Read Quechua Cuzco Bible 1988 SALMOS 119 Bible Online

SALMOS 119 - Quechua Cuzco Bible 1988 bible

SALMOS 119

¹Kusisamiyoqmi ch'uya kawsaypi puriqkunaqa, Señor Diospa yachachisqan simiman hina puriqkunaqa.

²Kusisamiyoqmi kamachikusqan simikunata hunt'aqkunaqa, Señor Diosta tukuy sonqo serviqkunaqa.

³Kusisamiyoqmi Señor Diospa ñanninkunapi puriqkunaqa ima mana chanintapas mana ruwaqkunaqa.

⁴Qanmi kamachikurqanki sut'inchasqaykikunaqa allin waqaychasqapuni kananpaq.

⁵Maytan munani qaqa sayayta unanchasqa simiykikunata kasunaypaq.

⁶Chaypachan mana imamantapas p'enqakusaqchu llapa kamachikuyniykikunata sonqoypi hap'ispay.

⁷Cheqaq sonqowanmi yupaychasqayki chayasqa chaninchasqaykikunata yachaspay.

⁸Kamachikusqaykikunatan hunt'asaq. ¡Amapuni saqerpariwaychu!

⁹¿Imaynatan waynaqa ch'uyata kawsanqa? Simiykiman hina purispanmi ch'uyata kawsanqa.

¹⁰Tukuy sonqon serviyki, ama munaychu kamachikuyniykikunamanta t'aqakunayta.

¹¹Simiykikunatan sonqoypi waqaychashani, ama qan contra huchallikunaypaq.

¹²Señor Diosníy ñoqan saminchayki, unanchasqa simiykikunata yachachiway.

¹³Simiywanmi willani tukuy rimarisqayki chaninchasqaykikunata.

¹⁴Kamachikusqaykikunata hunt'aspaymi kusikuni, qhapaqllaña-kaymantapas astawanraqmi q'ochukuni.

¹⁵Sut'inchasqaykikunatan yuyaymanani, munayniykitan yuyani.

¹⁶Unanchasqaykikunawanmi q'ochukuni, manan simiykikunataqa qonqapunichu.

¹⁷¡Kay kamachiykita allinta rikuway, kawsanaypaq simiykitapas kasunaypaq!

¹⁸Ñawiyta kichariway, yachachisqayki simipi musphanakunata rikunaypaq.

¹⁹Ñoqaqa kay pachapi wak llaqtayoqmi kani, ama kamachikuyniykikunata pakaykuwaychu.

²⁰P'unchay-ch'isiyaqmi sonqoy mat'iykushawan, chaninchasqa simiykikunata yachayta munaykuspa.

²¹Qanmi anchaykachaqkunata phiñarinki, kamachikuyniykikunamanta t'aqakuqkunaqa ñakasqan kanku.

²²Paykunan k'amiwanku pisichawanku, chaykunamanta karunchaway, kamachikusqaykikunata kasusqayrayku.

²³Kamachikuqkunaqa hina contrayta rimashachunku, kay kamachiykiqa unanchasqa simiykikunatan yuyaymanasaq.

²⁴Kamachikusqaykikunawanmi kusikuni, chaykunaqa yuyaychawaqniykunan.

²⁵Umphuyapushaniñan, prometewasqaykiman hina kawsarichiway.

²⁶Imayna kawsasqaytan willarqayki, qantaq kutichimuwarqanki. ¡Unanchasqa simiykikunata yachachiway!

²⁷Sut'inchasqa simiykikunata reqsichiway, musphana ruwasqaykikunapin yuyaymanasaq.

²⁸Llakiy waqaykunapin heq'epashani, ¡prometewasqaykiman hina allinta kallpachaway!

²⁹Pantachiq ñanmanta karunchaway, sumaq sonqoykiwan yachachikuy simiykiman hina kawsachikuway.

³⁰Hunt'aq runa kaytan yuyaykurqani, chaninchasqa simiykikunatan sonqoypi hap'ini.

³¹Señor Diosníy, kamachisqa simiykikunamanmi k'askakuni, ¡ama p'enqachiwaychu!

³²Astawan yuyayniyta paskariwaqtiykin, kamachikuyniykikunata k'uchilla hunt'ani.

³³Señor Diosníy, unanchasqa simiykikunata yachachiway, kawsashanaykamaqa hunt'asaqmi.

³⁴Yachachikuy simiykita sut'inchapuway, chayta hunt'anaypaq tukuy sonqo chayta kasunaypaq.

³⁵Kamachikuyniykikunaman hina kawsarichiway, chay hinata kawsaspaymi kusikuni.

³⁶Kamachikusqaykikunaman sonqollichiway, mana chaninpi qolqe tariymanqa amataq pusawaychu.

³⁷Hark'aykuway ama yanqa dioskunata qhawanaypaq, atiyniykiwan kawsarichiway.

³⁸Manchakuqniykikunamanmi prometenki, chayta kay kamachiykipaq sayachipuway.

³⁹Runaq simin manchakusqayta karunchaway, chaninchayniykikuna allin kasqanrayku.

⁴⁰Kayqa, sut'inchasqaykikunatan anchatapuni munaykushani, qanqa chaninmi kanki, chayrayku kawsachiway.

⁴¹Señor Diosníy, munakuyniykita rikuchiway, prometewasqaykiman hina qespichiway.

⁴²Chaypachan k'amiwaqniyman kutichisaq, simiykiman hap'ipaykukusqayrayku.

⁴³Cheqaq simillatapuni rimachiway, chaninchayniykikunapi suyakushasqayrayku.

⁴⁴Yachachikuy simiykitaqa hunt'allasaqpunin, wiñay-wiñaynintinpaq.

⁴⁵Chaymi mana imanasqalla purisaq, sut'inchasqa simiykikunata t'aqwishasqayrayku.

⁴⁶Kamachisqa simiykikunatan reykunaman willasaq, manataqmi p'enqakusaqchu.

⁴⁷Kamachikuyniykikunan kusichiwan, chaykunatan munakuni.

⁴⁸Kamachikuyniykikunatan hatunchaspa munakuni, unanchasqa simiykikunapin yuyaymanani.

⁴⁹Kay kamachiykiman prometewasqayki simita yuyariy, chaypin suyachiwarqanki.

⁵⁰Prometewasqaykin kawsarichiwan, chaymi llakikuyniypi sonqochawan.

⁵¹Uma hoqariqkunan sinchitapuni asipayawanku, chaypas manan yachachikuy simiykimantaqa t'aqakunichu.

⁵²Ñawpa p'unchaykunapi chaninchasqa simiykikunatan yuyarini, Señor Diosníy, chaykunan sonqochawan.

⁵³Yachachikuy simiykita saqepuq millay runakunata qhawarispaymi k'arakta phiñakuni.

⁵⁴Kay wak llaqtayoq kasqay pachapin unanchasqa simiykikunata takini.

⁵⁵Señor Diosníy, tutan sutiykita yuyarini, yachachikuy simiykitan yuyani.

⁵⁶Chay hinatapunin ruwarqani, sut'inchasqa simiykikunata kasukuspa.

⁵⁷Señor Diosníy, qanmi tukuy imaymanayqa kanki, simiykikunata hunt'anaypaqmi rimariniña.

⁵⁸Tukuy sonqoywanmi sumaqta qhawariwanaykipaq mañakurqayki, prometewasqaykiman hina khuyapayaway.

⁵⁹Imaynatachus kawsasqaytan qhawarirqani, kamachikusqayki simikunatan kasunaypaq kutirirqani.

⁶⁰Usqhayllan kamachikuyniykikunata hunt'ani, chaykunataqa hunt'anipunin.

⁶¹Millay runakunan toqllakunawan muyuykuwanku, chaypas manan yachachikuy simiykitaqa qonqapunichu.

⁶²Chanin kuskachasqaykikunamantan chawpi tutata agradecekuq sayarimuni.

⁶³Llapan manchakuqniykikunaq-masinmi kani, sut'inchasqaykikunata hunt'aqkunaq amigonmi kani.

⁶⁴Señor Diosníy, munakuyniykin kay pachata hunt'aykushan. ¡Unanchasqa simiykikunata yachachiway!

⁶⁵Señor Diosníy, prometewasqaykita hunt'aspan sumaqta kamachiykita rikuwarqanki.

⁶⁶Kamachikuyniykikunamanmi k'askakuni, chayrayku allin yuyayniyoq kayta allin reparaq kaytawan yachachiway.

⁶⁷Manaraq k'umuykachisqa kashaspayqa anchatan pantarqani, kunanmi ichaqa simiykita kasukuni.

⁶⁸Qanqa allinmi kanki, allintataq ruwankipas, unanchasqa simiykikunata yachachiway.

⁶⁹Anchaykachaqkunan llullakuspa ch'atawanku, ñoqan ichaqa unanchasqaykikunata tukuy sonqo hunt'ani.

⁷⁰Paykunaqa sinchi k'ankaykachaqmi kanku, ñoqan ichaqa yachachikuy simiykiwan kusikuni.

⁷¹Allinniypaqmi k'umuykachisqa kasqayqa karqan, ahinapin unanchasqa simiykikunata yacharqani.

⁷²Ñoqapaqqa yachachikuy simiykikunan aswan allin waranqa-waranqa qorimantapas qolqemantapas.

⁷³Qan kikiykin kamawarqankipas uywawarqankipas, yuyayta qoway kamachikuyniykikunata yachanaypaq.

⁷⁴Manchakuqniykikunaqa rikuwaspankun kusikunku, simiykipi suyakushasqayrayku.

⁷⁵Señor Diosníy, yachanin kuskachasqa simiykikunaqa chanin kasqanta, hunt'aq kaspayki llakichiwasqaykitapas.

⁷⁶Mana p'itiy munakuyniyki sonqochawachun, kamachiykiman prometewasqaykiman hina.

⁷⁷Yachachikuy simiykiwanmi kusikushani, khuyapayaway, chaymi kawsasaq.

⁷⁸Uma hoqariqkuna p'enqachisqa kachunku yanqapuni tumpawasqankumanta, ñoqataq sut'inchasqa simiykikunapi yuyaymanasaq.

⁷⁹Manchakuqniykikuna asuykamuwachunku kamachikusqayki simikunata yachanankupaq.

⁸⁰Unanchasqa simiykikunaman allin kasukuqta ruwaway, ama imamantapas p'enqakunaypaq.

⁸¹Peqtuyapuniñan qespichiwanaykita suyakuspa, simiykitan suyakushani.

⁸²Ñawiymi utipun prometewasqaykita suyakushaspa: ¿Hayk'aqtaq sonqochawanki? nishaqtiy.

⁸³Qechinchakama qara hinaña kani chaypas, manan unanchasqa simiykikunata qonqapunichu.

⁸⁴¿Hayk'a watataq kamachiykiqa kawsasaq? ¿Hayk'aqtaq qatiykachawaqniykunata huchachanki?

⁸⁵Anchaykachaqkunaqa t'oqokunatan ñoqapaq hasp'irqanku, paykunaqa manapunin yachachisqayki simita kasunkuchu.

⁸⁶Llapa kamachikuyniykikunaqa cheqaqkaman, ichaqa q'otuspan muchuchiwanku. ¡Llapa kamachikusqaykikunaqa cheqaqkaman! ¡Yanapaykuway!

⁸⁷Yaqallan kay pachamanta chinkachiwarqanku, ichaqa manan sut'inchasqa simiykikunata saqenichu.

⁸⁸Munakuwaspayki kawsachikuway, hinan kamachisqa simiykikunata hunt'asaq.

⁸⁹Señor Diosníy, wiñaypaqmi simiykiqa, hanaq pachapi allin takyachisqan kashan.

⁹⁰Cheqaq-kayniykiqa wiñay-wiñaypaqmi kashallanpuni, qanmi kay pachata allinta takyachirqanki, chaymi mana kuyurinchu.

⁹¹Tukuy imaymanan kunankama kashan, qanmi chay hina kananpaq kamachikurqanki, llapallanmi kamachiykikuna.

⁹²Yachachikuy simiyki mana kusikunay kaqtinqa, ñan llakikuspa tukukuymanña karqan.

⁹³Manan hayk'aqpas sut'inchasqa simiykikunata qonqasaqchu, chaykunawanmi kawsachiwarqanki.

⁹⁴Qanpan kani, qespichiway, sut'inchasqa simiykikunatan munaykushani.

⁹⁵Millay runakunan wañuchiwanankupaq suyapawanku, ñoqataq unanchasqa simiykikunata yuyani.

⁹⁶Tukuy hunt'asqa ruwasqatapas tukukapuqllatan rikuni, kamachikuyniykikunan ichaqa mana tukukuq.

⁹⁷¡Maytapunin yachachikuy simiykitaqa munakuni! P'unchay-ch'isiyaqmi chayllapiña yuyaykuni.

⁹⁸Kamachikuyniykikunaqa ñoqallawanpunin kashan, chaykunan awqaykunamantapas aswan yachayniyoqman tukuchiwan.

⁹⁹Kamachisqa simiykikunapi anchata yuyaykusqayraykun llapa yachachiwaqniykunamantapas astawan yachapuni.

¹⁰⁰Sut'inchasqa simiykikunatan kasukuni, chaymi unayniyoq runakunamantapas aswan yuyayniyoq kapuni.

¹⁰¹Simiykita hunt'anaypaqmi tukuy mana allin ñanman mana thaskiykunichu.

¹⁰²Qan kikiyki yachachiwasqaykiraykun kuskachasqaykikunamanta mana t'aqakunichu.

¹⁰³Simiypi ancha misk'in simiykikunaqa, ñoqapaqqa miel misk'imantapas aswan misk'in.

¹⁰⁴Sut'inchasqa simiykikunawanmi yuyayta hap'ini, chaymi llapa llulla kawsayta cheqnikuni.

¹⁰⁵Simiykiqa purinaypaq lamparan, simiykiqa ñanniypaqmi k'anchay.

¹⁰⁶Jurarqanin, hunt'asaqtaqmi, chanin kuskachasqaykikunatan hunt'asaq.

¹⁰⁷Señor Diosníy, maytapunin llakikushani, ¡prometewasqaykiman hina kawsachiway!

¹⁰⁸Señor Diosníy, agradecekuyniykunata chaskiykuway, chaninchasqaykikunatapas yachachiway.

¹⁰⁹Wañuyqa qatiykachashallawanpunin, ichaqa manan yachachikuy simiykita qonqapunichu.

¹¹⁰Millay runakunan ñoqapaq toqllata churanku, ichaqa manan sut'inchasqa simiykikunamanta t'aqakunichu.

¹¹¹Kamachikusqaykikunan wiñay herenciaykuna, chaykunan sonqoyta kusirichiwan.

¹¹²Unanchasqa simiykikuna hunt'aymanmi sonqollikuni, wiñay samiyoqmi kasaq.

¹¹³Iskay uya runakunatan cheqnikuni, yachachikuy simiykitataq munakuni.

¹¹⁴Qanmi pakaykuwaqniypas hark'aykuwaqniypas kanki, ñoqaqa simiykipin suyakuni.

¹¹⁵Millaykuna, qayllaymanta anchhuriychis, Diosniypa kamachikuyninkunata hunt'anaypaq.

¹¹⁶Prometewasqaykiman hina kallpachaway, hinan kawsasaq, ¡ama yanqachu suyachiway!

¹¹⁷Yanapaykuway, qespichisqan kasaq, unanchasqa simiykikunataqa hunt'allasaqpunin.

¹¹⁸Qanmi unanchasqa simiykikunamanta t'aqakuqkunata pisicharparinki, ídolo yupaychayninkuqa yanqalla kasqanrayku.

¹¹⁹Q'opata hinan kay pacha lliw millay runakunata wikch'unki, chaymi ñoqaqa kamachisqa simiykikunata munakuni.

¹²⁰Cuerpoymi manchakuspasuyki chhukukukun, huchachaq simiykikunatan manchapakuni.

¹²¹Chaninkaqtan allinkaqtan ruwarqani, ama sarunchaqniykunaman saqerpariwaychu.

¹²²Prometeway kamachiykita yanapawanaykipaq ama uma hoqariqkuna muchuchiwanankupaq.

¹²³Qespichiwanaykita suyakuspan ñawiy utipushanña, prometewasqaykiman hina chaninchawanaykita suyakuspa.

¹²⁴Munakuyniykiman hina kay kamachiykita rikuway, unanchasqa simiykikunata yachachiway.

¹²⁵Kamachiykin kani, yuyayta qoway kamachikusqaykikunata yachanaypaq.

¹²⁶Señor Diosníy, yachachikuyniykitan mana kasupunkuchu, chay hinaqa paykunata muchuchinaykipaq tiempoñan.

¹²⁷Kamachiykikunatan qorimantapas astawanraq munakuni, sinchi ch'uya qorimantapas astawanpuniraq munakuni,

¹²⁸chaymi llapallan sut'inchasqa simiykikunaman hina kawsani, tukuy llulla kawsaytataq cheqnikuni.

¹²⁹Unanchasqa simiykikunaqa utirayachikunmi, chaymi chaykunata kasuni.

¹³⁰Simiykikuna sut'i willasqaqa runatan k'anchan, wawa sonqokunamanmi yuyayta qon.

¹³¹Kamachikuyniykikunata anchatapuni munaspaymi, mikhuykuyta munaq hina kani.

¹³²Qhawarimuway, khuyapayaykuway, imaynatachus munakuqniykikunapaq ruwanki hinata.

¹³³Simiykiwan allinta purichiway, ama ima mana allinpas atipawananta munaychu.

¹³⁴Runakunaq alqochakuyninmanta qespichiway, sut'inchasqa simiykikunata hunt'anaypaq.

¹³⁵Sumaqta kay kamachiykita qhawarimuway, unanchasqa simiykikunatapas yachachiway.

¹³⁶Unuy paratan waqani yachachikuy simiykita mana kasukusqankurayku.

¹³⁷Señor Diosníy, qanqa chaninmi kanki, kuskachasqaykikunapas chaninkaman.

¹³⁸Ancha chaninmi churasqayki kamachikusqaykikunaqa, llapapaqmi chaninkama cheqaqkama.

¹³⁹Sonqoymi chhallchashan, simiykikunata awqaykuna qonqapuqtinku.

¹⁴⁰Cheqaqllañan simiykiqa, chaymi kamachiykiqa chayta munakuni.

¹⁴¹Huch'uyllan kani, qhawarparisqan kani, chaypas manan sut'inchasqa simiykikunata qonqapunichu.

¹⁴²Chaninchayniykiqa wiñaypaq chaninmi, yachachikuy simiykipas cheqaqmi.

¹⁴³Llaki-phutiymi ñit'iwan, kamachikuyniykikunataq kusichiwan.

¹⁴⁴Chanillanpunin unanchasqa simiykikunaqa, kawsanaypaq yuyayta qoway.

¹⁴⁵Señor Diosníy, tukuy sonqon waqyakamuyki, kutichimuway, unanchasqa simiykikunatan hunt'asaq.

¹⁴⁶Qantan waqyakamuyki, qespichiway, kamachikusqaykikunatan hunt'asaq.

¹⁴⁷Manaraq pacha illarimushaqtinmi sayarimuspay yanapaykamuwanaykipaq mañakamuyki, prometewasqaykipin suyakuni.

¹⁴⁸Tutantinmi ñawiyqa qhawashan prometewasqaykipi yuyaykunaypaq.

¹⁴⁹Señor Diosníy, munakuyniykiman hina kunkayta uyariykuway, chanin-kayniykiman hina kawsachiway.

¹⁵⁰P'enqa kawsayman phawaqkunan asuykamuwanku, yachachikuyniykimantan karunchakapunku.

¹⁵¹Señor Diosníy, qanqa qayllallaypin kashanki, llapa kamachikuyniykikunapas cheqaqkaman.

¹⁵²Kamachikusqaykikunata wiñaypaq churasqaykitaqa unayñan yachani.

¹⁵³Llakikusqayta qhawarispa qespichiway, manan yachachikuy simiykitaqa qonqapunichu.

¹⁵⁴Amachaykuway, kacharichiway, prometekusqaykiman hina kawsachiway.

¹⁵⁵Millay runakunaqa manan qespichisqachu kanqaku, unanchasqa simiykikunata mana kasusqankurayku.

¹⁵⁶Señor Diosníy, ancha sumaq sonqon kanki, chaninchayniykiman hina kawsachiway.

¹⁵⁷Askhan awqaykunapas sarunchaqniykunapas, ichaqa manan kamachisqa simiykikunamanta t'aqakunichu.

¹⁵⁸Millakunin wasanchaqniykikunata qhawarispa, kamachikuyniykikunata mana kasukusqankurayku.

¹⁵⁹Señor Diosníy, qhawariy imaynatachus sut'inchasqa simiykikunata munakusqayta, munakuyniykiman hina kawsachiway.

¹⁶⁰Llapa simiykiqa cheqaqmi, llapa chanin kuskachayniykikunaqa wiñaypaqmi.

¹⁶¹Kamachikuqkunan yanqa-nisqa qatiykachawanku, sonqoymi ichaqa simiykikunata manchakun.

¹⁶²Simiykiwanmi q'ochukuni, askha qhapaq-kayta tariq runa hina.

¹⁶³Llullakuytan cheqnikuni millakuni, yachachikuy simiykitan ichaqa munakuni.

¹⁶⁴Chanin kuskachasqaykikunamantan qanchis kutita p'unchaypi yupaychayki.

¹⁶⁵Yachachikuy simiykita munakuqkunaqa sumaqllatañan kawsanku, manan paykunataqa imapas misk'achinchu.

¹⁶⁶Señor Diosníy, qespichiwanaykitan suyakuni, kamachikuyniykikunatataq hunt'ani.

¹⁶⁷Kamachisqa simiykikunatan kasuni, tukuy sonqon chaykunata munakuni.

¹⁶⁸Kamachikusqaykikunatan sut'inchasqaykikunatan kasuni, qanqa tukuy imayna kawsasqaytan yachanki.

¹⁶⁹Señor Diosníy, waqyakusqayta uyariykamuway, simiykiman hina yuyayta qoway.

¹⁷⁰Mañakusqayta uyariykamuway, prometewasqaykiman hina qespichiway.

¹⁷¹Unanchasqa simiykikunatan yachachiwarqanki, chaymi anchatapuni yupaychasqayki.

¹⁷²Llapan kamachikuyniykikunan chaninkama, chaymi simiykimanta takisaq.

¹⁷³Sut'inchasqa simiykikunata kasunaypaqmi yuyaykukuni, makilla yanapaykuwanaykipaq kay.

¹⁷⁴Señor Diosníy, maytan qespichiwanaykita munani, yachachikuy simiykiwanmi q'ochukushani.

¹⁷⁵Qanta yupaychanaypaq kawsachiway, chaninchasqa simiykikuna yanapaykuwachun.

¹⁷⁶Chinkasqa oveja hinan puriripurqani, ichaqa manan kamachikuyniykikunata qonqapurqanichu, chayrayku kamachiykita maskhaq hamuy.