Read Quechua Cuzco Bible 1988 SALMOS 144 Bible Online

SALMOS 144 - Quechua Cuzco Bible 1988 bible

SALMOS 144

¹Davidpa takin ¡Saminchasqa waqaychawaqniy Señor Diosqa kachun! Paymi maqanakunaypaq makiyta yachachin, awqa-tinkuypaqpas yachachiwan.

²Paymi munakuwaqniypas pukaraypas, pakakunaypas qespichiwaqniypas, paymi escudoypas hark'aykuwaqniypas, paymi llaqtakunawan kasuchiwan.

³Señor Diosníy, ¿imataq runari payta yuyarinaykipaq? ¿Imataq wañuq runari qhawarinaykipaq?

⁴Runaqa huk samarqoy hinallan, kawsayninqa chinkapuq llanthu hinallan.

⁵Señor Diosníy, hanaq pachata kicharimuspa uraykamuy, orqokunata q'osñinanpaq llamiykuy.

⁶Lliphllikichimuy, awqaykikunata ayqechiy, wach'iykikunata wach'imuy, paykunata llaksay.

⁷Hanaq pachamanta makiykita haywarimuy, askha unumanta horqospa aysaway. Wak llaqtayoqkunaq makinmanta qespichiway,

⁸siminkuqa llullatan riman, llullakuspan juramentotapas ruwanku.

⁹Diosníy, mosoq takitan takipusqayki, arpawanmi takipusqayki.

¹⁰Qanmi reykunata atipachinki, kamachiyki Davidtapas qespichinki,

¹¹chayrayku awqa sonqo runakunamanta qespichiway, wak llaqtayoqkunaq makinmanta qespichiway. Siminkuqa llullatan riman, llullakuspan juramentotapas ruwanku.

¹²Wayna churinchisqa huerta t'ikashaq mallkikuna hina kachun, sipas ususinchisqa qhapaq wasita sumaqchaq ch'eqosqa tusakuna hina kachun.

¹³Taqenchisqa imaymana ruruwan hunt'a kachun. Ovejanchisqa waranqanpi mirachun, hallp'anchispi waranqa-waranqa kachun.

¹⁴Toronchisqa kallpasapallaña kachun, awqanchiskunaqa llaqta perqata ama q'asachunchu, runanchisqa ama kamachi-kayman lloqsichunchu, ama plazanchispipas llakisqa qapariypas uyarikuchunchu.

¹⁵¡Kusisamiyoqmi chay hinata q'ochukuq llaqtaqa! ¡Kusisamiyoqmi Señor Diosniyoq llaqtaqa!