Read Quechua Cuzco Bible 1988 SALMOS 143 Bible Online

SALMOS 143 - Quechua Cuzco Bible 1988 bible

SALMOS 143

¹Davidpa takin Señor Diosníy, mañakusqayta uyariykuway, khuyapayawaspayki mañakamusqayta uyariykuway. Qanqa chaninmi hunt'aqmi kanki. ¡Kutichimuway!

²Ama kamachiykita huchachawaychu, manan qayllaykipiqa mayqen runapas chaninchakunchu.

³Awqaykunan qatiykachawanku, pampakaman ñit'iwanku, unayña wañusqakunata hinan laqhayaqpi tiyachiwanku.

⁴Sinchitapunin llaki ñit'ishawan, sonqoymi p'iti-p'itishan.

⁵Ñawpa p'unchaykunatan yuyarini, tukuy ruwasqaykikunatan yuyaymanani, makiykiq ruwasqankunatan qhawarini.

⁶Ch'aki hallp'a hinan qanmanta ch'akichikuni, mañakuspaymi makiyta mast'arimuyki.

⁷Señor Diosníy, uyariykamullawayña, peqtuyapushaniñan. Ama uyaykita pakaykukuwaychu, paqtan p'ampanapaq ayakuna hina kapuyman.

⁸Tutallamanta mana p'itiy munakuyniykita yachachiway, qanman hap'ipaykakamusqayrayku. Maynintachus purinayta yachachiway, tukuy sonqo asuykamusqayrayku.

⁹Señor Diosníy, qanmanmi pakakamuyki, awqaykunamanta qespichiway.

¹⁰Qanmi Diosniyqa kanki, chayrayku munayniyki ruwayta yachachiway, allin Espirituyki sumaq ñanninta pusawachun.

¹¹Señor Diosníy, sutiyki yupaychasqa kananpaq kawsachiway, chaninkaqta ruwaspayki llaki-phutiymanta horqoway.

¹²Mana p'itiyta munakuwaspayki awqaykunata wañuchiy. Ñoqaqa kamachiykin kani, llapa sarunchaqniykunata chinkachiy.