Read Quechua Cuzco Bible 1988 JOB 42 Bible Online

JOB 42 - Quechua Cuzco Bible 1988 bible

JOB 42

¹Jobmi Señor Diosta nirqan:

²—Yachanin qanpa Tukuy-atiyniyoq kasqaykita, manataqmi ima yuyaykusqaykipas qollunmanchu.

³Qanmi tapuwarqanki: ¿Pin qan kanki allin yuyaykusqaykunamanta iskayrayanaykipaq yanqa rimaykunata thawtispayki? nispa. Cheqaqtapunin rimasharqani mana ima yachasqaymanta, mana reparay atisqay musphana kaqkunamanta.

⁴Qanmi niwarqanki: Uyariway, rimapayasqaykin, kutichiway tapukuyniykunata, nispa.

⁵Kunankaman uyarispallaraq reqsirqayki, kunanmi ichaqa ñawiykunawanpuni rikuyki.

⁶Chaymi ñoqa kikiyta millakuni, ñut'u hallp'apiwan usphapiwan tiyaykuspan, llakikuspa yuyayniyta hap'ikuni, nispa.

⁷Chaykunata Jobta nisqanmantataq Señor Diosqa Elifaztapas nirqan: —Kamachiy Jobqa ñoqamanta rimaspa cheqaqllatan rimarqan, qankunan ichaqa mana chay hinatachu rimarqankichis. Chaymi sinchi phiñasqa qanpaqpas reqsinakuq-masiykipaqpas kashani.

⁸Kunanqa phawaychis kamachiy Jobman qanchis torillota qanchis anejotawan qatiykukuspa, hinaspa hucha pampachay ruphachina sacrificiota haywamuwaychis. Jobtaq mañapusunkichis, ñoqataqmi paypa mañakamuwasqanta uyarispa, mana ima mana allintapas qankunata ruwasqaykichischu, hinaña chaskinaykichispuni kashan chaypas. Jobqa ñoqamanta cheqaqllatan rimarqan, qankunan ichaqa mana chay hinatachu rimarqankichis, nispa.

⁹Chaymantataq Elifazqa, Bildadwan, Zofarpiwan Señor Diospa kamachisqanta hina ruwarqanku, Señor Diostaq Jobpa mañakusqanta chaskirqan.

¹⁰Jobpa reqsinakuq-masinkunapaq mañaykapusqanmantataq Señor Diosqa payta wakmanta qhapaqyachirqan. Chaymantapas qoykapurqanmi ñawpaq kapusqanmantaqa iskay chay hinatawanraq.

¹¹Jobta watukuqmi rirqanku llapan wawqenkuna, panankuna, reqsinakuq-masinkuna, llapan ñawpa reqsisqankunapas. Paywan wasinpi tiyaykuspataq mikhurqanku, hinaspan ima sumaqta kusichirqanku. Señor Diospa llakiwan churaykusqanmanta llakipayaspankutaq sapankanku qolqekunata huk qori anillotawan qoykarirqanku.

¹²Señor Diosmi Jobtaqa ñawpaqmanta aswantaraq saminchapurqan, chaymi kapurqan chunka tawayoq waranqa ovejan, soqta waranqa camellon, waranqa masa toron, waranqa china asnonpiwan.

¹³Kapullarqantaqmi qanchis churinkuna, kinsa ususinkunapiwan.

¹⁴Kurak ususinpa sutinmi karqan Jemima, hukkaq ususinpa sutintaq Kisea, sullk'a kaqpataq Keren-hapuk.

¹⁵Manan suyuntinpipas karqanchu Jobpa ususinkuna hina munay sipaskunaqa, taytankutaq doteta qoykarirqan turankunamanwan kuskata.

¹⁶Chaykuna qhepatataq Jobqa kawsarqan pachak tawa chunka watatawanraq, hinaspan wañukapurqan sinchi yuyaqllaña. Wawankunatapas llapantaraqmi qhawarirqan, rikurqantaq nietonta, nietonpa nietontawanraq.