Read Quechua Cuzco Bible 1988 SALMOS 103 Bible Online

SALMOS 103 - Quechua Cuzco Bible 1988 bible

SALMOS 103

¹Davidpa takin Tukuy almaywanmi Señor Diosta saminchasaq, tukuy sonqoywanmi ch'uya sutinta saminchasaq.

²Tukuy almaywanmi Señor Diosta saminchasaq, imapas allin ruwapuwasqantaqa manan qonqasaqchu.

³Paymi lliw mana chanin ruwasqaykunatapas pampachaykuwaqqa, paymi lliw onqoyniytapas qhaliyachiwaqqa.

⁴Paymi aya p'ampanamanta kawsayniyta qespichiwaqqa, paymi munakuwaspa khuyakuwaspa saminchaykuwaqqa.

⁵Paymi tukuy allinkaqwan hunt'aykuwaqqa, wakmanta waynayaykachiwaspa ankata hina kallpachawaqqa.

⁶Señor Diosmi cheqaqta chaninchaqqa, paymi sarunchasqakunapaq kuskachapuqqa.

⁷Yuyaykusqankunatan Moisesman willarqan, ruwasqankunatapas Israel runakunaman rikuchirqan.

⁸Señor Diosqa khuyapayakuqmi sumaq sonqoyoqmi, mana usqhaylla phiñakuqmi, mana p'itiyllapuni munakuqmi.

⁹Manan sapa kutillachu anyashawanchis, manan pasaqllachu phiñapayawanchis.

¹⁰Manan mana chanin ruwasqanchiskunaman hinachu ñoqanchistaqa muchuchiwanchis, manan huchanchiskunaman hinapaschu pagawanchis.

¹¹Imaynan hanaq pachaqa kay pachamanta aswan wichaypi kashan, ahinatan manchakuqninkunapaq munakuyninta hatunta mast'arimurqan.

¹²Imaynan inti lloqsimuymanta inti haykuyta karunchan, ahinatan huchanchiskunata karunchawanchis.

¹³Imaynan taytaqa wawankunata khuyayta munakun, ahinatan Señor Diosqa manchakuqninkunata khuyayta munakun.

¹⁴Payqa reqsiwanchismi imayna kasqanchista, yuyarikuwanchismi ñut'u hallp'a kasqanchista.

¹⁵Runaq kawsasqanqa qora hinallan, k'ita t'ika hinan sisan,

¹⁶chayman wayrarimuqtin hinan chinkapun, manañataq pipas maypichus kasqanta yachapunchu.

¹⁷Señor Diosqa manchakuqninkunatan mana p'itiyta munakun, llapa mirayninkupaqpas sumaq sonqollapunin.

¹⁸Chhaynatan rimanakusqanta hunt'aqkunata munakun, kamachikusqankunata mana qonqaspa kasuqkunatapas munakun.

¹⁹Señor Diosmi hanaq pachapi kamachikuy tiyananta churarqan, hinantin pachakunatataq kamachishan.

²⁰¡Atiyniyoq angelninkuna, Señor Diosta saminchaychis! ¡Señor Diosta uyariq angelninkuna, Señor Diosta saminchaychis! ¡Munayninta ruwaq angelninkuna, Señor Diosta saminchaychis!

²¹¡Hanaq pachapi llapallaykichis, Señor Diosta saminchaychis! ¡Munayninta ruwaq kamachinkuna, Señor Diosta saminchaychis!

²²¡Maykunapichus kamachikusqankunapi llapallan kamasqankuna Señor Diosta saminchaychis! ¡Tukuy almaywanmi Señor Diosta saminchasaq!