Read Quechua Cuzco Bible 1988 SALMOS 135 Bible Online

SALMOS 135 - Quechua Cuzco Bible 1988 bible

SALMOS 135

¹¡Yupaychasqa Señor Diosqa kachun! Señor Diospa sutinta yupaychaychis. Señor Diospa kamachinkuna, Señor Diospa wasinpi serviqkuna, Diosninchispa wasi pationpi serviqkuna, payta yupaychaychis.

³Señor Diosta yupaychaychis, payqa allinmi, sutinman takikunata takiychis, chayqa sumaqmi.

⁴Jacobtan Señor Diosqa paypaq akllakurqan, Israeltan kaqnin kananpaq akllakurqan.

⁵Ñoqaqa yachanin Señor Diosqa hatun kasqanta, llapa dioskunamantapas Señor Diosninchis aswan hatun kasqanta.

⁶Señor Diosqa ima munasqantan ruwan hanaq pachapipas kay pachapipas mama qochakunapipas ukhunkunapipas.

⁷Kay pachaq k'uchunmantan phuyukunata wicharichimun, para ukhupin lliphllikichimun, wayraq lloqsimunanmantan wayrachimun.

⁸Paymi Egipto suyupi phiwi churikunata wañuchirqan, ñawpaq wachay uywakunatapas sipirqan.

⁹Paymi Egipto suyuman rikhurichimurqan musphana ruwasqa señalkunata, rey Faraón contrapas, llapa oficialnin contrapas.

¹⁰Paymi askha hatun suyukunata k'irirqan, atiyniyoq reykunatan wañuchirqan.

¹¹Amor suyu rey Sehontan wañuchirqan, Basán suyu rey Ogtan wañuchirqan, Canaán suyupi llapa reykunatan wañuchirqan.

¹²Hallp'ankutataq herencia kananpaq rakirqan, Israel llaqtanpa chayaqen kapunanpaq.

¹³Señor Diosníy, sutiykiqa wiñaypaqmi, Señor Diosníy, sapanka miraypin yuyarisqallapuni kanki.

¹⁴Señor Diosqa llaqtanpaqmi chaninchapunqa, kamachinkunatan khuyapayanqa.

¹⁵Mana iñiyniyoqkunaq idolonkunaqa qolqemantawan qorimantawanmi, runaq ruwasqallanmi.

¹⁶Simiyoqmi, manataq rimankuchu, ñawiyoqmi, manataq rikunkuchu,

¹⁷ninriyoqmi, manataq uyarinkuchu, manan samarillankupaschu.

¹⁸Idolokunata ruwaqkunaqa idolokunapi iñiqkunapas chaykunamanmi rikch'akunqaku.

¹⁹¡Israel runakuna, Señor Diosta saminchaychis! ¡Aarón ayllu, Señor Diosta saminchaychis!

²⁰¡Leví ayllu, Señor Diosta saminchaychis! ¡Señor Diosta manchakuqkuna, payta saminchaychis!

²¹¡Jerusalenpi tiyaq Señor Diosqa Sionmantapacha saminchasqa kachun! ¡Yupaychasqa Señor Diosqa kachun!