Read Quechua Cuzco Bible 1988 JOB 22 Bible Online

JOB 22 - Quechua Cuzco Bible 1988 bible

JOB 22

¹Elifazñataq kutichirqan:

²—Diospaqri, ¿imapaqtaq runari valenman? Yachayniyoqña kaspapas, ¿ima allintaq Diospaqri kanman?

³¿Ima allintaq kanman Tukuy-atiyniyoqpaqri chanin runa kasqaykiri? ¿Ima allintaq kanman Diospaqri mana huchachana kasqaykiri?

⁴¿Qan yuyankichu: Dios sonqo runa kaqtiymi payqa anyawan, chay hawan payqa juzganapi q'awiwan, nispayki?

⁵Manan, huchaykikuna sinchillaña kaqtinmi, millay ruwasqaykikuna umanta wasapaqtinmi, chayta nisunki.

⁶Wawqeykiq p'achantan paganankama yanqa qasi ch'utirqanki, p'achanta ch'utispan q'alallata qatirparipurqanki.

⁷Sayk'usqamanmi unuta mana haywarirqankichu, yarqasqamanmi mikhunatapas mana qoykurqankichu.

⁸Munayniyoq tukuypa k'umuykunan kaspaykin suyuntin hallp'ata hap'ipakurqanki.

⁹Viudakunatan mana imayoqta kacharparipurqanki, wakchakunaqtan kallpanta k'uturqanki.

¹⁰Chaymantan watuchasqa rikukunki, qonqaylla llaksasqa kapushanki.

¹¹Manan imatapas rikupunkichu tutayarqoqtin, manchay suchuq unuq millp'usqanmi rikukunki.

¹²¿Diosqa manachu hanaq pachaq hawanpiraq tiyan? Qhawariy Diosta, imayna altopiña kashan ch'askakuna chaypas, payqa aswan hawanpiraqmi kashan.

¹³Chaytukuywanpas qanqa ninki: ¿Imatan yachan Dios? ¿Phuyuq pakasqan ukhumanta chaninchamunmanchu?

¹⁴Payqa yana phuyu ukhupin kashan, chaymi hanaq pachapi kayneqman haqayneqman purispan mana rikuwanchischu, nispayki.

¹⁵¿Millay mana chanin runakunaq purisqan ñawpa ñantachu kaqta puriyta munanki?

¹⁶Paykunaqa manaraq wañunanpin qonqay wañupurqanku, poqoy mitapi mayuq qhochusqan hina.

¹⁷Paykunaqa Diostan nirqanku: ¡Hatariy ñoqaykumanta! Tukuy-atiyniyoq Dios kaspari, ¿imanawankikumantaq? nispa.

¹⁸Chaywanpas Diosmi wasinkuman imakunapas hunt'achiqqa, ñoqan ichaqa mana chaninkunaq yuyaychayninmanta t'aqakuni.

¹⁹Millay runakunaq ñak'arisqanta rikuspan chaninkunaqa kusikunku, mana huchachanakunapas paykunata asipayaspan ninku:

²⁰¡Cheqaqtapunin awqanchisqa thunisqa kashan! ¡Ninan qhapaq-kayninta ruphaykapun! nispa.

²¹Wakmanta Dioswan allipunay, chay hinapin wakmanta t'ikarinki.

²²Chaskillay paypa yachachisqanta, umaykipi hap'iqay siminkunata.

²³Tukuy-atiyniyoq Diosman kutirispan wakmanta sayarinki: Wasiykimantachus mana allin kayta wikch'unki,

²⁴qoriykitachus q'opaman wikch'upunki, chaninniyoq qoriykitachus mayuman hich'aykunki chayqa,

²⁵Tukuy-atiyniyoq Diosmi qoriyki hina kanqa, paymi allinnin qolqeyki hina kanqa.

²⁶Paymi kusikunayki kanqa, sonqopas-sonqotaq hap'ipakunki.

²⁷Imatapas mañarikuqtiykiqa paymi uyarisunki, qanpas ima rimarisqaykitapas hunt'anki.

²⁸Ima yuyaykusqaykipipas allinkaman kasunki, ñanniykipipas ima sumaqtan k'ancharisunki.

²⁹K'umuchisqa kashaqta rikuspan qanqa ninki: Sayarichiy, nispa, hinan Diosqa qespichinqa chay k'umuchisqata.

³⁰Qanpa ch'uya kasqayki hawan huchayoq runatapas Diosqa horqonqa, nispa.