Read Quechua Cuzco Bible 1988 SALMOS 109 Bible Online

SALMOS 109 - Quechua Cuzco Bible 1988 bible

SALMOS 109

¹Davidpa takin Yupaychanay Diosníy, ama upallakuyñachu.

²Llullakuy simiwanmi, mana chanin simiwanmi millayta rimakuwanku, llullakuspan k'amiwanku.

³Cheqnikuyta munaspan muyuykuwanku, yanqa-qasipunin maqawanku.

⁴Paykunatan munakuni, chaypas paykunaqa tumpakuywanmi kutichiwanku, ñoqataq ichaqa paykunapaq mañapuni.

⁵Allinkaqmantan mana allinkaqwan kutichiwanku, munakusqaymantan cheqnikuwanku.

⁶Millay runata paypaqqa juezta churay, juzganapi paytaqa ch'atachunku.

⁷Juzgasqa kaspa huchachasqa kachun, mañakusqallantaq paytaqa huchachachun.

⁸Ama unaytachu kawsachun, wak runataq ruwananta hap'ichun.

⁹Wawankuna mana taytayoq kapuchun, warminpas viuda kapuchun.

¹⁰Wawankunapas tomaqaya kapuchun, mañapakuspa purichun, thunisqa wasinkumanta paykunata wikch'upuchunku.

¹¹Manuqnin lliw kaqninkunata hap'ikuchun, wak llaqtayoqkuna llank'asqanta llat'anachun.

¹²Ama pipas khuyapayaykuqnin kachunchu, amallataq wakcha wawankunata pipas llakipayaykuq kachunchu.

¹³Llapa miraynin tukukapuchun, qhepa miraypi sutin wiñaypaq chinkapuchun.

¹⁴Taytanpa huchallikusqanta Señor Diosqa yuyarichun, mamanpa huchallikusqanpas amataq chinkachunchu,

¹⁵Señor Diosqa huchankuta yuyarishallachunpuni, kay pachapipas paykunata qonqachipuchun.

¹⁶Manan payqa llakipayakuyta yuyarillarqanpaschu, aswanmi payqa wakchakunata khuyaykunata qatiykacharqan, llakiq ñit'isqankunatapas wañuchinankama.

¹⁷Hukkunataqa ñakayllatapuni munaqmi karqan, kunanqa ñakasqallataq paypas kachun. Manapunin saminchayta munaqchu karqan, paypas amallataq saminchasqachu kachun.

¹⁸Paypaqqa p'acha churakuy hinan ñakayqa karqan, paypaqqa unu ukyaykuy hinan ñakayqa karqan, paypaqqa aceite hinan ñakayqa tullunkunaman wiswiykurqan.

¹⁹Ahinaqa p'acha hina payta p'istuykuchun, chumpi hinataq payta chumpiykullachunpuni.

²⁰Ch'atawaqniykunaqa chay hinatapunin Señor Diosniymanta chaskinku, ñoqamanta millayta rimaqkunaqa chay hinapunin kapunku.

²¹Qollana Señor Diosníy, qan ichaqa yanapaykuway, sutiyki yupaychasqa kananpaq, munakuq sonqo kaspayki qespichiway.

²²Wakchataqmi mana imayoqtaqmi kashani, sonqo nanasqan kashani.

²³Llanthu hinan chinkaripushani, chhaphchirparisqa ch'uspi hinan kashani.

²⁴Ayunasqaywanmi moqoykuna mana takyanchu, mana mikhuspaymi tulluyapushani.

²⁵Runakunaq asipayananmi kani, rikuwaspankun asikuspa umankuta maywikunku.

²⁶Yanapaykuway, Apu Señor Diosníy, mana p'itiyta munakuwaspayki qespichiway.

²⁷Kayqa qanpa ruwasqayki kasqanta yachachunku, Señor Diosníy, qanpa qespichiwasqayki kasqanta yachachunku.

²⁸Paykunaqa ñakashawachunkupas, qantaq saminchashallawaypuni. Paykunaqa sayarichunkupas, ichaqa p'enqachisqa kachunku, kamachiykitaq kusikuchun.

²⁹Ch'ataqniykunaqa anchatapuni p'enqakuchun, p'enqasqa k'umuykachachun.

³⁰Anchatapunin Señor Diosta: Gracias, nisaq, askha runa ukhupin payta yupaychasaq.

³¹Payqa wakcha runamanmi sayakun wañunaman huchachaqkunamanta qespichinanpaq.