Read Quechua Cuzco Bible 1988 SALMOS 145 Bible Online

SALMOS 145 - Quechua Cuzco Bible 1988 bible

SALMOS 145

¹Davidpa takin Hatunchasqaykin, Diosníy, Reyníy, wiñay-wiñaypaqmi sutiykita saminchasaq.

²Sapa p'unchaymi saminchasqayki, wiñay-wiñaypaqmi sutiykita yupaychasaq.

³Hatunmi Señor Diosqa, ancha hatun yupaychanapaq hinan, manan hatun-kayninmanpas yuyayqa aypanchu.

⁴Sapanka miraypas wawankumanmi ruwasqaykikunata mentanqa, atiyniyoq ruwasqaykikunata willanqa.

⁵Ancha sumaq qhapaq-kayniykimantan rimanqaku, ñoqataq musphana ruwasqaykikunamanta rimasaq.

⁶Manchana atiywan ruwasqaykikunamantan rimanqaku, ñoqataq hatun-kayniykimanta willakusaq.

⁷Sumaq sonqollaña kasqaykita willakuspan rimanqaku, chaninchayniykitan kusisqa takinqaku.

⁸Señor Diosqa sumaq sonqon khuyapayakuqmi, mana usqhay phiñakuqmi, mana p'itiyllapuni munakuqmi.

⁹Allinmi Señor Diosqa llapapaq, llakipayaspan llapa ruwasqanta qhawashan.

¹⁰Señor Diosníy, llapa ruwasqaykikunan yupaychasunkiku, qan sonqo runaykikunan saminchasunkiku.

¹¹Kamachikusqaykiq qhapaq-kayninmantan rimanqaku, atiyniykitan willakunqaku,

¹²atiywan ruwasqaykikunata llapa runa yachanankupaq, kamachikusqaykiq ancha sumaq qhapaq-kaynintapas yachanankupaq.

¹³Kamachikusqaykiqa wiñay-wiñaypaq kamachikuymi, munaychakusqaykiqa wiñay-wiñaypaqmi. Señor Diosqa llapa prometekusqankunatan hunt'an, tukuy ruwasqantapas munakuywanmi qhawarin.

¹⁴Señor Diosqa llapa urmaqkunatan aysarin, llapa k'umuykachisqakunatan sayarichin.

¹⁵Llapan qhawarayasunki, qantaqmi tiemponpipuni paykunaman mikhuchinki.

¹⁶Makiykita kicharispan llapa kawsaqkunata munasqankuwan saksaykachinki.

¹⁷Señor Diosqa maychus chanin kaqtapunin ruwan, tukuy ruwayninpipas sumaq sonqon.

¹⁸Señor Diosqa llapa waqyakuqninkunaq sispallanpin kashan, hayk'an cheqaq sonqowan waqyakuqninkunaq qayllallanpin kashan.

¹⁹Manchakuqninkunaq munasqantan hunt'an, waqyakusqankutan uyarin, paykunatan qespichin.

²⁰Señor Diosqa llapa munakuqninkunatan waqaychan, llapa millay runakunatan ichaqa chinkachin.

²¹Simiywanmi Señor Diosta yupaychasaq. Tukuy runa ch'uya sutinta yupaychachun kunanpas wiñaykamapas.