Read Quechua Cuzco Bible 1988 SALMOS 148 Bible Online

SALMOS 148 - Quechua Cuzco Bible 1988 bible

SALMOS 148

¹¡Yupaychasqa Señor Diosqa kachun! Señor Diosta yupaychaychis hanaq pachamantapacha, payta yupaychaychis hanaq pachapi.

²Payta yupaychaychis llapa angelninkuna, payta yupaychaychis llapa hanaq pachapi kaqkuna.

³Payta yupaychaychis inti killa, payta yupaychaychis k'anchashaq llapa ch'askakuna.

⁴Payta yupaychay ancha hatun hanaq pacha, payta yupaychaychis hanaq pachapi kaq unukuna.

⁵Señor Diospa sutinta yupaychachunku, paymi kamachikurqan, chaymi kamasqa karqanku.

⁶Señor Diosmi kanankumankama wiñaypaq churarqan, chaykunapaqmi kamachikuy simita churapurqan, chaytaqa manan p'akinqakuchu.

⁷Señor Diosta yupaychaychis kay pachamantapacha, qochapi hatuchaq animalkunapas, llapa chinkay-chinkay ukhukunapas,

⁸lliphllikiqpas chikchipas, rit'ipas waksipas, siminta hunt'aq kunununuq wayrapas,

⁹orqokunapas llapa moqokunapas, ruruq sach'akunapas, cedro sach'akunapas,

¹⁰uywasqa animalkunapas, salqa animalkunapas, mach'aqwaykunapas, phalaq animalkunapas,

¹¹kay pacha reykunapas, llapa llaqtakunapas, llapa umallikunapas, kay pachantin kamachikuqkunapas,

¹²waynakunapas sipaskunapas, yuyaqkunapas wawakunapas.

¹³Señor Diospa sutinta llapa yupaychaychis, sapan sutillanmi ancha hatunqa, qhapaq atiyninqa kay pachamantapas hanaq pachamantapas aswanraqmi.

¹⁴Paymi llaqtanpa atiyninta hatuncharqan, chaymi pay sonqo runankunaqa payta yupaychanku, chay munakusqan Israel runakuna payta hatunchanku. ¡Yupaychasqa Señor Diosqa kachun!