Read Quechua Cuzco Bible 1988 JOB 27 Bible Online

JOB 27 - Quechua Cuzco Bible 1988 bible

JOB 27

¹Jobqa nillarqantaqmi:

²—Tukuy-atiyniyoq Diospa sutinpin jurani, paymi chaninchawayta mana munanchu, paymi kawsayniyta hayaman tukuchin.

³Chaytukuywanpas samarinaypaq kallpata qowanankamaqa, kawsanay p'unchaykamaqa,

⁴manapunin llullakusaqchu, manapunin ima waqllisqa simitapas rimasaqchu.

⁵Manapunin rimasqaykichistaqa: Hinapunin, nisaqchu, kawsanaykamaqa: Mana huchayoqmi kani, nillasaqpunin.

⁶Mana huchayoq kashaspaqa manan hinata nichikuymanchu, kawsanaykamaqa manan sonqoy huchachawanqachu.

⁷Awqayqa millay runa hina muchuchisqa kachun, contrayqa mana chanin runa hina ñak'arichisqa kachun.

⁸¿Ima suyakuytaq kanman huchasapa runapaq Diosninchis kawsayninta qechurqapuqtinri?

⁹Hatun sasachakuypiña rikukuqtiypas, Diosqa manapunin mañakusqankunata uyarinqachu.

¹⁰Payri, ¿Tukuy-atiyniyoq Dioswan kusikunmanchu? ¿Sapa rato hina Diosmanta mañakunmanchu?

¹¹Kunanqa Diospa hatun atiyninmantan yachachisqaykichis, Tukuy-atiyniyoqpa yuyaykusqankunatan rikuchisqaykichis.

¹²Ichaqa llapaykichisñan rikurqankichis, chay hinari, ¿imanaqtintaq yanqa qasi rimankichis?

¹³Kay hinan millay runapaq Diospa wakichisqan muchuchiyqa, kay hinan awqa sonqo runapaq Tukuy-atiyniyoqpa unanchasqan ñak'ariyqa.

¹⁴Askhaña wawankuna kanqa chaypas awqa-tinkuypin wañupunqaku, mirayninña kanqa chaypas pisi mikhunallayoqmi kanqaku.

¹⁵Wawankunamanta qhepaqtapas qonqay onqoymi wañuchinqa, viudankunapas manan waqanqachu.

¹⁶Millay runaqa hinaña hallp'ata hina qolqeta montonqa chaypas, p'achanpas yanqa nisqaña kashanqa chaypas,

¹⁷chanin runan chay waqaychasqa p'achawanqa churakapunqa, ch'uya runakunan chay qolqetapas phasminakapunqa.

¹⁸Millay runaq wasinqa thutaq qesan hinallan, chakra patapi qhawaqpa ch'ukllan hinallan.

¹⁹Allin qhapaqraqmi puñunanmanqa siriykunqa, rikch'arinqataq wakcha, mana imallayoqña.

²⁰Q'aqchakuyqa chayamun para lloqlla hinan, q'aqyaqeyqa tutaq sonqonpin payta apapun.

²¹Inti lloqsiy rupha wayran payta aparqapun, wasinmantapas aparikapuqtinmi chinkapun,

²²hinaña kallpachakunqa ayqekunanpaq chaypas, payta mana khuyapayaspan wayranqa,

²³manchay-manchayta t'oqyachisparaqmi wayraqa qatiykachanqa.