Read Quechua Cuzco Bible 1988 JOB 4 Bible Online

JOB 4 - Quechua Cuzco Bible 1988 bible

JOB 4

¹Hinan Temán llaqtayoq Elifazqa Jobta nirqan:

²—¿Imatapas rimapayaqtiy, phiñakuwaqchu? Manan ch'inlla kaymanñachu.

³Qan, askha runaman yachachiqpas, qan, pisi kallpayoqta kallpachaqpas,

⁴qan, urmaqkunata sayarinanpaq kallpachaqpas, qan, kumpanayakuqta sayarichiqpas,

⁵llakiq ñit'isqan rikukuspaykiqa laqhoyarqapullankitaq, ñak'ariypi kaspaykiqa pisi kallpayarqapullankitaq.

⁶Qanqa Diospa hunt'aq kamachinmá kanki, allin kawsaypi puriq runamá kanki, ¿imaynataq mana kanchu cheqaq hap'ipakuyniykiri?

⁷Yuyariyyá, ¿mana huchayoqqa hukllapas chinkachisqachu karqan? ¿Maypin chanin runaqa ch'usaqyachisqa karqan?

⁸Yachaspaymi rimani, mana allin ruwaqqa mana allin ruwasqallataqmi rikukun, runa ch'aqwachiqqa ch'aqwallapitaqmi rikukun.

⁹Diosqa chay hina runataqa phukuspallaraqmi ch'usaqyachipun, k'arakta phiñakuspan hukpaqkama thunipun.

¹⁰Imaynatapas waqakuchun, león hinapas qaparichun, Diosmi upallachin, kiruntaraq chhullaspa.

¹¹Mana mikhunayoq león hinan wañupun, wawankunapas lliwmi ch'eqechisqa kapun.

¹²Ch'inllamantan huk willakuy chayarqamuwan, ñak'ayllatan chhiwchisqata uyarirqoni.

¹³Llapa runakuna misk'i puñuypi kashaqtinkun manchanata ñit'ishawasqa.

¹⁴Pasaqtapuni llaksakushasqani, tulluykunapas manaraq takyashawasqachu.

¹⁵Uyaytapas samay hina pasarpariwan, cuerpo peloykunapas ch'uskuchakuwanraq.

¹⁶¡Pichá chaypi kashasqa! Yanarayashaqtan rikurqoni, ichaqa manan reparanichu imaynachus kasqanta. Ch'inllataq karqanpas, chaymantaraq uyarirqani:

¹⁷Runari, ¿Diospa ñawpaqenpi kanmanchu chaninpuni? Wañuq runari, ¿Kamaqninpa qayllanpi kanmanchu ch'uyapuni?

¹⁸Diosqa hanaq pachapi kamachinkunapipas manan confiakunchu, Diosqa angelninkunapipas tarinmi huchata.

¹⁹¡Imaynataraqtaq hallp'amanta ruwasqa runapiqa tarinqa! Runaqa hallp'a patapi t'urumanta ruwasqa wasi hinan, p'altaspa wuñuchina thuta hinan.

²⁰Runaqa pacha paqarmanta ch'isinkama thuninan, mana piqpa reparasqanmi wañupun.

²¹Karpa chutaq waskha p'itisqa hinan runaq kawsayninqa p'itikun, yachayta mana aypaspan wañupun, nispa, nishaqta.