichaqa ñoqapas yachanin imayna kutichiyta.

⁴Qanqa yachankipunin ñawpa p'unchaymantapacha, kay pachapi runaq kasqanmantapacha,

⁵millay runaq kusikuyninqa pisi p'unchayllapaq kasqanta, mana allin runaq q'ochukuyninpas huk ratollapaq kasqanta.

⁶Chay runaq hatunchakuyninqa hanaq pachamanraqpas aypachun, phuyumanraqpas uman taripashachun,

⁷qhepamanqa hatun hisp'ay hinan kapunqa, reqsisqankunapas: ¿Maypitaq kapunri? nispan tapukunqa.

⁸Mosqoy hinan pasapunqa, tuta musphay hinan chinkapunqa, manataq pipas tarinqañachu.

⁹Rikuqninkunapas manan rikunqakuñachu, wasinmantapas hukpaqkaman chinkapunqa.

¹⁰Wawankunan wakchakunaman kutichipunqaku, churinkunan taytanpa suwakusqanmanta kutichipunqaku

¹¹Kallpallanpiraq wayna kashaspan hallp'aq sonqonman chinkaykapunqa.

¹²Hinaña mana allinkuna siminpaq sumaq karqan chaypas, hinaña qallunpa pampanpi hap'irqan chaypas,

¹³hinaña siminpi hap'irayarqan chaypas, mana aqtuyta munarqanchu chaypas,

¹⁴mikhusqanqa hayamanmi wiksanpi tukunqa, ch'unchulninpiqa mach'aqwaypa venenonmanmi tukunqa.

¹⁵Llapan oqosqan qhapaq kaykunata aqturqamunqa, wiksanmantan Diosninchis wikch'uchimunqa.

¹⁶Mach'aqwaypa venenontan ch'onqanqa, mach'aqwaypa picasqantaqmi wañunqa.

¹⁷Payqa manan rikunqañachu olivo aceite mayu hinaraq phawaqta, manan rikunqañachu llukllutapas miel misk'itapas mayu hinaraq phawaqta.

¹⁸Llank'asqanwan ima hayk'a tarisqantan llapanta kutichipunqa, qhapaq-kay tarisqantaqa manapunin malliykunqachu.

¹⁹Wakchakunatan sarunchaspa wikch'upurqan, runaq wasinkunatan kaqnichaykukurqan.

²⁰Manan hayk'aqpas yarqayninta thanichikurqanchu, manan pipas hap'ipakusqantaqa qechurqanchu.

²¹Manan imapas oqorqonanmantaqa ayqerqanchu, chayraykun allin-kayninqa mana takyarqanchu.

²²Hunt'asqa imanpas kashaqtinmi hatun llaki taripanqa, imaymana phutikuykunan payta ñit'iykunqa.

²³Wiksanta hunt'achiqtinmi Diospa k'arak phiñakuynin payman aypanqa, parata hinaraqmi phiñakuyninta chayachimunqa.

²⁴Fierro maqanamantaña ayqenqa chaypas, broncemanta p'eqtawanmi ayparqachinqaku.

²⁵Wach'isqataqmi aychantaraq huk ladoman pasarqonqa, chhipipishaq ñawch'inpas rurunnintaraqmi lloqsirqamunqa, chaymi mayta mancharikunqa.

²⁶Manchay laqhayaqmi paypaqqa wakichisqa kashan, Diospa ninanmi payta ruphanqa, payta pulaspapas wasintaraqmi tukunqa.

²⁷Hanaq pachan huchanta q'alarparinqa, kay pachataqmi q'awinanpaq sayarinqa.

²⁸Pay patapi Diospa phiñakuynin llimp'ariqtinqa, wasinpi lliw qhapaq-kayninmi ch'usaqyachisqa kapunqa.

²⁹Chay hinatan Diosqa millay runapaq wakichin, chay hinan Diospa unanchasqan p'uchukayqa, nispa.