Read Quechua Cuzco Bible 1988 JOB 28 Bible Online

JOB 28 - Quechua Cuzco Bible 1988 bible

JOB 28

¹Kanmi qolqe horqona mina, kanmi maypichus qori ch'uyanchana.

²Fierropas hallp'amantan horqokun, cobrepas rumikunata parichispan ruwakun.

³Runaqa hallp'aq ukhu sonqonman haykuspan tutayaqllapi mina rumita maskhan, chaypin laqhayaqtapas k'anchayninwan p'unchayman tukuchin.

⁴Llaqtakunamantapas sinchi karupin, ranra qhatapin mina t'oqota hasp'in, ch'ilin-ch'ilin ch'usaq cheqaskunapin runakunaqpas mana purinankunapin waskhapi warkuykusqa llank'anku.

⁵Patan hallp'apin mikhuykuna wiñaykushan, pachanpitaq nina rawrachisqa hinaraq kaykushan.

⁶Chay qaqakunapin anqas umiña kashan, qoripas hallp'awan chhaqrusqa kashan.

⁷Manan ima suwa ankakunapas mina ñantaqa rikunchu, waman ankapas manallataqmi hayk'aqpas rikunchu.

⁸Salqa animalpas manan chaynintaqa purinchu, leonkunapas manallataqmi saruykunkuchu.

⁹Runaqa ch'ila qaqatan t'oqon, orqoq saphintaraq t'iramun.

¹⁰Qaqakunapin suchuna t'oqokunata ruwakun, chaypitaqmi imaymana qhapaq-kaykunata tarin.

¹¹Mayukunaq paqarimusqantapas qhawararqamunmi, sut'imanmi horqomun pakasqa kaqkunatapas.

¹²Chay hinari, ¿maymantataq yachayri hamun? ¿May cheqaspitaq kashan yuyayniyoq-kayri?

¹³Runaqa manan yachanchu yachaypa maypichus tiyasqantapas, manan runa ukhupipas tarinchu.

¹⁴Chinkay-chinkay ukhupas: Manan kaypiqa kanchu, ninmi, mama qochapas: Manan ñoqaqa hap'inichu, nillantaqmi.

¹⁵Manan ch'uya qoriwanpas tarikunmanchu, manan qolqewanpas rantikunmanchu.

¹⁶Manapunin chaninniyoq qoriwanpas rantikunmanchu, manapunin alqa umiñawanpas, anqas umiñawanpas tarikunmanchu.

¹⁷Qorimanta qespimantapas aswan chaninniyoqpunin, manapunin rantikunmanchu ch'uya qori qeruwanpas.

¹⁸Yachaywan tupachisqaqa coralpas[4] qespipas yanqan, perlamanta aswan chaninniyoqqa yachaypunin.

¹⁹Yachaywan tupachisqaqa Etiopía suyu q'ellu umiñapas yanqan, manapunin sinchi chaniyoq qoriwanpas rantikunmanchu.

²⁰Chay hinari, ¿maymantapunitaq yachayri hamun? ¿May cheqaspipunitaq yuyayniyoq-kayri kashan?

²¹Ima rikch'aq animalkunapas manan yachaytaqa rikunchu, phalaq animalkunapas manan chaytaqa rikunchu.

²²Wañuy-pachawan aya p'ampanawanpas ninkun: Yachaymantaqa rimaqllatan uyariyku, nispan.

²³Ichaqa Diosllan reqsin yachaypa ñannintaqa, payllan yachan maypi tariyta.

²⁴Payllataqmi hallp'aq cantonmanta cantonkamaraq rikun, hanaq pacha urapi kaqtapas llapallantapunin reqsin.

²⁵Diosqa wayraman kallpata qoshaspan, mama qochamanpas qorpata churashaspan,

²⁶paraq parananpaqpas kamachikuyta churashaspan, chikchiq mayninta purinantapas kamachikushaspan,

²⁷rikullarqantaq yachaypa imayna chaniyoqchus kasqanta, allinta qhawarispataq: Allinmi, nirqan.

²⁸Hinaspan Diosqa runakunata nirqan: Ñoqa Señor Diosta manchakuymi yachayniyoq kayqa, mana allin-kaymanta t'aqakuymi yuyayniyoq-kayqa, nispa.