Read Quechua Cuzco Bible 1988 JOB 31 Bible Online

JOB 31 - Quechua Cuzco Bible 1988 bible

JOB 31

¹Ñoqa kikiymi allintapuni yuyaykurqani soltera sipaskunatapas mana munapayanaypaq.

²Diosri, ¿hanaqmantapacha imatataq runaman qomun? Tukuy-atiyniyoqri, ¿runaq ruwasqanmanta imatataq qomun?

³Payqa millaykunatan qolluchin, mana chanin ruwaqkunamanmi hatun llakita kachaykun.

⁴¿Manachu ruwasqayta Diosri rikun? ¿Manachu purisqaykunatapas payri qhawariwan?

⁵Juranin mana ima mana chanintapas ruwasqayta, mana pillatapas q'otuy yuyaykusqayta.

⁶Diosqa chaninkaq balanzapi taripawachun, chaypin yachanqa mana ima huchaypas kasqanta.

⁷Cheqaq ñanmantachus t'aqakurqani chayqa, munapayaywanchus q'otuchikuni chayqa, ima mana allintapas ñoqapi tariwan chayqa,

⁸tarpusqaykunatapas hukkuna mikhukapuchun, wiñachisqaykunatapas saphinmantaraq t'irapuchun.

⁹Wak warmiwanchus sonqoyta suwachikuni chayqa, runamasiytachus qhamiyarqani warminwan puñunaypaq chayqa,

¹⁰warmiypas huk qharipaq kutapakuchun, paywanqa wak qharikuna puñuchun.

¹¹Chay hina ruwasqay kaqtinqa sinchi millaypunin, muchuchisqapunin kanay.

¹²Mana thanispa rawraq hinachá kanman, cosechaykunatapas llapantachá q'olaykunman.

¹³Runaykuna imachus tupaqninmanta quejakuwaqtin mana uyariqpas tukuymanchu karqan chayqa,

¹⁴Dios uyapurachiwaqtinri, ¿imanaymantaq? Pay tapuwaqtinri, ¿imaynatataq kutichiyman?

¹⁵Kikin Diosmi wiksapiqa kamawanchis, paykunaqpas ñoqaqpas Payllapunin ruwaqenchis.

¹⁶Manapunin wakchakunaq mañakuwasqantaqa: Manan, nirqanichu, manapunin viudakunaq llakikunantapas munarqanichu.

¹⁷Manan hayk'aqpas sapallayqa mikhunayta mikhurqanichu, wakchakunamanpas qorillaqpunin kani.

¹⁸Wakchakunataqa wayna kayniymantapachan tayta hina qhawarqani, viudakunatapas yanapallarqanipunin.

¹⁹Mana p'achayoq q'alakuna chiripi kashaqtinqa, wakchakunapas mana imawanpas p'istuykukunan kashaqtinqa,

²⁰ovejaykunaq millmanwanmi q'oñirichirqani, paykunataq mayta saminchawarqanku.

²¹Mana mama-taytayoqtachus: Ñoqawanqa-ñoqawan hina, nirqani, juzganapi ñoqaman sayapakuwananta yachaspay chayqa,

²²makiykuna p'akikuchun, rikraymanta urmachun.

²³Ñoqaqa Diospa ñak'arichiynintaqa manchakurqanin, ñoqaqa Diospa hatun-kaynintaqa manchakuspan chaykunataqa mana ruwarqanichu.

²⁴Manan qoriymanpas hap'ipakurqanichu, manan qhapaq-kayniymanpas k'askakurqanichu.

²⁵Manan askha qhapaq-kayniywanpas alabakurqanichu, manan askha qolqeywanpas kusikurqanichu.

²⁶Inti k'anchaqtapas qhawasharqanin, killaq sut'isqantapas rikusharqanin,

²⁷ichaqa manapunin pakallapipas chaykunataqa yupaycharqanichu, manan karumantapas much'arqanichu.

²⁸Chayta ruwayman karqan chayqa, muchunaymi kanman karqan, hanaq pacha Diostachá chaywanqa qheparpariyman karqan.

²⁹Awqaytaqa manan kusipayarqanichu hatun llakipiña rikukuqtinpas, manan asipayarqanichu sasakunapiña rikukuqtinpas.

³⁰Simiyqa manan huchallikurqanchu: Wañuchunraq, nispaqa manan ñakarqanchu.

³¹Llapan kamachiykunan yachan wasiyman hamuqtaqa mikhuchiqpuni kasqayta.

³²Wak llaqtayoqtaqa manan hawapichu illarichiq kani, purikuqpaqqa kicharayallaqpunin wasi punkuyqa.

³³Huchaytaqa manan wakinkuna hinachu pakaykurqani, manan wakinkuna hinachu sonqoypiqa ñit'irqani,

³⁴runata manchakuspayqa, aylluykunaq pisichawananta manchakuspayqa, manapunin wisq'aykukuspa ch'inllaqa tiyarqanichu.

³⁵¡May allinchá kanman pillapas uyariykuwanman chayqa! Sutiy qelqasqaywanmi rimasqayta mat'ipani. ¡Kunanqa Tukuy-atiyniyoq Dios kutichimuwachun! Qelqasqapi rikuchiwachun q'awiwasqankunata.

³⁶Ñoqaqa kusisqan chay qelqata rikray patapi apasaq, umay patapiraq coronata hina churakusaq.

³⁷Diosmanraq tukuy ima ruwasqaymanta willakusaq, mana p'enqakuspan ñawpaqenman asuykusaq.

³⁸Hallp'aychus contrayta hanaq pachaman waqyakun chayqa, wachunkunapas llakikuymanta waqan chayqa,

³⁹mana pagaspachus cosechasqankuta kaqnichakurqani chayqa, chaypi llank'aqniykunamanchus mana pagarqani chayqa,

⁴⁰hallp'aykuna trigo rurunanmantaqa khiskata ruruchun, cebada rurunanmantaqa asna qora wiñachun, nispa. Kaypin Jobqa tupapakuyta tukupun.