Read Quechua Cuzco Bible 1988 SALMOS 132 Bible Online

SALMOS 132 - Quechua Cuzco Bible 1988 bible

SALMOS 132

¹Señor Diosníy, Davidmanta yuyarikuy, tukuy sasachakuy muchusqankunamanta yuyarikuy.

²Jacobpa Kallpayoq Diosnin, Davidpa prometekusqasuykimanta yuyarikuy, simi kacharisqasuykimanta yuyarikuy. Paymi nisqa:

³Manan wasiyta haykusaqchu, manan puñunaypipas puñusaqchu,

⁴manan puñurillasaqpaschu, manan ch'illmiykullasaqpaschu,

⁵Señor Diospaq tiyana wasita ruwanaykama, Jacobpa Kallpayoq Diosninpaq wasita sayarichinaykama, nispa.

⁶Efrata suyupin rimanakuy cajaqa kashan, nisqata uyarirqayku, Jaar nisqa sach'a-sach'apin chayta tarimurqayku.

⁷¡Señor Diospa ch'uya tiyananman risunchis! ¡Ñawpaqenpi qonqorikusunchis! nirqayku.

⁸Señor Diosníy, atiyniykita rikuchiq cajantin sayariy, samakunaykimantaq hampuy.

⁹Sacerdoteykikuna chaninllatapuni kawsashachunku, qan sonqo runaykikunapas kusisqa qaparichunku.

¹⁰Kamachiyki Davidman prometesqaykirayku akllakusqayki reyta ama qonqarpariychu.

¹¹Cheqaqtapunin Señor Diosqa Davidman jurarqan: Huknin churiykitan reyta churasaq. Churiykikunachus rimanakuyniytapas paykunaman yachachisaq chay kamachikusqakunatapas hunt'anqaku chayqa, churinkupas suyupiqa kamachikushallanqakupunin, nispa. Chay jurasqantan Señor Diosqa mana yanqayachinqachu.

¹³Señor Diosqa Sión orqotan akllakurqan, tiyananpaqmi chayta munarqan:

¹⁴Sionta munakuspaymi chaypi kamachikusaq, Sionmi wiñaypaq samakunayqa.

¹⁵Askha mikhunawanmi saminchasaq, wakcha runankunatan t'antawan saksachisaq.

¹⁶Sacerdotenkunatapas chaninllatapunin kawsachisaq, ñoqa sonqo runankunapas kusisqallaña qaparinqaku.

¹⁷Chaypin Davidpa atiyninta wakmanta paqarichisaq, akllakusqay reypaqmi lamparata wakichipuniña.

¹⁸Awqankunatan p'enqasqata k'umuykachisaq, paypa coronantaqmi sumaqta k'ancharinqa, nispa.