Read Quechua Cuzco Bible 1988 JOB 24 Bible Online

JOB 24 - Quechua Cuzco Bible 1988 bible

JOB 24

¹¿Imaraykun Tukuy-atiyniyoqqa taripanan p'unchaykunata mana willakunchu? ¿Imaraykun Diosta reqsiqkunaqa taripanan p'unchaykunata yanqa suyanku?

²Millay runakunaqa chakraq qorpantan suchurichinku, ovejakunatapas suwakuspan michinku.

³Mana tayta-mamayoqpa asnontapas qechunkun, viudaq torontapas paganankaman hap'inku.

⁴Wakchakunatan mana uyariq tukunku, pisi kawsay runakunan paykunamanta pakakun.

⁵Mana imayoqkunan k'ita asnokuna hina lloqsinku ch'in pampapi sinchi sasawan mikhunanku maskhaq, chay ch'inneqmantan wawankupaq mikhunata tarimunku.

⁶Wak chakrakunamantan chhoqollukunata pallakamunku, mana chaninkunaq uvas chakrankunamantan qhellakamunku.

⁷Tutan paqarinku q'alalla mana qatanayoq kaspa, manan imallankupas kanchu chirimanta hark'aykuqninku.

⁸Orqopi parawanmi lliwta hallch'uchakunku, qaqallatan oqllaykunku pakakunata maskhaspanku.

⁹Viudamantan wawanta ñuñukushaqtin qechunku, wakchakunaq qholla wawantan manumanta paganankama qechunku.

¹⁰Wakchakunaqa q'alallañan purinku, trigo q'epiykusqan yarqaymanta wañushanku.

¹¹Olivos sach'akuna chawpipin aceiteta ch'irwanku, uvastan sarunku vinota ruwakunankupaq, chaywanpas ch'akiymantan wañushanku.

¹²Llaqtaq karunmanraqmi uyarikun wañunayaqkunaq anchisqan, k'irisqakunan waqyakunku yanapaykunapaq. Diostaq ichaqa chay mana allinkunata qhawarparillan.

¹³Wakinkunan k'anchayta cheqnikunku, mana entiendespan k'anchaymanta t'aqakunku.

¹⁴Runa wañuchiqqa tutayaykuqtinmi puñunanmanta sayarin, hinaspan wakchata mana imayoqtawan wañuchin, tutataq suwakuqñataq puririn.

¹⁵Qhellipi puriq runaqa tutayaykunantan suyakun, uyantapas allintan pakaykukun: Chay hinapiqa manan pipas rikuwanqachu, nispa.

¹⁶Suwakunaqa tutan wasikunaman winaykukun, ch'isiyaq p'unchaytaq ichaqa wasinkupi wisq'arayanku, p'unchaytaqa manan rikuytapas munankuchu.

¹⁷Paykunapaq p'unchayqa laqhayaq tuta hinan, aswantaqa munanku tutaq manchay ch'ampiqyaynintan.

¹⁸Millay runaqa mayu phosoqo hinan, hallp'anpas ñakasqan kapun, manataq pipas llank'anñachu uvas chakrantaqa.

¹⁹Chiraw mita ruphaymi rit'itaqa chulluchin, chay hinallatataqmi huchasapataqa Wañuy-pachapas chinkachin.

²⁰Kikin mamanpas paymantaqa qonqapunmi, kurukunan misk'itaraq paytaqa mikhuykapun, manan pipas millay runamantaqa yuyarikunñachu, mallki wit'usqa hinan payqa kumpakapun.

²¹Mana wachakuq warmitan millayta rikurqan, viuda warmitan mana khuyapayarqanchu.

²²Ichaqa Diosmi chay atiyniyoqkunata kallpanwan chinkachin, pay muchuchiyta munan chayqa, millay runaqa manan kawsanñachu.

²³Diosmi hinallata allinpipuni kawsachinman, ichaqa paymi lliw purisqanta qhawan.

²⁴Millay runaqa huk ratolla hatunchasqan, chaymantataq chinkarqapun, yuyu t'irasqa hinan ch'akirqapun, qholla chhoqollu wit'urparisqa hinan kapun.

²⁵Mana chayri, ¿pitaq kunan rimasqayta: Llullan, ninman? ¿Pitaq rimasqayta yanqa rimayman tukuchinman? nispa.