Read Quechua Cuzco Bible 1988 SALMOS 104 Bible Online

SALMOS 104 - Quechua Cuzco Bible 1988 bible

SALMOS 104

¹¡Tukuy sonqoywanmi Señor Diosta saminchasaq! Señorníy, mayna hatunmi kanki. Diosníy, qhapaq-kaywan lliphipipiywanmi p'achakunki,

²k'anchaywanmi llaqollawan hina p'istukunki. Qanmi hanaq pachata karpata hina chutarqanki,

³qanmi hanaq unu patapi wasiykita sayarichirqanki. Phuyukunatan carretaykiman tukuchinki, wayra patapin phawanki.

⁴Wayrakunatan kachapuriykikunaman tukuchinki, ninaq wach'isqankunatapas kamachiykikunamanmi tukuchinki.

⁵Qanmi kay pachata allinta teqsicharqanki sayashasqanmanta ama hayk'aqpas kuyurinanpaq.

⁶Kay pachatan p'achawan hina mama qochawan qataykurqanki, orqokunatan unu millp'urqan.

⁷Phiñariqtiykin unu ayqerqan, q'aqyasqayki kunununuqtinmi usqharqan.

⁸Orqokunaman wichaspa qheswakunaman uraykuspa maypichus kananpaq nisqaykiman chayarqan.

⁹Qorpatan unupaq churarqanki ama wasapananpaq, amaña hallp'a pachata millp'unanpaq.

¹⁰Qanmi wayq'okunamanta unuta phullpuchimunki, chaymi orqokuna chawpinta mayukuna phawan.

¹¹Chay unutan llapa salqa uywakuna ukyanku, chaywanmi salqa asnokuna ch'akiyninkuta thasnukunku.

¹²Chay mayu patakunapin phalaq animalkuna q'esachakunku, chay sach'a-sach'apin takiykunku.

¹³Qanmi hanaq pacha wasiykimanta orqokunata qarpamunki, llank'asqaykiwanmi hallp'a pampaqa “llaq” nishan.

¹⁴Q'achutan uywakunapaq wiñachinki, q'omerkunatan runaq allinninpaq wiñachinki, chaymi hallp'amanta mikhuyta horqon,

¹⁵kallpachaykuqnin t'antata ruwan, kusirichiqnin vinota ruwan, uya llamp'uyachina aceitetapas ruwan.

¹⁶Señor Diospa sach'ankunamanmi allinta paran, Libanopi paypa mallkisqan cedrokunamanmi allinta ch'aqchun.

¹⁷Chaykunapin pichinchukuna q'esachakun, hatunkaqninpitaq cigüeña tiyan.

¹⁸Hatun orqokunaqa salqa cabrakunapaqmi, qaqakunapitaq purun qowikuna pakakun.

¹⁹Killatan ruwarqanki mitakunata señalananpaq, intipas yachanmi imay horas haykupunanta.

²⁰Qanmi laqhayaykachinki, tutayaykapuntaq, chaypin yunka llapa animalkuna wakwarimunku.

²¹León uñakunan mikhunata maskhaspa qaparinku, mikhuchinanpaqmi Diosmanta mañakunku.

²²Inti lloqsimuqtinmi ripunku, hinaspan t'oqonkupi puñukampunku.

²³Hinan runaqa llank'ananman lloqsin, ch'isiyaykuykamataq llank'an.

²⁴Señor Diosníy, ¡imayna aqo-t'iyupunin ruwasqaykikunaqa! Llapallantan yachaywan ruwarqanki, kamasqaykikunan teqsimuyuntinta hunt'aykun.

²⁵Haqay mama qochaqa hatullanñan mast'arikushan, chaypin askhallaña animalkuna wakwarishan, hatunraq huch'uyraq.

²⁶Chaypin barcokuna purin, chaypin kamasqayki Leviatanpas pukllan, chay hatunkaray animal.

²⁷Llapallankun suyakushasunkiku tiempollanpi paykunaman mikhuchinaykipaq.

²⁸Qoykuqtiyki hinan paykunaqa chaskikunku, haywariqtiyki hinan allinkaqwan saksaykunku.

²⁹Uyaykita pakaykuqtiykiqa mancharikunkun, samayninkuta qechuqtiykiqa wañukapunkun, ñut'u hallp'amantaq tukupunku.

³⁰Kawsachiq samaywan phukuykuqtiykitaq kamasqa kanku, chakrakunatataq mosoqyachinki.

³¹¡Wiñaypaq Señor Diospa lliphlli-kayninqa kachun! ¡Señor Diosqa kamasqanwan kusikuchun!

³²Pay qhawariqtinmi kay pacha khatatatan, pay llamiykuqtinmi orqokuna q'osñirin.

³³Señor Diosmanmi kawsashaspay takisaq, Diosniytan kashaspay yupaychasaq.

³⁴Takisqaykunawan Señor Dios kusikuchun, payllawanmi ñoqaqa kusikuni.

³⁵Kay pachamanta huchasapakunaqa chinkapuchunku, millay runakunaqa tukukapuchunku. Tukuy sonqoywanmi Señor Diosta saminchasaq. ¡Yupaychasqa Señor Diosqa kachun!