Read Quechua Cuzco Bible 1988 SALMOS 105 Bible Online

SALMOS 105 - Quechua Cuzco Bible 1988 bible

SALMOS 105

¹¡Señor Diosman graciasta qoychis! ¡Paymanta mañakuychis! Ruwasqankunata llaqtakunaman willaychis.

²Señor Diosman takiychis, payman yupaychaykunata takiychis, tukuy musphana ruwasqankunata willakuychis.

³Ch'uya sutinpi kusikuychis, Señor Diosta yupaychaqkuna, kusikuychis.

⁴Señor Diosmanta mañakuychis kallpachanasuykichispaq, Señor Diosmanqa qayllaykullaychispuni.

⁵Diospa kamachin Abrahampa mirayninkuna, paypa akllakusqan Jacobpa churinkuna, Señor Diospa musphana ruwasqankunata yuyariychis, milagronkunata chaninchayninkunata yuyariychis.

⁷Paymi Apu Señor Diosninchisqa, paymi kay pachantinta kamachiqqa,

⁸Payqa rimanakusqanta yuyarillanpunin, waranqa mirayña pasaqtinpas kamachikusqantaqa yuyarillanpunin.

⁹Abrahamwan rimanakusqantaqa yuyarillanpunin, Isaacman jurasqantaqa yuyarillanpunin.

¹⁰Chaytan Jacobpaq unancharqan, Israelpaq wiñay rimanakuyta churarqan:

¹¹Qanmanmi Canaán hallp'ata qosqayki, chaymi kanqa herenciaykichis, nispa.

¹²Paykunaqa pisi runakunallan karqanku, wak llaqtayoq hinan chay hallp'api pisilla karqanku.

¹³huk llaqtamanta huk llaqtamanmi purirqanku, huk suyumanta huk suyumanmi rirqanku,

¹⁴Señor Diosqa manan piqpa sarunchanantapas munarqanchu, paykunaraykun reykunatapas anyarqan:

¹⁵Akllakusqaykunataqa aman llamiykunkichischu, profetaykunataqa aman imanankichispaschu, nispa.

¹⁶Chay suyumanmi yarqayta chayachimurqan, llapa mikhuytan tukuchirqan.

¹⁷Ñawpaqenkutan huk qharita kachasqa, kamachipaq vendesqanku Josetan kachasqa.

¹⁸Chakintan thunkunawan k'irirqanku, kunkantan cadenawan wataykurqanku.

¹⁹Señor Diospa siminmi Joseta probaykurqan, Josepa willakusqan hunt'akunankama.

²⁰Rey Faraomi payta kacharinapaq kamachikurqan, llaqtakuna kamachiqmi payta kacharichipurqan.

²¹Wasinpi kamachikunanpaqmi payta churarqan, llapa kaqninkunapi kamachikunanpaq,

²²kamachikuq runakunata munasqanman hina yachachinanpaq, kurak runakunatapas hamawt'aman horqonanpaqwan churarqan.

²³Chaymantataq Israelqa Egiptota uraykurqan, Jacobmi Kampa miraynin suyupi tiyapakurqan.

²⁴Señor Diosqa anchatapunin llaqtanta askhayachirqan, Egipto runakunamantapas astawan kallpacharqan.

²⁵Egipto runakunaq sonqontan t'ikrarqan llaqtanta cheqnikunankupaq, kamachinkunata q'otunankupaq.

²⁶Diosqa kamachin Moisestan kacharqan, akllakusqan Aarontawanmi kacharqan.

²⁷Paykunan ch'inneqpi Diospa señalninkunata ruwarqanku, Kampa miraynin suyupi utirayana musphanakunata ruwarqanku.

²⁸Egipto runakunaqa manan Diospa siminkunata chaskirqankuchu, chaymi Diosqa suyuntinman tutayaykachimurqan.

²⁹Ununkutan yawarman tukuchirqan, challwankutan wañuchirqan.

³⁰Suyunkun k'ayrata wakwachirqan, reyninkuq puñunan wasikunamanmi hunt'aykurqan.

³¹Dios rimariqtinmi askhallaña ch'uspi hunt'aykurqan, usapas Egipto suyuntinman hunt'aykurqan.

³²Parachimunantaqa chikchichimurqanmi, suyumanqa illapachimurqanmi.

³³Uvas chakrankutapas higos sach'ankutapas saqtarqanmi, suyuntin sach'akunatapas p'akirarqanmi.

³⁴Dios rimariqtinmi langostakuna chayarqan, mana yupay atina askhallañan karqan.

³⁵Suyuntin qoratan q'ararqan, chakraq llapallan rurusqantan mikhurqan.

³⁶Kikin Egiptopin llapa phiwi churinkuta wañuchirqan, llapa kurak churinkutan wañuchirqan.

³⁷Diosqa llaqtantan horqomurqan, qorintinta qolqentinta pusamurqan, ayllunku ukhupiqa manan pipas laq'akurqanchu.

³⁸Egipto runakunan puririqta rikuspanku kusikurqanku, sinchi manchasqapunin kasharqanku.

³⁹Diosmi phuyuta qatanapaq mast'apurqan, ninatataq paykunapaq tuta k'anchachirqan.

⁴⁰Mikhunata mañakuqtinkun yuthukunata chayachimurqan, hanaq pacha t'antawanmi paykunata saksachirqan.

⁴¹Qaqata ch'eqtaqtinmi unu phullpumurqan, ch'aki pampantan mayu hina phawarqan.

⁴²Kamachin Abrahamman ch'uya simi rimarisqantan yuyarirqan.

⁴³Llaqtantan q'ochukushaqta pusampurqan, akllakusqankunata may kusisqa takishaqta.

⁴⁴Wak suyukunaq hallp'antan paykunaman qorqan, chay wak llaqtakunaq llank'akusqantan hap'ikurqanku.

⁴⁵Diosqa munarqan kamachikusqankunata hunt'anankutan, yachachisqankunatapas kasunankutan. ¡Yupaychasqa Señor Diosqa kachun!