Read Quechua Cuzco Bible 1988 JOB 32 Bible Online

JOB 32 - Quechua Cuzco Bible 1988 bible

JOB 32

¹Jobmi kinsantin amigonkunata sayk'uchirqan chanin kasqanta rimaspakama, chaymi paywan churanakuyta tatipurqanku.

²Hinan Buz ayllu Ram miraymanta Barakielpa churin Eliuqa Jobpaq phiñakurqan, mana huchayoqman tukuspa Diosta huchachasqanmanta.

³Phiñakullarqantaq Jobpa kinsantin amigonkunapaqpas, mana kutichiy atisqankumanta, Diosta qhepapi rikuchisqankumantawan.

⁴Eliuqa llapankumanta waynallaraq kaspanmi suyakurqan wakinkunaraq Jobwan parlayta tukunankama.

⁵Ichaqa paykunapas manaña ima niytapas atiqtinkun, mayta phiñakurqan,

⁶chaymi nirqan: —Ñoqaqa waynallaraqmi kani, qankunataq kurakkunaña, chaymi manchakuspay yachasqayta mana rimarirqaykichischu.

⁷Nirqanitaq: Yuyaqkunaraq rimachunku, watan-watan yachasqankuta rikuchichunku, nispay.

⁸Chaywanpas Tukuy-atiyniyoq Señor Diospa samayninmi runataqa yachayniyoqta ruwan.

⁹Manan llapan yuyaq runakunachu yachaysapaqa, manan llapan kurak runakunachu chaninkaqtaqa reparan.

¹⁰Chayraykun nini: Kunanqa uyariwaychis, ñoqapas yachasqaytan rimarisaq.

¹¹Ñoqaqa ch'inllan uyarikurqani qankunaq imaymana rimasqaykichista, hinallan uyarirqani allin simikuna maskhasqaykichista.

¹²Allintan rimasqaykichistaqa uyarirqani, manataq mayqenniykichispas Jobpa pantasqanta reqsichirqankichischu, manallataq rimasqanman tupaqtapaschu nirqankichis.

¹³Chayrayku ama niychischu: Yachaytan tariyku, kunanqa Diospuni anyachun, ama runachu, nispaqa.

¹⁴Jobpas manan ima niwanpaschu ñoqataqa, ñoqapas manataq qankuna hinachu kutichisaq.

¹⁵Uyariway, Job: Kay kinsantin runaqa sayk'usqan kashanku, paykunaqa manan ima niytapas atisunkikuñachu.

¹⁶¿Paykuna upallakuqtinchu ch'inlla kakuyman? Paykunaqa manañan ima niytapas atinkuñachu.

¹⁷Ñoqapas kay rimaypi rimaysikusaqmi, ima niytachus munasqaytan nisaq.

¹⁸Askha imaymanakunan rimarinay kashan, manapuniñan upallakuyta atirqoshaniñachu.

¹⁹T'oqyanay patallapiñan kashani, qara p'uyñupi poqoshaq vino hinallañan kashani.

²⁰Samaranaypaqqa rimarinaypunin, qanmanqa kutichinaypunin.

²¹Manan pimanpas sayakusaqchu, lliwtapas huk kuskatan qhawarisaq.

²²Runa llunk'upayaq kayman karqan chayqa, ñachá Kamaqniyqa chinkachiwanmanña karqan.