Read Quechua Cuzco Bible 1988 SALMOS 139 Bible Online

SALMOS 139 - Quechua Cuzco Bible 1988 bible

SALMOS 139

¹Davidpa takin Señor Diosníy, qanmi t'aqwiwankipas reqsiwankipas,

²qanmi tiyaykusqaytapas sayarisqaytapas yachanki, karumantan yuyaykusqayta sut'ita yachanki.

³Qanmi purinaytapas samarinaytapas tanteapuwanki, tukuy ima ruwasqaytapas yachankin.

⁴Manaraq rimarishaqtiymi, Señor Diosníy, qanqa llapantaña yachanki.

⁵Tukuyneqmantan muyuykuwarqanki, makiykiwantaqmi waqaychawankipas.

⁶Chay yachayniykimanqa manan yuyayniy taripanchu, sinchi hatunmi, manan aypayta atinichu.

⁷¿Maymantaq Espirituykimanta risaq? ¿Maymantaq qayllaykimanta ayqesaq?

⁸Hanaq pachaman wichasaq chaypas, chaypin qanqa kashanki. Wañuy-pachaman uraykusaq chaypas, chayllapitaqmi qanqa kashanki.

⁹Inti lloqsimuyman phalasaq chaypas, inti haykuy mama qocha karu patapi tiyasaq chaypas,

¹⁰chaypipas makiykiqa pusawanqan, paña makiykiqa hap'ishallawanqan.

¹¹Laqhayaqllapas pakaykuwachun, k'anchaykamuwaqniypas tutayaykamuwachun, nisaq chaypas,

¹²laqhayaqpas manan qanpaqqa laqhayaqchu, tutapas p'unchay hinan k'ancharin, k'anchaypas tutapas kaqllan qanpaqqa.

¹³Qanmi sonqo ruruyta ruwarqanki, qanmi mamaypa wiksanpi hank'ukunawan minichawarqanki.

¹⁴Ancha musphana ruwasqa kasqaymantan yupaychayki, utirayanapaqmi ruwasqaykikunaqa, allintapunin chaytaqa yachani.

¹⁵Cuerpoypa wiñasqantapas qanqa rikurqankin pakallapi kamasqa kashaqtiypas, hallp'aq sonqonpi sumaq minichasqa kashaqtiypas.

¹⁶Wiksallapiraq kashaqtiymi rikuwarqanki. Hayk'a watachus kawsanaymi qelqaykipi qelqasqaña karqan, manaraq huk watallapas chayamushaqtin.

¹⁷Diosníy, ñoqapaqqa ancha chaniyoqmi yuyaykusqaykikunaqa, ancha askhallañan chaykunaqa.

¹⁸Chaykunata yupariyta munayman chaypas, aqomantapas aswanraqmi kanman. Rikch'arispaypas qanllawanpunin kashani.

¹⁹Diosníy, ¡maytan munayman millay runakunata wañuchinaykita! ¡Maytan munayman runa wañuchiqkuna anchhuriwanankuta!

²⁰Paykunaqa millaytan qanmanta rimanku, awqaykikunan yanqapuni sutiykita hoqarinku.

²¹Señorníy, ¿manachu cheqnipakuqniykikunata cheqnisaq? ¿Manachu awqaykikunata millakusaq?

²²Sinchitapunin paykunataqa cheqnikuni, paykunataqa awqaykunata hinan hap'ini.

²³Diosníy, t'aqwiriway, sonqoyta qhawariy, allinta probaykuway, llakipakuyniykunata yachaykuy.

²⁴Qhawariway urmachiq ñanpipaschá purishani, wiñay ñanninta pusaway.