Read Quechua Cuzco Bible 1988 JOB 30 Bible Online

JOB 30 - Quechua Cuzco Bible 1988 bible

JOB 30

¹Kunantaq ichaqa ñoqamanta asikunku ñoqamantapas aswan waynakunaraq, taytankutapas manapunin munarqanichu uywa michiq alqokunawan kanallantapas.

²¿Imapaqtaq paykunaq kallpanri serviwanman karqan? Paykunaqa karqanku sayk'usqa runakunan.

³Yarqaymanta pisipaymantawan machuyasqa, tutapas ch'inneqpa ch'usaqninpin ch'aki saphikunallataña q'awtirqanku.

⁴Ch'aphra-ch'aphrakunamantan p'osqo qorakunata pallakurqanku, retamaq saphintawanpas mikhurqanku.

⁵Runamasinpa qarqosqankunan karqanku, suwata hina qaparkachakuspa qatiykachasqakunan karqanku.

⁶Ch'aki mayuq k'aktunkunapin tiyarqanku, qaqa-qaqapin pampa t'oqokunapin tiyarqanku.

⁷Ch'aphra-ch'aphrakunapin yupakuspa purirqanku, chaykunaq pachanmanmi suchuykurqanku.

⁸Q'opa runakuna tuwinti runakuna, suyunkumantapas qarqosqa mana valeq runakuna.

⁹Kunantaq ichaqa chaykunaq wawankuna takipayawanku, ñoqamanta rimaspan imaymana rimayman wasapachinku.

¹⁰Millakuwaspankun ñoqamanta karunchakunku, uyaypiraqmi thoqaykuwanku.

¹¹Diospa kay hina k'umuchisqanña kashaqtiymi ima munasqankuta ruwawanku.

¹²Qayllaymanmi askhallaña huñurqakamunku, hinaspan qhepaman kutichiwanku, kumpaytapuni munawaspan phawaykuwanku.

¹³Ñanniytan wisq'arqowanku, askha llakikunawanmi ñit'iykuwanki, manataq pillapas yanapaykuwanchu.

¹⁴Perqaq hatun q'asantan hunt'aykamuwanku, mancharikuytaraqmi phawaykamuwanku.

¹⁵Llaksakuymi ñoqataqa chiriyarqachipuwan, respetasqa-kayniypas wayra hinan pasakapun, kaqniyoq-kayniypas phuyu hinan ch'usaqyarqapun.

¹⁶Manañan kawsayta atiniñachu, phutikuymi ñoqataqa ñit'iykapushawanña.

¹⁷Nanaymi tulluykunamanña haykurqapun, tutakunapas parin-parintan nanawan.

¹⁸Diosmi much'uymanta kallpawan hap'irqowan, mat'i kunkayoq p'acha hinan mat'irqowan.

¹⁹T'uru-t'urumanmi chanqaykuwan, ñut'u hallp'a hinan uspha hinan kapuni.

²⁰Diosníy, waqyakamuqtiypas manan uyariwankichu, qayllaykamuykiña chaypas yanqallan qhawarimuwanki.

²¹Ñoqapaqqa awqa sonqo runamanmi tukupunki, llapan kallpaykiwanmi qatiykachawanki.

²²Hap'iykuspan wayrawan apachiyta yuyaykuwanki, manchay tutukawanmi chhaphchichiwanki.

²³Allintan yachakuni wañuyman qatiwashasqaykita llapan runapaq waqaychasqa cheqasman.

²⁴Sasachaypi rikukuspa ñak'ariq runa yanapayta waqyakuqtinqa, manan pipas aswan hatun llakiwan yapaykunchu.

²⁵Ñoqari, ¿manachu muchuqmantapas waqarqani? Ñoqari, ¿manachu pisichikuqtapas khuyapayarqani?

²⁶Ñoqaqa kusikuytamá suyakurqani, mana allin-kayraqtaq chayamuwan. K'anchayta suyakushaspan laqhayaqpi rikukuni.

²⁷Sonqoypas mana thaniykuspan phataqeshawan, llaki phutiy p'unchayllañan suyashawan.

²⁸Khuyaytan yanayaykapushani intiq k'anchaynintapas mana rikuspa, llapa runaq qayllanpin yanapaytapas mañakuni.

²⁹Chacal nisqa animalkuna hinaraqmi yupakushani, suri hinaraqmi qaparishani.

³⁰Qaraypas yanayaykapuspan urmapushan, aychaypas rupharinraqmi.

³¹Qenaypas waqay-waqaytañan tocapushan, arpaypas llakiy-llakiytañan waqapushan.