Read Quechua Cuzco Bible 1988 JOB 39 Bible Online

JOB 39 - Quechua Cuzco Bible 1988 bible

JOB 39

¹¿Yachankichu hayk'aqchus k'ita cabraq wachananta? ¿Rikunkichu china taruka wachashaqta?

²¿Yachankichu hayk'a killamantas wachanku chayta? ¿Yachankichu ima killapis wachananta?

³Wachananpaqqa qhopuchaykukunmi, chay hinapin uñanqa lloqsimun.

⁴Hinaspan pampapi qorallawan wiñanku, wiñaspataq manaña kutimuq ripunku.

⁵¿Pitaq kacharirqan salqa asnotari? ¿Pitaq kacharirqan mana watasqa purinanpaqri?

⁶Ñoqan ch'inneqta tiyananpaq qorqani, kachi-kachi pampata kawsanankupaq qorqani.

⁷Paykunaqa asikunmi llaqtaq ch'aqwasqanwan, manan kasunkuchu asno qatiqpa waqyakachakusqantapas.

⁸Orqon-orqontan phawaykachanku q'achuta maskhaspa, ima q'omerllapas kaqtinqa mikhuykunankupaq.

⁹¿Salqa toro qanpaq llank'anmanchu? ¿Kanchaykipipas tuta puñunmanchu?

¹⁰¿Atiwaqchu yugota wataykuspa llank'achiyta? ¿Atiwaqchu qatiykukuspa chakra yapuchiyta?

¹¹¿Kallpayoq kasqanpi hap'ipakuwaqchu? ¿Sasa llank'anata llank'achiwaqchu?

¹²¿Yuyankichu chakraman kachaqtiyki q'epintin eraman kutimunanpaq?

¹³Suriqa kusisqan pharpachakushan, chaywanpas manan pariwana hinaqa phalanmanchu.

¹⁴Aqo-aqomanmi runtuntapas wikch'un intiq ruphayllan oqllananpaq.

¹⁵Manan yuyarinchu pipas ñitirqonantaqa, ima uywapas sarurqonantaqa.

¹⁶Chiwchinkunapaqpas millayllañan manapas wawanchu kanman hina, manataq yuyarinchu llank'asqan yanqapaq kasqantaqa.

¹⁷Chhaynaqa ñoqan yuyayta mana qonichu, allin yuyayniyoq kananta mana munanichu.

¹⁸Sayarispa raphracharikuspataq phawarillanña, caballopi phawaq runakunamantapas asikunmi.

¹⁹¿Qanchu caballoman kallpata qoqqa kanki? ¿Qanchu kunkanta ch'awarninwan k'achanchanki?

²⁰¿Qanchu t'isku-t'iskuta hinaraq p'itachinki, wihihihispapas runataraq mancharichinanpaq?

²¹Umanta chhaphchirikuspan pampata thallmirin, mana manchakuspataq maqanakuyman phawarin.

²²Manchakunanmantaqa asikunmi, manataq llaksakunpaschu, espadataña apaykachaqtinkupas manan reparaqpas tukunchu.

²³Runaq wach'i q'epinmi wasanpi chhaqllaqen, maqanakuqpa lanzanwan espadanwanmi chhipipipin.

²⁴Karu pampakunatapas phawarispa manaraqmi tarirqonchu, putututa tocaqtinkuqa manañan sayaykuytapas munanchu.

²⁵Wihihihispan pututu waqaqtinpas kutichin, paypaqqa maqanakuypas karumantaraqmi q'apamun, ch'aqwaytapas kamachikuqkunaq waqyakusqantapas karumantaraqmi uyarin.

²⁶¿Qanchu waman ankaman phalayta yachachirqanki? ¿Qanchu uray ladoman phalananpaq yachachirqanki?

²⁷¿Qanchu kamachirqanki hatun ankata aswan wichayman phalananpaq, ranra qhatapi q'esachakunanpaqpas?

²⁸Payqa tuta p'unchaymi ranrallapi tiyakun, ranraq k'awchinpitaq qhariraq sayanpas.

²⁹Chaymantapachan makilla qhawamun, karumantapachan ñawinqa mikhunata rikumun.

³⁰Chiwchinkunapas yawarwanmi kallpachakun, maypichus ima wañusqapas kasqanpin ankaqa rikhurin.