Read Quechua Cuzco Bible 1988 JOB 6 Bible Online

JOB 6 - Quechua Cuzco Bible 1988 bible

JOB 6

¹Jobmi nirqan:

²—Llakikuyniyta pesaqtinkuqa, phutikuyniyta balanzaman churaykuqtinkuqa,

³llasaykunmanchari qocha aqomantapas astawanraq, chayraykun ima atisqayta thawtini.

⁴Tukuy-atiyniyoq Diosmi wach'inwan aychayman t'urpuykuwan, chaypa venenonmi lliw ukhuyman ch'eqeykuwan, Diosmi imaymana manchay llakikunawan q'aqchaykuwan.

⁵¿Asnori q'achun kashaqtin hawchikinchu? ¿Toropas mikhunan kashaqtin waqanchu?

⁶¿Runapas q'ayma mikhunata mikhunchu kachiwan mana yapaykuspa? ¿Hat'aqoq raphinri sumaqchu mana kachiyoq?

⁷Chay hina mikhunataqa manan munanichu, mikhuqtiypas onqochiwanmi.

⁸¡May allinchá kanman mañakusqayta Dios qowanman chayqa! ¡May allinchá kanman munasqayta Dios haywariwanman chayqa!

⁹¡May allinchá kanman hukpaqkama Dios ñit'irqapuwanman chayqa! ¡May allinchá kanman Dios wañuchipuwanman chayqa!

¹⁰Wañupuspayraqchá aswantapas kusikuyman, nanashawanmanña chaypas q'ochukuymanpunin, allintapunin yachakuni Ch'uya Diospa kamachin hunt'asqaytaqa.

¹¹Manan kallpaypas suyakunaypaq kapunñachu, manan kawsanaypaq suyakuyniy kapunñachu.

¹²¿Ñoqari qaqapunitaqchu kani? ¿Cuerpoyri broncemantachu kanman?

¹³Ñoqa kikiyqa manan imanakuytapas atinichu, manataqmi piqpa yanapaykuynintapas tarinichu.

¹⁴Reqsisqa muchushaqtinqa khuyapayankun, manaña Tukuy-atiyniyoqman sonqollikun chaypas.

¹⁵Qankunan ichaqa, reqsinakuq-masiykuna, askha unuyoq mayu ch'akirqon hinaraq yanqa yuyarayachiwankichis.

¹⁶Chay mayukunan suchushan chhullunkuwan hunt'a, chay mayukunan phawashan rit'iq chullusqan askha unuyoq.

¹⁷Ch'aki tiempo chayamuqtintaq, ima mayupas kapunchu, ruphay q'oñiriqtinqa, unupas ch'akirqapunmi.

¹⁸Camellokunapi puriq comerciante t'aqakunan ñanninmanta chay mayuman q'ewirinku, mana unuyoqta tarispataq ch'inneq purisqankupi wañupunku.

¹⁹Tema llaqtayoq comerciante t'aqakunan unuta maskhanku, Sabá suyumanta comerciante t'aqakunan chay unu ukyaykuqllaña rinku.

²⁰Chayaspankutaq ch'aki mayuta tarinku, ukyaykuqllaña rishaspanku laq'opi rikukunku.

²¹Chay hinan qankunapas ñoqapaq kankichis, kay hina nanay muchusqayta rikushaspan mancharikuymanta mana yanapaykuwankichischu.

²²¿Qankunatari: Ñoqamanta pagaykuychis, nirqaykichischu? ¿Qhapaq-kayniykichismanta lluk'iykuy yanapaykuwanaykichispaq nirqaykichischu?

²³¿Awqaypa makinmanta qechuwaychis, nirqaykichischu? ¿Awqa sonqoq makinmanta horqowaychis, nirqaykichischu?

²⁴Imallatapas yachaykachiwaychis, ch'inllan uyariykusqaykichis. Imapi pantasqaytapas reqsichiwaychis.

²⁵Chanin simikunaqa sonqomanmi chayakun, qankunan ichaqa yanqapacha thawtishankichis.

²⁶¿Qankunari rimasqaytachu allichayta munankichis? ¿Phutisqa rimasqaytachu yanqa rimasqapaq yuyankichis?

²⁷Kusamá kasqankichis mana tayta-mamayoqta rantinapaq sorteaqkuna, kusamá kasqankichis reqsinakuq-masiykichista vendeqkuna.

²⁸Kunanqa qhawaykuwaychis uya-uyapura, ¿llullakuspa uyaykichispi niymanchu?

²⁹¡Upallaychis! ¡Amayá mana chanin rimaqkunaqa kaychischu! Wakmanta yuyaykuychis. Ñoqaqa chaninmi kani.

³⁰¿Ñoqari llullachu kashani? ¿Allin mana allin kaqtapas mana reparaqchu kashani?