Read Quechua Cuzco Bible 1988 SALMOS 147 Bible Online

SALMOS 147 - Quechua Cuzco Bible 1988 bible

SALMOS 147

¹¡Yupaychasqa Señor Diosqa kachun! May allinmi Diosninchisman yupaychaykunata takiyqa, may sumaqmi payta yupaychanata hinapuni yupaychayqa.

²Señor Diosmi Jerusalenta wakmanta perqachin, ch'eqechisqa Israel runakunatan huñuykamun.

³Paymi llakiq ñit'isqan sonqoyoqkunata qhaliyachin, k'irinkunatapas wataykun.

⁴Paymi hayk'achus ch'askakuna kasqanta yupan, sapankatan sutinmantakama waqyan.

⁵Ancha hatunmi Señor Diosninchisqa, kallpasapallañan payqa, yuyayninpas mana taripay atiymi.

⁶Señor Diosmi huch'uyyaykukuqkunata aysarin, millaykunatan ichaqa pampakama k'umuykachin.

⁷Señorman graciasta qospa takiychis, Diosninchisman arpawan takiychis.

⁸Paymi hanaq pachata phuyuykachimun, paymi hallp'apaq parata chayachin, paymi orqokunapi qorata wiñachin,

⁹paymi uywakunaman mikhuchin, waqashaq alqamari chiwchikunamanpas mikhuchin.

¹⁰Manan caballo kallpachu Señor Diostaqa kusichin, manan runa kallpapaschu paytaqa kusichin.

¹¹Señor Diosqa payta manchakuqkunawanmi kusikun, mana p'itiy munakuyninman sonqollikuqkunawan.

¹²Jerusalén llaqta, Señorta yupaychay, Sión llaqta, Diosniykita yupaychay.

¹³Paymi punkuykikunaq p'utinta mat'iykurqan, llaqta ukhupi kaq wawaykikunatapas samincharqan.

¹⁴Paymi suyuykita thak-nisqata hap'in, allinnin trigowantaqmi saksaykachisunkipas.

¹⁵Kay pachatan payqa kamachin, usqhayllan paytaqa kasunku.

¹⁶Millmata hinan rit'ita rit'ichimun, usphata hinan qhopatapas qhopachimun.

¹⁷Hank'akunata hinan chikchichimun, chirichimuqtinri, ¿pitaq aguantanman?

¹⁸Rimarimunmi hinan chaykuna chullurin, wayrachimunmi hinan unu phawarin.

¹⁹Paymi siminta Jacobman sut'incharqan, kamachikusqankunatapas kuskachasqankunatapas Israelman sut'incharqan.

²⁰Manan chay hinatachu wak mayqen suyuwanpas ruwarqan, manan chaykunaqa kuskachasqankunata reqsinkuchu. ¡Yupaychasqa Señor Diosqa kachun!