Read Quechua Cuzco Bible 1988 SALMOS 10 Bible Online

SALMOS 10 - Quechua Cuzco Bible 1988 bible

SALMOS 10

¹Señor Diosníy, ¿imanaqtintaq karupi kashanki? ¿Imanaqtintaq khuyayta llakikushaqtiypas pakakunki?

²Hatunchakuspan millay runaqa wakchata qatiykachan, millay yuyaykusqankunawanmi wakchata urmaykachin.

³Millay runaqa sonqonpa millay ruwasqantan alabakun, qhapaq-kayman sonqollikuqtan saminchan, Señor Diostataq pisichan.

⁴Millay runaqa anchaykachaspanmi Diosmanta mana yuyariqpas tukunchu: Manan Diosqa kanchu, nispan yuyaykun.

⁵Paymantaqa ima ruwasqanpas allinmanmi tukun, chaninchayniykikunataqa manan reparallanpaschu, llapa awqankunatan pisicharparin.

⁶Sonqonpin nin: Manan hayk'aqpas urmaykusaqchu, manan hayk'aqpas ima mana allinpas kawanqachu, nispa.

⁷Ñakashallanpunin, llullakushallanpunin, manchachishallanpunin, millayllatapunin rimashan.

⁸Llaqtachakuna qayllapin pakaykukuspa suyapakun, mana huchallikuqtan pakallapi wañuchin. Ñawinqa mana kallpayoqtan qhamiyashan,

⁹t'oqonpi león hinan suyapashan. Wakchatan pakaylla qhamiyan qonqaylla hap'irqonanpaq, hap'irqospataq llikanman aysaykun.

¹⁰Hap'irqosqankunaqa ñit'isqan pampaman kumpakun, sinchi kallpanwan atipasqa.

¹¹Millay runaqa sonqonpin nin: Diosmi qonqapun, ñawintan ch'illmiykun, manan hayk'aqpas rikunqachu, nispa.

¹²¡Señorníy, sayariy! ¡Diosníy, maqarqariy! ¡Llakichisqa runakunata ama qonqaychu!

¹³¿Imanaqtintaq millay runaqa pisichasunki: Manan Diosqa watuwanqachu, nispa sonqonpi yuyaspa?

¹⁴Qanqa rikurqankipunin, qanqa rikurqankin ñak'arisqantapas muchusqantapas, chaykunata yachashaspaykiqa yanapaykunkin. Qanmanmi mana kallpayoqqa hap'ipaykukun, qanqa mana piniyoqtaqa yanapallarqankipunin.

¹⁵¡Millay runaq atiyninta waqllichiy! ¡Millay runata mana allin ruwasqanmanta muchuchiy, manaña imamantapas muchuchinaykipaq kanankama!

¹⁶Señor Diosqa wiñay-wiñaypaq Reymi, suyunmantan mana iñiyniyoqkunaqa qarqosqa kanqaku.

¹⁷Señor Diosníy, huch'uyyaykukuqkunaq mañakusqantan uyarinki, qanmi paykunata kallpachanki, makillan waqyakamusqankuta uyarinki.

¹⁸Mana piniyoqtapas sarunchasqatapas amachanki, wañuq runaqa amaña manchachinanpaq.