Read Quechua Cuzco Bible 1988 JOB 36 Bible Online

JOB 36 - Quechua Cuzco Bible 1988 bible

JOB 36

¹Pisillatawan suyaykuway, yachachisqaykin, kanraqmi Diosmanta rimarinay.

³Allin yuyayniymantan rimarimusaq, Kamaqniypa chanin kasqantan rikuchisqayki,

⁴allin mana pantasqatan nisqayki, yachaysapawanmi kashanki.

⁵Diosqa atiyniyoqmi, manan runataqa pisichanchu, Diosqa munayniyoqmi, manan yuyaykusqantaqa p'akinchu.

⁶Manallataq millay runatapas hinataqa qhawanmanchu, wakchakunatan ichaqa chanintapuni ruwan.

⁷Payqa qhawarinpunin cheqaq sonqo runakunataqa, reyta hinan kamachikunanpaq tiyachin, paykunataqa hatunchanpunin.

⁸Cadenakunawan watasqa ñak'arishaqtinkuqa, llakikuykunawan ñit'isqa muchushaqtinkuqa,

⁹Diosqa rikuchinpunin mana allin ruwasqankunatapas, uma hoqariywan huchallikusqankutapas.

¹⁰Diosqa anyaspan rimapayan, huchankuta saqenankupaqmi kamachin.

¹¹Uyarikuspachus Diosman k'askakapunku chayqa, sumaq kusi kawsaytan tarinqaku, kusisqallataqmi ch'isiyanqaku.

¹²Manataqchus uyarikunqaku chayqa, wañuy mayutan chimpanqaku, manaraq reparakushaspan wañunqaku.

¹³Mana chanin runaqa phiñakullanpunin, watasqaña kashaspapas, manan yanapaytapas mañakunkuchu.

¹⁴Waynallaraq kashaspan wañukapunkupas, qhari pura t'inkikushaspan chinkaripunkupas.

¹⁵Diosqa ñak'ariypa chawpintan muchuqtaqa qespichin, nanaypa chawpintan yuyayta hap'ichin.

¹⁶Qantapas hatun llakimantan horqorqasunki, mana imaq mat'iykunanmantaq apamurqasunki, mesaykitapas sumaq mikhunakunawanmi wasapachirqan.

¹⁷Kunantaq ichaqa millay runa hina muchuchisqa kashanki, chanin kaypa taripasqanmi kashanki.

¹⁸Allinta qhawakuy ama lluk'iykachikunaykipaq, amallataq askha qolqewan sonqoykita suwachikuychu.

¹⁹Llakikuyniykiqa manan imapaqpas valenchu, qhapaq-kayniykipas kallpachakusqaykipas manan valenchu.

²⁰Ama munaychu tutaq chayamunanta, tutapiqa qonqayllan llaqtakunapas chinkapun.

²¹Ñak'ariyta mana munaspa mana allin ruwayta akllakushanki chayqa, paqtataq mana allinman k'askakuwaq.

²²Qhawariy Diospa hatun atiyninta, mayqen yachachiqpas manan kanchu pay hinaqa.

²³Manan pipas kamachinmanchu ima ruwanantapas, manan pipas ninmanchu mana allin ruwasqantapas.

²⁴Pachantinmi takinku ruwasqankunamantaqa, qanpas yuyarillaypuni yupaychayta.

²⁵Llapa runan Diospa ruwasqanta rikunku, karumantaraqmi qhawanku.

²⁶¡Diosqa sinchi hatunmi, manapunin yuyayninchispas aypanmanchu! ¡Watankunatapas manan yupayta atisunmanchu!

²⁷Payqa sut'uy unutan huñun, chaymantataq paraman tukuchin.

²⁸Parataq phuyumanta phaqcharimun, unu parapas hallp'a pataman chayamun.

²⁹¿Pitaq yachan imanaqtinsi phuyuq phawasqanta? ¿Pitaq yachan hanaq pachamanta Diospa t'oqyachimusqanta?

³⁰Diosmi illapata hinantin ladoman lliphllikichin, mama qochaq ukhunmanraq aypachin.

³¹Chay hinapin llaqtakunata kawsachin, askha mikhunata qospa.

³²Makinpin illapata hap'in, may munasqallanmanmi chayachin.

³³Kunununuyqa wayrantin paraq hamunantan willakun, uywakunapas chikchiq hamunantan willakun.