Read Quechua Cuzco Bible 1988 SALMOS 19 Bible Online

SALMOS 19 - Quechua Cuzco Bible 1988 bible

SALMOS 19

¹Davidpa takin Diospa hatun-kaynintan hanaq pachaqa sut'ita willakushan, kamasqanmantan hanaq pachaqa sut'inchashan.

²Huk p'unchaymi hukkaq p'unchayman willan, huk tutapas hukkaq tutaman yachachin.

³Rimayña mana kanchu chaypas, ima simiña mana uyarikunchu chaypas,

⁴kunkankuqa pachantinmanmi chayan, teqsimuyuntinmanmi chayan. Chaypin Diosqa intipaq wasichapurqan,

⁵intitaq chayraq casarakuq novio hina wasinmanta lloqsimun, llallinakuypi phawaq hinataq kusisqa ñanninta purin.

⁶Huknin kinraymantan intiqa lloqsimun, muyuspataq hukkaq kinrayman chayan, manataq imapas qanqesqanmantaqa pakakunmanchu.

⁷Señor Diospa yachachikuyninqa chaninpunin, sonqotan llanllachin. Señor Diospa unanchasqa siminqa mana kuyuqmi, mana yachaqtan yachayniyoqman tukuchin.

⁸Señor Diospa churasqan simikunaqa chaninpunin, sonqotan kusichin. Señor Diospa kamachikuyninqa sut'ipunin, yuyaytan k'anchaykun.

⁹Señor Diosta manchakuyqa ch'uyan, wiñaypaqmi sayan. Señor Diospa chaninchayninkunaqa cheqaqmi, llapallanmi chaninkama,

¹⁰qorimantapas aswan munanan, ch'uyanchasqa askha qorimantapas ancha munanan, lachiwanamanta sut'umuq mielmantapas aswan misk'in.

¹¹Ñoqa kamachiykitaqa chaykunan anyaykuwan, kamachikuyniykikunata kasuqqa allin premiotan chaskin.

¹²Manan pipas pantasqankunataqa reparakuyta atinchu. ¡Señor Diosníy, pakasqa huchaykunamanta kacharichiway!

¹³Kamachiykiq yuyaywan huchallikunanmanta hark'away, ama chay huchakunawan atipachiwaychu. Chaypachan mana huchachana kasaq, hatun huchallikuytaqa manan ruwasaqchu.

¹⁴Señor Diosníy, hatun Qaqaymi qespichiqniymi kanki, simi rimarisqaykunapas yuyaykusqaykunapas sonqoykipaq hinapuni kachun.