Read Quechua Cuzco Bible 1988 JOB 7 Bible Online

JOB 7 - Quechua Cuzco Bible 1988 bible

JOB 7

¹Kay pachapi runaq kawsayninqa mit'anipi ati llank'ay hinallan, llank'apakuq runaq p'unchaynin hinallan,

²ch'isiyaq ruphaypi llank'apakuq kamachiq tardeyanallantaña suyakuq hinan, llank'apakuqpa llank'ayta tukuspa pagonta suyarayaq hinan,

³ñoqapas killan-killanmi yanqapaq suyakushani, tutan-tuta muchuspaymi kaykushani.

⁴Puñuykuqtiypas tutaqa manan illariyta atinchu, illarimunankaman yanqallaña suyaykushani, puñunapipas manan takyaniñachu.

⁵Aychaypas kuruq suksurqosqan kharkallañan kashan. aycha qaraypi k'iriykunan lleq-niripuwanña.

⁶P'unchayniykunan awaqpa lanzaderan hina phawashan, imaynan q'aytupas tukurqokun hinatan kawsayniypas tukukapun.

⁷Diosnilláy yuyariy kawsayniyqa huk phukurqoyllan, manañan hayk'aqpas kusikuymanñachu.

⁸Diosnilláy kunanqa rikushawankiraqmi, chaymantan ichaqa manaña, maskhawaspaykipas manan tariwankiñachu.

⁹Imaynan phuyuqa kashaspapas ch'usaqyarqapullan, chay hinallataqmi hallp'aq sonqonman chinkaykapuq runapas, chaymantaqa manañan kutimunñachu.

¹⁰Wasinmanpas manan kutipunñachu, ayllunkunapas manan rikunkuñachu.

¹¹Chayraykun manapuni upallakuymanchu, kay wañunayayniypin qaparisaq, phiñasqa kaspaymi quejakusaq.

¹²¿Imaraykun mana kacharispa hap'iwanki? ¿Ñoqari mama qochachu kani? ¿Ñoqari mama qochapi manchakuy hatun animalchu kani?

¹³Puñunapi samaykusaqchá, nishaqtiypas, puñuqtiyqa thaniykunqachá nanayniy, nishaqtiypas,

¹⁴aswantaraqmi puñukushaqtiy mancharichiwanki, imaymanawanraq musphapachiwanki,

¹⁵chayrayku kunkaymanta aswan q'apirqapuwachunku, aswan wañukapusaq kawsanaymantaqa.

¹⁶¡Hina kachun! Manan kawsayta munaniñachu. ¡Samarichiway! Kawsayniymi sinchi llakikuy.

¹⁷¿Imanaqtinpunitaq qanpaqri sinchi chaniyoq runari? ¿Imanaqtinpunitaq runamantari sinchita llakipakunki?

¹⁸¿Imanaqtintaq p'unchay-p'unchayri qhawapayanki? ¿Imanaqtintaq sapa rato hinari llamipayanki?

¹⁹¿Hayk'aqkamataq makillari qhawawanki? Manaña thoqayllaytapas millp'uykachiwankiñachu.

²⁰Huchallikuniña chaypas, qan, runa qhawaqtari, ¿imanaykitaq? ¿Imanaqtinmi sapa rato hina p'anawanki? ¿Ñoqari llasa q'epichu qanpaqri kani?

²¹¿Manachu huchaytaqa pampachaykuwankiman? ¿Mana allin ruwasqaytapas manachu pampachaykuwankiman? Kunallanmi hallp'aman chinkaykapusaq, maskhawankin, manataq kapusaqñachu, nispa.