Read Quechua Cuzco Bible 1988 SALMOS 115 Bible Online

SALMOS 115 - Quechua Cuzco Bible 1988 bible

SALMOS 115

¹Señor Diosniyku, ama ñoqaykutachu hatunchawayku, aswanpas hunt'aq kasqaykirayku, mana p'itiy munakuq kasqaykirayku, sutiykita hatunchakuy.

²¿Imanaqtintaq mana iñiyniyoqkunari ninkuman: ¿Maypitaq Diosninkuri? nispanku?

³Diosninchisqa hanaq pachapin kashan, tukuy ima munasqantan ruwan.

⁴Idolonkuqa qolqemantawan qorimantawanmi, runaq ruwasqallanmi.

⁵Simiyoqmi, manataq rimankuchu, ñawiyoqmi, manataq rikunkuchu,

⁶ninriyoqmi, manataq uyarinkuchu, senqayoqmi, manataq muskhinkuchu,

⁷makiyoqmi, manataq llaminkuchu, chakiyoqmi, manataq purinkuchu, manan rimarillankupaschu.

⁸Idolokunata ruwaqkunaqa, idolokunapi iñiqkunaqa, chaykunamanmi rikch'akunqaku.

⁹Israel runakuna, ¡Señor Diosman sonqollikuychis! paymi yanapaykuqniykichispas waqaychaykuqniykichispas.

¹⁰Aarón ayllu, ¡Señor Diosman sonqollikuychis! paymi yanapaykuqniykichispas waqaychaykuqniykichispas.

¹¹Señor Diosta manchakuqkuna, ¡payman sonqollikuychis! paymi yanapaykuqniykichispas waqaychaykuqniykichispas.

¹²Señor Diosqa yuyarikuwanchismi, saminchaykuwasunmi. Israel runakunatan saminchaykunqa, Aarón ayllutan saminchaykunqa,

¹³manchakuqninkunatan saminchaykunqa, huch'uykunatapas hatunkunatapas.

¹⁴Señor Diosña astawan mirachisunkichis, qankunatapas wawaykichistapas.

¹⁵Hanaq pachatapas kay pachatapas kamaq Señor Diosña saminchasunkichis.

¹⁶Hanaq pachaqa Señor Diospa kaqninmi, kay pachatataqmi runaman qorqan.

¹⁷Manan wañusqakunaqa Señor Diosta yupaychanqachu, manan hayk'an Wañuy-pachaman uraykuqkunapas hatunchanqachu.

¹⁸Ñoqanchis kawsashaqkunan ichaqa kunanmanta wiñay-wiñaypaq Señor Diosta saminchasunchis. ¡Yupaychasqa Señor Diosqa kachun!