Read Quechua Cuzco Bible 1988 SALMOS 136 Bible Online

SALMOS 136 - Quechua Cuzco Bible 1988 bible

SALMOS 136

¹Señor Diosta agradecekuychis, payqa allinmi, munakuyninqa wiñaypaqmi.

²Dioskunaq Diosninta agradecekuychis, munakuyninqa wiñaypaqmi.

³Apukunaq Apunta agradecekuychis, munakuyninqa wiñaypaqmi.

⁴Payllan musphana hatuchaqkunata ruwan, munakuyninqa wiñaypaqmi.

⁵Paymi yachayninwan hanaq pachata ruwarqan, munakuyninqa wiñaypaqmi.

⁶Paymi unu pataman hallp'ata mast'arirqan, munakuyninqa wiñaypaqmi.

⁷Paymi intita killata ruwarqan, munakuyninqa wiñaypaqmi.

⁸Intitan p'unchay k'anchananpaq ruwarqan, munakuyninqa wiñaypaqmi.

⁹Killatan ch'askakunatan tuta k'anchananpaq ruwarqan, munakuyninqa wiñaypaqmi.

¹⁰Paymi Egipto suyu phiwi churikunata wañuchirqan, munakuyninqa wiñaypaqmi.

¹¹Paymi Egiptomanta Israel runakunata horqomurqan, munakuyninqa wiñaypaqmi,

¹²kallpasapa makinta haywarisqanwanmi horqomurqan, munakuyninqa wiñaypaqmi.

¹³Paymi Puka Qochata iskayman t'aqarqan, munakuyninqa wiñaypaqmi.

¹⁴Chay ukhuntan Israel llaqtata chimpachimurqan, munakuyninqa wiñaypaqmi,

¹⁵Faraontataq soldadonkunatawan Puka Qochawan millp'uchirqan, munakuyninqa wiñaypaqmi.

¹⁶Paymi ch'in pampanta llaqtanta pusarqan, munakuyninqa wiñaypaqmi.

¹⁷Paymi hatun reykunata wañuchirqan, munakuyninqa wiñaypaqmi.

¹⁸Atiyniyoq reykunatan wañuchirqan, munakuyninqa wiñaypaqmi.

¹⁹Amor suyu rey Sehontan wañuchirqan, munakuyninqa wiñaypaqmi,

²⁰Basán suyu rey Ogtan wañuchirqan, munakuyninqa wiñaypaqmi.

²¹Paymi chay reykunaq hallp'anta herencia kananpaq rakirqan, munakuyninqa wiñaypaqmi,

²²kamachin Israelman chayta qorqan chayaqen kapunanpaq, munakuyninqa wiñaypaqmi.

²³Paymi llakiq ñit'isqan kashaqtinchis yuyarikuwarqanchis, munakuyninqa wiñaypaqmi.

²⁴Paymi awqanchiskunamanta kacharichiwarqanchis, munakuyninqa wiñaypaqmi.

²⁵Paymi runakunamanpas animalkunamanpas mikhuchin, munakuyninqa wiñaypaqmi.

²⁶Hanaq pacha Diosta agradecekuychis, munakuyninqa wiñaypaqmi.