Read Quechua Cuzco Bible 1988 SALMOS 102 Bible Online

SALMOS 102 - Quechua Cuzco Bible 1988 bible

SALMOS 102

¹Señor Diosníy, mañakamusqayta uyariykuway, waqyakamusqayta uyariykamuway.

²Llaki ñit'ishawaqtinqa ama qheparpariwaychu, maki uyariykamuway, waqyakamuqtiyqa usqhaylla kutichimuway.

³Q'osñi hinan kawsasqay chinkapushan, tulluykunan nina sansa hina ruphaykushan.

⁴Sonqoymi naq'esqa qora hina t'awiykapushan, manan mikhunayachikunipaschu.

⁵Hik'ipakuspa anchisqaywanmi tullullaña ch'akiykapushani.

⁶Ch'inneqpi tiyaq suweq'ara hinan kani, thunisqa wasipi tiyakuq huku hinan kani.

⁷Manan puñunichu, wasi patapi ch'ullalla pichinchu hinan kani.

⁸Sapa p'unchaymi awqaykuna k'amiwanku, phiñapayawaqniykunan sutiywan ñakanku.

⁹Ñoqaqa usphatan t'antata hina mikhuni, ukyanaytapas weqeywanmi chhaqruni,

¹⁰k'arakllataña phiñakusqaykirayku. Qanmi hoqariwarqanki, hinaspa wikch'uwarqanki.

¹¹Kawsasqayqa llanthu hinan chinkaripushan, qora hinan ch'akiykapushani.

¹²Señor Diosníy, qanmi ichaqa wiñaypaq kamachikushanki, sutiykitaqa tukuy mirayllapunin mentanqa.

¹³Qanmi Sión llaqtata khuyapayanaykipaq sayarinki, ñan tiempoqa hunt'akamunña, ñan payta khuyapayanayki tiempoña.

¹⁴Kamachiykikunan rumi soqyankunata munakunku, perqanpa thunikusqanmantan llakikunku.

¹⁵Qhapaq atiyninpi Señor Dios rikhurimuspa Sión llaqtata wakmanta sayarichiqtinmi, hatun suyukunaqa payta manchakunqaku, kay pachantin reykunapas atiyninta manchakunqaku.

¹⁷Wikch'usqaq mañakusqantan uyarinqa, mañakusqankunatapas manan pisichanqachu.

¹⁸Kaymi qhepa miraykunapaq qelqasqa kanqa paykuna Señor Diosta yupaychanankupaq.

¹⁹Señor Diosmi ch'uya hanaqmantapacha qhawamurqan, hanaq pachamantapachan kay pachata qhawamurqan,

²⁰presokunaq anchisqanta uyarinanpaq, wañunapaq nisqakunata kacharinanpaq.

²¹Llaqtakunapas hatun suyukunapas Señor Diosta yupaychanankupaq hukllaman huñukuqtinkun, Señor Diospa sutinta Sionpi willanqaku, Jerusalenpipas payta yupaychanqaku.

²³Paymi waynallataraq pisi kallpayachiwarqan, pisillatañan kawsachiwarqan.

²⁴Ñoqan nini: Diosníy, ama munaychu mana wañunaypi wañunayta, qanqa wiñay-wiñaypaqmi kawsanki, nispa.

²⁵Qallariypin kay pachata teqsicharqanki, hanaq pachatapas qanmi ruwarqanki.

²⁶Chaykunan tukukapunqa, qanmi ichaqa kashallankipuni. Llapallanmi p'acha hina mawk'ayapunqa, p'achata hinan qanqa chaykunata cambianki, hinan wikch'usqa kapunqaku.

²⁷Qanmi ichaqa kaqllapuni kanki, manan wataykikunapas tukukunqachu.

²⁸Kamachiykikunaq wawankunaqa mana manchakuspallan tiyakunqa, qayllallaykipipunin wawankuqa kashanqa.