Read Quechua Cuzco Bible 1988 SALMOS 25 Bible Online

SALMOS 25 - Quechua Cuzco Bible 1988 bible

SALMOS 25

¹Davidpa takin Señor Diosníy, qanmantan mañakuyki,

²qanmanmi k'askakamuyki, ama p'enqachisqa kanayta munaychu, ama awqaykunaqa kusipayawachunkuchu.

³Hayk'an qanman hap'ipaykukuqkunaqa manapunin p'enqachisqachu kanqa, yanqa nisqa qanta wasanchaqkunan ichaqa p'enqachisqapuni kanqa.

⁴Señor Diosníy, ñanniykikunata rikuchiway, purinaykikunatapas yachachiway.

⁵Qan sonqota kawsachikuway yachachikuway, qanqa Diosniymi Qespichiqniymi kanki, qantaqa p'unchay-ch'isiyaqmi suyakuyki.

⁶Señor Diosníy, yuyarillaypuni llakipayakuq kasqaykitapas, mana p'itiyta munakuq kasqaykitapas, qanqa hinallapunin karqanki.

⁷Ichaqa amaña wayna kasqay huchaykunatapas pantasqaykunatapas yuyariychu. Señor Diosníy, yuyarikuway ancha khuyakuq kaspayki, mana p'itiyta munakuq kaspayki.

⁸Allinpunin chaninpunin Señor Diosqa, chaymi payqa huchallikuqkunaman munayninta yachachin.

⁹K'umuykukuqkunatan chanin ñanninta pusan, paykunamanmi munayninta yachachin.

¹⁰Señor Diosqa munakuq kaspapunin hunt'aq kaspapunin, rimanakusqankupi kamachikuykunata hunt'aqkunata pusan.

¹¹Señor Diosníy, hatunllañan huchallikusqayqa, pampachaykuway sutiyki yupaychasqa kananpaq.

¹²Señor Diosqa payta manchakuq runamanmi may ñannintachus purinanta rikuchin.

¹³Payqa allillanpunin kanqa, miraynintaq suyuta hap'ikapunqa.

¹⁴Señor Diosqa pay manchakuqkunawanmi sonqota tupachin, paykunamanmi rimanakusqanta reqsichin.

¹⁵Señor Diostaqa qhawashallanipunin, paymi laykukuymanta qespichiwan.

¹⁶Qhawarimuway, khuyapayaykuway, sapallaymi khuyay llakisqa kashani.

¹⁷Sonqoytan astawanpuni llaki ñit'iykushawan, llaki-phutiyniykunamanta horqoway.

¹⁸Llakikusqaytawan muchusqaytawan qhawariway, llapa huchaykunatapas pampachaway.

¹⁹Hayk'a awqayoqchus kasqayta qhawariway, sinchitapunin cheqnipakuwanku.

²⁰¡Hark'aykuway, qespichiway! Ama p'enqachisqa kanayta munaychu, qanllamanmi hap'ipaykukuni.

²¹Ch'uya ruwayniywan chanin kawsayniywan waqaychawachun, qanmanmi k'askaykukuni.

²²¡Diosnilláy, Israelta kacharichiy tukuy llaki-phutiyninkunamanta!